Jak paviedamiŭ Siarhiej Panamaroŭ z Klecka, siońnia, 19 maja da jaho damoŭ naviedałasia nieviadomaja žančyna, jakaja pradstaviłasia sudovym vykanaŭcam Vyšejšaha haspadarčaha sudu. Słužbovaje paśviedčańnie hościa nie pakazała, tamu haspadar vyrašyŭ nie puskać jaje ŭ dom. Razmaŭlali praz fortku. Žančyna zadavała pytańni pra dziejnaść vydaŭca: na jakija srodki i dzie jon drukuje biuleteń «Bojki Klecak», a taksama na jakija srodki redahuje sajt. Pytańni hetyja S. Panamarovu padalisia dziŭnymi, bo z Haspadarčym sudom jon mieŭ dačynieńnie pavodle zusim inšaj spravy. U 2005 hodzie ŭ jaho kanfiskavali drevaapracoŭčy cech, jaki jon arhanizavaŭ u kinutym budynku, vykuplenym im u horada. Akramia taho Panamarova, na toj čas indyvidualnaha pradprymalnika, abvinavacili ŭ niavypłacie arendnych płaciažoŭ. Niekalki hod sudovyja vykanaŭcy prychodzili da jaho, kab apisać majomaść.
Paśla padazronaha vizitu Siarhiej Panamaroŭ naviedaŭsia ŭ miascovy sud, kab daviedacca, chto ž da jaho prychodziŭ. U sudzie jamu paviedamili, što pa takich spravach jaho mohuć naviedvać tolki sudovyja vykanaŭcy Kleckaha sudu. Akramia taho, sprava jahonaha biźniesu skončanaja, były pradprymalnik bolš ničoha nie vinien.
«Ja jašče ŭčora pačaŭ rychtavacca da vizitaŭ, paśla pieratrusaŭ pa ŭsioj krainie. Tamu asabliva nie ździviŭsia», — kaža klecki vydaviec. Jon miarkuje, što siońniašni vizit — adna sa sprobaŭ spynić jaho pracu nad sajtam i biuleteniem.
Siońnia ž Siarhiej Panamaroŭ vyviesiŭ nad svaim domam bieł-čyrvona-bieły ściah u znak salidarnaści ź siabrami hramadzianskaj kampanii «Havary praŭdu».
