«Minsk-sici» zabudujuć tannymi «panelkami»? 6

Pieršyja achvotnyja pasialicca ŭ samym prestyžnym miescy stalicy — što chavać, i ŭsioj krainy! — rajonie «Minsk-sici», mohuć radasna pacirać ruki. Ahienctvy nieruchomaści pačynajuć braniravańnie kvater u žyłych damach kompleksa. Pieršaj łastaŭkaj staŭ «Centr handlu nieruchomaściu «Pakadan». Ryełtary zrabili patencyjnym pakupnikam kamiercyjnuju prapanovu i zaadno paviedamili niečakanyja akaličnaści budaŭnictva.

Pieršy dom «Minsk-sici» budzie 19-paviarchovaj… «panelkaj»! Z koštam «ad $1000 za kvadratny mietr».

I panelny dom u rajonie budzie pabudavany daloka nie adzin — cełaja proćma.

Pieršy žyły dom

Častku hienieralnaha płanu. Pieršy žyły dom abviedzieny kołam

«Viarnicie chmaračosy!»

Tryvohu stali bić u internecie.

Ludzi pieradusim aburanyja tajamničaj zamienaj płanaŭ haradskich uładaŭ u apošni momant.

«Mnie tolki što tak strašna-strašna stała… Akazvajecca, „Minsk-sici“ budzie zusim nie takim, jakim vy chočacie jaho bačyć. Hienpadradčyk tam MAPID, vyznačanyja panelnyja sieryi pad zabudovu. I heta sici, budučynia, tak by mović, pierśpiektyva biełaruskaha budaŭnictva, inavacyi… Navošta ašukvali?» — piša karystalnik Vipmakler z onliner.by.

«Što za panelki ŭ sici? Dzie prasłavutyja chmaračosy? Jak ža dastali hetyja hora-inviestary…», —

paŭtaraje ŭśled za im Groznik z skyscrapercity.com

Hałoŭnym inviestaram niepabudavanaha rajona źjaŭlajecca rasijskaja «Itera». Da 2020 hoda płanavałasia pabudavać 4 miljona kvadratnych mietraŭ žyłych, ofisnych i handlovych placovak. Ahulnaja suma inviestycyj musiła skłaści $5 miljardaŭ. Dla realizacyi prajektaŭ było stvorana SAAA «Minsk-Sici», udzielnikami jakoha z rasijskaha boku, aproč «Itery» stali kampanii «SU-155» i «MA «Unukava», «Źniešekanambank» i Bank VTB. Kiraŭnik Biełarusi Alaksandr Łukašenka, niezadavoleny nulavymi tempami budaŭnictva, pahražaŭ adabrać u rasijan prestyžnuju placoŭku, ale płan nie realizavaŭ, bo «Itera» paabiacała pačać budaŭnictva ŭ druhoj pałovie hetaha hoda.

Čarha na «panel»

U «Pakadanie» nie bačać nijakaj prablemy u tym, što pa telebačańni minčanam abiacali chmaračosy, a pabudujuć panelki:

«Chto vam skazaŭ, što heta elitnyja damy?

Zvyčajny rajon. Buduć i karkasnyja damy, i typavyja panelnyja, i ofisnyja. Pakul što my prosta rekłamujem dom i rychtujem dakumienty na budaŭnictva. Ludzi cikaviacca prapanovaj i ŭžo zajmajuć čarhu» — «Ci praduhledžany źnižki dla ludziej, jakija majuć prava na palapšeńnie žyllovych umoŭ?» — «Takoj infarmacyi niama».

U kamitecie pa budaŭnictvu i inviestycyjach Minharvynkama paraili źviarnucca da hienieralnaha płana raźvićcia Minska, maŭlaŭ, jakija damy namalavanyja tam, takija i buduć pabudavanyja.

Što ž u hienpłanie? Na im sapraŭdy možna ŭbačyć adnolkavyja panelnyja damy, jakija znachodziacca na adlehłaści ŭ niekalki dziesiatkaŭ mietraŭ adzin ad adnaho.

Vyhlad z vakna nie paraduje žylcoŭ — štodzień im pryjdziecca bačyć šmatuzroŭnievuju transpartnuju raźviazku.

Pra stan ekałohii možna navat nie zaikacca. Darečy, vychad z padjezda znachodzicca na tym samym «darožnym» baku.

Siarod pieravah doma nievialiki mietraž. Adnapakaŭki płoščaj 45 m², dvuchpakajoŭki — 61 m² i trochpakajoŭki — 78 m². Razam ź nievysokim koštam žylla (ad $1000) prapanova, biezumoŭna, znojdzie svajho pakupnika. Dom pavinien być zdadzieny ŭ kancy 2011 hoda, pryčym z poŭnaj adździełkaj. Na lhotny 5%-ny kredyt minčanie, chutčej za ŭsio, raźličvać nie mohuć, bo Minharvykankam nie dazvalaje brać ich tym, chto budujecca ŭ panelnych damach. Padtrymka dziaržavy raspaŭsiudžvajecca na karkasnyja damy.

Jeŭraremont znoŭ adkładvajecca

Jašče dva hady tamu kiraŭnik dziaržavy Alaksandr Łukašenka davaŭ daručeńnie ŭvieści ŭ prajektavańni i budaŭnictvie normy i pryncypy, pryniatyja ŭ Jeŭrasajuzie. Z taho času źmianiłasia što zaŭhodna — ale nie tyja standarty. Čarhovaja hadzina «Ch» pryznačanyja na 1 žniŭnia, ale vidavočna, što halina nie padrychtavanaja da jeŭrareformaŭ.

Adnoj z tendencyj raźvićcia budaŭničaj haliny ŭ jeŭrapiejskich krainach možna nazvać admovu ad stvareńnia novych panelnych damoŭ.

Zachad užo dosyć daŭno nie ŭzvodzić niedaŭhaviečnyja, nieenerhaefiektyŭnyja i — što chavać — nie nadta pryhožyja damy.

Biełaruś ža praciahvaje naroščvać tempy takoj budoŭli.

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH