Alaksandr Milinkievič raspačaŭ prezidenckuju kampaniju. Lider Ruchu za Svabodu abvieściŭ ab novym prezidenckim pachodzie ŭ hateli «Jeŭropa».
Ruch za Svabodu padtrymlivaje svajho lidera.
Z žonkaj Inaj.
Apošnija padrychtavańni.
Milinkievič žorstka krytykuje vyniki 16-hadovaha kiravańnia Łukašenki.
Namieśnik staršyni Ruchu za Svabodu Juraś Hubarevič.
Viktar Karniajenka vioŭ sustreču.
Hadzińnik kandydata.
Na prezientacyju sabrałasia poŭnaja zała.
Pierad tym, jak zrabić adpaviednuju zajavu dla žurnalistaŭ, palityk naviedaŭ pravasłaŭnuju carkvu i katalicki kaścioł. Dobra, što chramy abiedźviuch kanfiesij znachodziacca pobač z hatelem «Jeŭropa», na siomym paviersie jakoha i rabiŭsia start kampanii.
Pierad uvachodam u zału Alaksandr Milinkievič razam z žonkaj Inaj Kulej asabista vitaŭ usich haściej. Na ekranie tym časam demanstravalisia fotakadry Milinkieviča padčas minułaj prezidenckaj kampanii, a taksama z sustreč ź viadomymi jeŭrapiejskimi palitykami.
Na prezientacyju sabraŭsia, kali nie ŭvieś, to značnaja častka apazicyjnaha palityčnaha bamondu. Pryjechali aktyvisty z rehijonaŭ, što, peŭna, buduć uznačalvać štaby Milinkieviča. Navat Uładzimir Niaklajeŭ siadzieŭ dzieści hłyboka na kamčatcy razam ź fiłosafam Valancinam Akudovičam.
U prezidyumie ž Milinkieviča akružali jahonyja namieśniki. Pa pravuju ruku siadzieŭ Viktar Karniajenka, pa levuju — Juraś Hubarevič.
Mienavita Karniajenka i abviaściŭ ab starcie kampanii Alaksandra Milinkieviča. Jon u kamplimientarnaj formie pieraličyŭ usie mocnyja baki kandydata. «Hetaje rašeńnie nie jość niečakanym. Paśla minułych prezidenckich vybaraŭ Milinkievič zastavaŭsia ŭ palitycy. Za hety čas jon pravioŭ bolš za 150 sustreč, u 70 haradach krainy. Mała chto z ajčynnych palitykaŭ maje takija pośpiechi ŭ jeŭrapiejskich krainach», — skazaŭ V.Karniajenka.
Taksama jon nahadaŭ pra adukacyjnuju prahramu imia Kastusia Kalinoŭskaha jak zasłuhu Milinkieviča, inšyja prajekty. «Heta dziejazdolny palityk, jaki akramia žadańnia, maje jašče i dośvied», — zakončyŭ mini‑pramovu Karniajenka.
«Ja pryniaŭ rašeńnie bałatavacca. Heta vielmi adkaznaje rašeńnie. Ja nie śpiašaŭsia ź im. Ale ciapier ja adčuvaju siłu, jość dośvied, jość vola», — pačaŭ vystup Milinkievič.
Svajo rašeńnie vyłučacca jon abhruntavaŭ adkaznaściu pierad svaimi prodkami, pierad dziećmi, a ŭ pieršuju čarhu pierad unučkaj Maryjkaj. «Jana maja najbolšaja matyvacyja. Ja nie chaču, kab Maša padyšła da mianie sa słovami: «Dzied, ja chaču źjechać z krainy, bo nie baču tut pierśpiektyŭ».
Milinkievič kaža, što ŭ jahonuju kamandu sabrany vydatnyja ludzi. I heta nie tolki apazicyjnyja aktyvisty, ale jość i ludzi, što pracujuć va ŭładzie. «Za piać hadoŭ my budziem u stanie pravieści asnoŭnyja reformy ŭ krainie», — zaznačyŭ palityk.
Potym Milinkievič pačaŭ ahučvać asnoŭnyja tezisy svajoj pieradvybarčaj kampanii. Najpierš jon paabiacaŭ viarnucca da kanstytucyi 1994 hoda, pravieści dakładny padzieł ułady.
Ekanamičnyja reformy Milinkievič prapanoŭvaje realizoŭvać na estonski manier. Davać bolšuju svabodu maładym ekanamistam, palitykam. Asnoŭnymi jakaściami biełarusaŭ, jakija dapamohuć heta zrabić byli nazvanyja pracavitaść i adukavanaść.
Milinkievič vystupaje za ŭstupleńnie Biełarusi ŭ ES. Na jahonuju dumku, «my možam uvajści chutka». Što da NATO, to lepš zastavacca niejtralnaj krainaj, ličyć palityk.
«U nas stratehija tolki pieramohi. Ułada musić ličyć hałasy razam z nami. Kali hetaha nie budzie, to vynik vybaraŭ vyrašycca na vulicy», — zaznačyŭ A.Milinkievič.
Zdałosia, što pramova była krychu zaciahnutaj. Hości paśpieli ŭžo zhubić cikavaść da pramoŭcy, a Milinkievič niečym niečakanym i vostrym nie moh viarnuć hetuju cikavaść. Heta była roŭnaja pramova ab usich vyhodach demakratyi, ale «razynki» joj usio ž nie chapała. Nijakich ukołaŭ i špilek u adras svaich kankurentaŭ na vybarach nie prahučała.
Kali ŭ Milinkieviča zapytalisia, na kaho jon raźličvaje, to pačułasia ŭ adkaz, što na Biełaruski niezaležnicki błok. «Partyja BCHD usio bolš kaža, što nam nie treba iści ŭ Jeŭropu, bo tam nie ŭsio dobra z maralnymi kaštoŭnaściami. Heta ich vybar, ale treba rabić hieapalityčny vybar», — adznačyŭ A.Milinkievič.
Palityk vystupaje za adzinaha kandydata, ale kali jon nasamreč budzie najlepšym, a nie tak jak było ŭ 2001 hodzie. «Kali budzie lepšy kandydat, to ja hatovy stać pobač».
Abciakalnym byŭ adkaz Milinkieviča na pytańnie ź jakoj metaj jon zaklikaje ludziej na vulicu, kab brać uładu siłavym šlacham, ci prosta pakazać jak nas šmat. «Pieramahać treba ŭ hałovach ludziej, — pačaŭ palityk z rytoryki viadomaj jašče ź minułaj prezidenckaj kampanii. — Ludzi pavinny pieramahać strach. Ludzi vyjduć na vulicy, kab prymusić CVK pravieści spraviadlivyja vybary».
Start kampanii byŭ dadzieny dosyć roŭna. Praŭda, ničoha novaha ad Milinkieviča aŭdytoryja nie pačuła. Ale da vybaraŭ zastajecca jašče bolš za paŭhoda.
