Lider hramadzianskaj kampanii «Havary praŭdu» paet Uładzimier Niaklajeŭ abviaściŭ ab svaim namiery stać kandydatam na prezydenta. Svajo rašeńnie balatavacca ŭ prezydenty Niaklajeŭ zrabiŭ u efiry rasiejskaj radyjostancyi «Echo Moskvy».
Lider hramadzianskaj kampanii «Havary praŭdu» paet Uładzimier Niaklajeŭ takim čynam patłumačyŭ svaje zajavy ŭ efiry radyjostancyi Echo Moskvy: «Jak trochi śpiašajucca rabić u Miensku mianie kandydatam u prezydenty Respubliki Biełaruś, tak paśpiašalisia i ŭ Maskvie, dzie ja skazaŭ, što ja źbirajusia vyłučacca kandydatam na prezydenta. A kandydat na prezydenta — heta toj čałaviek, jaki nia prosta zajavić, a źbiare 100 tysiač podpisaŭ, zaniasie ich u adpaviednuju instancyju, jakoj źjaŭlajecca Centralnaja vybarčaja kamisija, tam jaho zarehistrujuć i daduć jamu adpaviedny dakument, pa jakim jon budzie kandydatam na prezydenta. My abvieścim, što ad kampanii «Havary praŭdu!» vyłučajecca ŭ kandydaty na prezydenta Respubliki Biełaruś Uładzimier Niaklajeŭ paśla taho, jak budzie skazana, što vybary hetyja nasamreč adbuducca».
Aprača Niaklajeva pra svoj udzieł u vybarach zajaŭlali jašče prynamsi vosiem čałaviek: staršynia ŁDP Siarhiej Hajdukievič, staršynia ekalahičnaj partyi «zialonych» Jury Hłušakoŭ, namieśnik staršyni partyi BNF Ryhor Kostusieŭ, lider Ruchu «Za Svabodu» Alaksandar Milinkievič, Aleś Michalevič, namieśnik staršyni AHP Jarasłaŭ Ramančuk, sustaršynia BCHD Vital Rymašeŭski, kaardynatar hramadzianskaj kampanii «Eŭrapiejskaja Biełaruś» Andrej Sańnikaŭ. Uładzimier Niaklajeŭ, takim čynam, užo dzieviaty, chto zajaviŭ pra svaje prezydenckija ambicyi.
Palitolah Alaksandar Kłaskoŭski takim čynam aceńvaje šancy Ŭładzimiera Niaklajeva:
«Sapraŭdy, abojma pretendentaŭ sioleta jak nikoli vialikaja. Adnak nia ŭsie z hetych pretendentaŭ majuć dastatkovy patencyjał.Dyk voś Niaklajeŭ — heta adzin ź liku niekalkich, jakija mohuć realna — bo majuć za saboj kamandu, majuć strukturu, majuć resursy — sabrać pa 100 tysiač podpisaŭ. Ja dumaju, što mienavita pamiž Niaklajevym i jašče litaralna paraj palitykaŭ apazycyjnych budzie vyrašacca pytańnie kaardynacyi dziejańniaŭ. Mahčyma pad pytańniem vyłučeńnie adzinaha, tamu što, jak viadoma, raściarušanaści i supiarečlivaści ŭ apazycyi vielmi vialikija».
Kampanija «Havary praŭdu!» užo maje dośvied zboru podpisaŭ: za vulicy Bykava ŭ Miensku i Horadni, a taksama za vyłučeńnie Ŭładzimiera Niaklajeva delehatam na treci Ŭsiebiełaruski narodny schod. Pryčym, pry zbory podpisaŭ na hety schod akramia proźvišča, imia i imia pa baćku paznačalisia pašpartnyja dadzienyja i adras
«Voś tut užo sam praces źbirańnia podpisaŭ my nablizili da prezydenckich, całkam z tymi ž patrabavańniami, što buduć u prezydenckaj kampanii. I absalutna ŭkłalisia va ŭsie terminy. Tak što kali vybary buduć abvieščanyja siońnia, my hatovyja da taho, kab hetyja 100 tysiač podpisaŭ sabrać. My źbiarom, kaniečnie, bolš. Miljon my źbirać, kaniečnie, nia budziem, heta nasamreč niepatrebna. Ale nieabchodny zapas, kab vyklučyć usialakija vypadkovaści my, kaniečnie, zrobim», — kaža Niaklajeŭ.
U efiry radyjostancyi «Echo Moskvy» Uładzimier Niaklajeŭ zajaviŭ, što zastajecca prychilnikam idei vyłučeńnia adzinaha kandydata ad demakratyčnych siłaŭ.
