Na dumku namieśnika staršyni Partyi BNF Ryhora Kastusiova, vyłučanaha partyjaj kandydatam na pasadu prezidenta, na debatach nieabchodna abmierkavać pałažeńni manifestu ab abaronie nacyjanalnych intaresaŭ, jaki byŭ pradstaŭleny 23 žniŭnia.
«Pałažeńni manifestu vyklikali cikavaść u srodkaŭ masavaj infarmacyi i patencyjnych kandydataŭ u prezidenty. Ja hatovy ŭ debatach davieści, što padčas prezidenckaj kampanii apazicyjny kandydat pavinien adstojvać nacyjanalnyja intaresy, a nie, naprykład, prarasijskija», – skazaŭ jon.
Lider Partyi BNF Alaksiej Janukievič adznačyŭ, što pakul aficyjnaj reakcyi na prapanovu dałučycca da manifiestu nie było. Adnak, paviedamiŭ jon, padpisać dakumient moža lider ruchu «Za Svabodu» Alaksandr Milinkievič, sustaršynia arhkamiteta pa stvareńni partyi «Biełaruskaja chryścijanskaja demakratyja» Vital Rymašeŭski, palityk Aleś Michalevič.
U manifeście Partyi BNF adznačajecca, što niebiaśpieka palityčnaj i ekanamičnaj niezaležnaści Biełarusi i svabodzie jaje hramadzianaŭ zychodzić «nie tolki ad siońniašniaha režymu, ale i ad vyšejšych palityčnych kołaŭ Rasii i źviazanych ź imi aliharchaŭ». A tamu na vybarach nieabchodna zmahacca nie tolki suprać Łukašenki, ale i suprać prarasijskaha kandydata.
Paśla svajho prychodu da ŭłady, havorycca ŭ dakumiencie, Partyja BNF harantuje rezki razryŭ sajuznych adnosinaŭ z Rasijaj, u tym liku vychad z Mytnaha sajuza i ADKB.
