Pasolstva ZŠA zaklikaje biełaruskija ŭłady «adkryta i niepraduziata» rasśledavać vypadki parušeńniaŭ padčas vybarčaj kampanii pa vybarach u miascovyja saviety.
U kamientary BiełaPAN pres‑słužba amierykanskaj dypmisii adznačyli, što «nakolki viadoma pasolstvu, paviedamleńni pra parušeńni pastupali jak u dzień vybaraŭ, tak i padčas padrychtoŭki da vybaraŭ». U pryvatnaści, paviedamleńni pra «zapałochvańnie i nacisk na niezaležnych kandydataŭ, abmiežavańni na praviadzieńnie pieradvybarnaj kampanii, złoŭžyvańni padčas daterminovaha hałasavańnia i padliku hałasoŭ, a taksama pra abmiežavańnie dziejnaści miascovych i mižnarodnych naziralnikaŭ».
«Kali hetyja skarhi buduć abhruntavanyja, to miascovyja vybary stanuć upuščanaju mahčymaściu dla Biełarusi i jaje naroda», — zajaŭlajuć u pasolstvie ZŠA.
U dypmisii nahadali pra kanstruktyŭnaje rašeńnie biełaruskaha kiraŭnictva zaprasić viasnoj 2009 hoda pradstaŭnikoŭ Biuro ABSIE, hramadskich arhanizacyj i palityčnych partyj da abmierkavańnia pytańnia nakont taho, jak nablizić vybarčaje zakanadaŭstva Biełarusi da mižnarodnych i jeŭrapiejskich standartaŭ.
«Na žal, heta supracoŭnictva spyniłasia hetak ža niečakana, jak i pačałosia. Vybarčy kodeks byŭ pryniaty bieź jakoha‑niebudź papiaredniaha hramadskaha abmierkavańnia», — adznačyli ŭ pasolstvie ZŠA.
Amierykanskija dypłamaty vykazali nadzieju na toje, što «kanstruktyŭny dyjałoh, pačaty viasnoj 2009 hoda, budzie adnoŭleny i projdzie adkryta i prazrysta pierad praviadzieńniem nastupnych vybaraŭ».
