Pracujučy ŭ kamandzie Andreja Sańnikava, Viktar Ivaškievič nie maje namieru pakidać šerahi Partyi BNF. Pra heta jon paviedamiŭ u intervju BiełaPAN.
Nahadajem, 12 červienia padčas sojma partyi staršynia Minskaj haradskoj arhanizacyi Viktar Ivaškievič zajaviŭ, što na prezidenckich vybarach budzie pracavać u kamandzie lidera hramadzianskaj kampanii »Jeŭrapiejskaja Biełaruś» Andreja Sańnikava. Ivaškievič rastłumačyŭ heta situacyjaj u Partyi BNF. »Ja adychodžu ŭ bok. Ja liču, što treba aktyŭna ŭdzielničać u prezidenckich vybarach, a nie zajmacca ŭnutrypartyjnymi čystkami. A zajmacca prezidenckaj kampanijaj možna tolki ŭ kamandzie kandydata ŭ prezidenty», — zajaviŭ jon na sojmie.
«Sańnikaŭ, na moj pohlad, najbolš aptymalny kandydat u prezidenty, jakoha varta padtrymlivać, — skazaŭ Ivaškievič. — Jon nie zajmajecca baraćboj kandydataŭ suprać kandydataŭ. Jon nie braŭ udziełu ŭ šmatlikich pracedurach vyłučeńnia »adzinaha kandydata», jakija zakončylisia ničym. Jon nie zajmajecca »hryźnioj pamiž saboj», a prosta pracuje na vynik».
Pavodle słoŭ palityka, jon nie źbirajecca pakidać pasadu staršyni Minskaj haradskoj arhanizacyi Partyi BNF. «Na 21 červienia zapłanavany schod členaŭ Minskaj haradskoj arhanizacyi. Na joj ja raskažu pra vyniki sojma partyi, vykažu svaju pazicyju i dam aktyvistam prava vyrašać — padzialajuć jany maju pazicyju abo nie. Kali budzie pryniata rašeńnie ab tym, što ja pavinien pakinuć hetuju pasadu, ja jaje pakinu», — zajaviŭ Ivaškievič.
Pry hetym jon adznačyŭ, što farmalna nijakich pieraškod dla ŭdziełu členaŭ partyi ŭ prezidenckaj kampanii na baku niepartyjnaha kandydata nie isnuje. »Nakont hetaha niama nijakaha kalehijalnaha rašeńnia partyi. Navat kali b jano było, nijakim kalehijalnym rašeńniem nie prymusiš ludziej pracavać na kandydata ŭ prezidenty, jakoha jany nie padtrymlivajuć. I ŭ partyi niama nijakich miechanizmaŭ dla taho, kab prymusić ludziej rabić toje, što im nie padabajecca», — padkreśliŭ palityk.
