Z pačatku hodu košt minskich kvater praciahvaje pastupova źmianšacca – za paŭhoda na 7%. Ciapier kvadratny mietr u stalicy ŭ siarednim kaštuje $1230. Takim čynam, typovaja dvuchpakajoŭka płoščaj 50 kvadratnych mietraŭ za hety čas patańnieła na $4300.
A voś košt navabudaŭ pa-raniejšamu raście. Budaŭničy bum u hetym siehmiencie i nie dumaje źnikać. Za košt hetaha ceny na novyja kvatery ciapier abahnali ceny druhasnaha rynku i spakvala padbirajucca da $1300.
Dla tych ža, chto pakul nie ŭ stanie naźbirać na ŭłasnaje žyllo, zastajucca prapanovy ab najmie kvatery. Adnapakajoŭka ŭ spalnym rajonie horada kaštuje kala $200 za miesiac.
Heta doraha ci tanna? Paraŭnajem minskija ceny z takimi ž cenami ŭ susiednich stalicach.
Maskva nizkim cenam nie vieryć
Viadoma ž, samym darahim horadam na postsavieckaj prastory zastajecca Maskva. Rasijskim šalonym cenam kryzis – zusim nie pieraškoda. Košt kvadratny mietr kvatery dapoŭz da $4400. Heta ŭ 3,5 razu bolš, čym u Minsku!
Ceny na adnapakajoŭki, jakija bieśpierapynna abžyvajuć usio novyja i novyja achvotniki ŭ pošukach maskoŭskaha ščaścia, pačynajucca ad $800 za miesiac. Za siaredni ž uzrovień možna śmieła brać $950-1000. Heta kab adnosna niepadaloku ad mietro i nie ŭ avaryjnym domie.
Kijeŭ pamiž Minskam i Maskvoj
Ukrainskaja stalica ŭtrymlivaje za saboj upeŭnienaje druhoje miesca pa darahoŭli – siaredni košt kvadratnaha mietra kvatery na druhasnym rynku Kijeva składaje $2100. Pakazčyk atrymlivajecca takim vysokim za košt vysokich cen na elitnaje žyllo ŭ centry ŭkrainskaj stalicy. Ale navat u samych addalenych spalnych rajonach košty kvadratnaha mietra pieravyšajuć $1650.
Cana na novabudoŭli składaje $1700 za mietr. A voś košt arendy kvatery vyličvajecca pa ŭniviersalnaj formule – udvaja tańniej za Maskvu, udvaja daražej za Minsk. Atrymlivajecca jakraz kala $400.
Vilnia i Varšava trymajucca razam
Choć zarobki ŭ palakaŭ u 1,5 razu bolšyja, čym u litoŭcaŭ – $1500 suprać $1000 – kvatery ŭ Varšavie i Vilni kaštujuć prykładna adnolkava.
U litoŭskaj stalicy kvadratny mietr kvatery abyjdziecca prykładna ŭ $1380. Što da arendy, to kvatera biez ramonta abyjdziecca ŭ $300 za miesiac, ale ŭ haračy siezon, jak zaraz, u žniŭni, studenty vymušana «padnimajuć» ceńnik da $400.
Varšava žyvie pa załatym pravile – siaredni zarobak roŭny koštu kvadratnaha mietra. Tamu i ceny ŭ rajonie $1500. I navat krychu mienš. Arenda ž kaštuje kala $380-400 za adnapakajoŭku.
Ryžski biascenak
Pra ceny na žyllo ŭ Ryzie navat pisać soramna. Za košt kryzisa jany ŭpali da $750 za kvadratny mietr! Sprava ŭ tym, što padčas finasavaha kryzisa ceny zvalilisia ŭ 1,5 razu i nie viarnulisia na raniejšy ŭzrovień da hetaha času. Arenda žylla patańnieła nie tak mocna – adnapakaŭjoka kaštuje kala $300 – i ŭ hetym zaklučajecca vialikaja prablema dla łatvijskaha rynku nieruchomaści. Vypłaty pa kredytach pra pabudovie svajoj kvatery amal roŭnyja koštu arendy. Tamu łatvijcy masava abirajuć varyjant budaŭnictva, tym samym iznoŭ nadzimajučy kredytnuju mylnuju burbałku, što pahražaje vysokaj inflacyjaj.
