Alaksandr Łukašenka ličyć, što ŭ krainie nie varta zabaraniać ihralny biźnies, a ŭzmacnić dziaržaŭny kantrol za hetaj śfieraj dziejnaści. Takoje mierkavańnie jon vykazaŭ siońnia na naradzie, na jakoj abmiarkoŭvałasia kancepcyja raźvićcia ihralnaha biźniesu ŭ Biełarusi.
«Pry pravilnym padychodzie ihralny biźnies moža i pavinien stać dadatkovaj krynicaj papaŭnieńnia biudžetu za košt padatkaŭ, sadziejničać stvareńniu novych rabočych miesc, pryciahnieńniu turystaŭ i inviestycyj u našu krainu, — skazaŭ kiraŭnik dziaržavy. — Na fonie źmianieńniaŭ u rasijskim i ŭkrainskim zakanadaŭstvach u nas jość usie šancy vyjści na viadučyja pazicyi ŭ hetaj tonkaj, važnaj śfiery. Dziejničać tut nieabchodna vielmi aściarožna, pradumana i daśviedčana, z karyściu dla krainy».
Alaksandr Łukašenka padkreśliŭ, što taki śpiecyfičny vid dziejnaści ŭ sučasnych umovach patrabuje asablivaj uvahi. U śviecie isnujuć roznyja padychody da jaho arhanizacyi i funkcyjanavańnia. U adnych krainach hety biźnies padtrymlivajuć, u inšych — zabaraniajuć, u trecich — abmiažoŭvajuć i kantralujuć.
Kiraŭnik dziaržavy adznačyŭ, što, jak pakazvaje vopyt Rasii i Ukrainy, adsutnaść uzvažanaj palityki z boku dziaržavy ŭ adnosinach da ihralnaha biźniesu pryvodzić praktyčna da jaho poŭnaj zabarony. A heta sadziejničaje tamu, što vysokadachodny biźnies idzie ŭ cień, stanovicca zdabyčaj kryminalnych kołaŭ, prynosiačy škodu hramadstvu. «Z historyi my pierakanalisia, što zabarony ničoha, akramia škody, nie dajuć, — skazaŭ Alaksandr Łukašenka. —
Tamu zabaraniać naohuł, akramia vyklučna škodnych dla dziaržavy napramkaŭ dziejnaści,
nie varta, treba razumna kantralavać i pry nieabchodnaści zmahacca ź niehatyŭnymi źjavami taho abo inšaha napramku dziejnaści».
«Heta ja havaru dla tych, chto zaŭtra ŭźnimie hvałt ab tym, što my ledź ci nie ŭvieś kryminalny śviet SND źbiarom u Biełarusi», — dadaŭ prezident. «Usio ŭ nas budzie narmalna, kali tyja, chto pryznačany kantralavać i adkazvać za hety vid dziejnaści, — dziaržaŭnyja słužačyja, — sami nie ŭlezuć tudy pa vušy i tym samym nie razvalać hety vid dziejnaści i nie kryminalizujuć jaho, — padkreśliŭ Alaksandr Łukašenka. — Kali dziaržaŭnyja słužačyja buduć zajmać prystojnuju pazicyju, to ŭsio budzie narmalna». Kiraŭnik dziaržavy taksama zaŭvažyŭ, što
hetaha «nie było ni ŭ Rasii, ni va Ukrainie», dzie roznyja hrupoŭki padzialili hety vid dziejnaści.
Alaksandr Łukašenka nahadaŭ, što amal paŭhoda tamu daŭ daručeńnie ŭradu sumiesna ź inšymi zacikaŭlenymi viedamstvami raspracavać napramki raźvićcia ihralnaha biźniesu ŭ Biełarusi, pryčym z ulikam jak ekanamičnych, tak i sacyjalnych faktaraŭ. Vynikam hetaj raboty stała Kancepcyja raźvićcia ihralnaha biźniesu ŭ krainie. Na dumku ŭrada, jana praduhledžvaje ŭzmacnieńnie dziaržaŭnaha kantrolu, vyklučaje mahčymaść udziełu ŭ hetaj śfiery kryminalnych struktur. Akramia taho, daść mahčymaść istotna pavialičyć padatkovyja pastupleńni ŭ biudžet, a taksama abaronić narod ad papadańnia ŭ ihralnuju zaležnaść ad «adnarukich bandytaŭ».
Kiraŭnik dziaržavy adznačyŭ, što ŭ chodzie siońniašniaha abmierkavańnia treba budzie vyśvietlić, nakolki ŭniesienaja kancepcyja adpaviadaje takim namieram.
Prezident padkreśliŭ, što nieabchodna pryniać maksimalna ŭzvažanaje rašeńnie, kab dziejnaść u hetaj śfiery była kamfortnaj jak dla kamiercyjnych struktur, tak i dla dziaržavy i pry hetym nie stvarała niehatyŭnych sacyjalnych nastupstvaŭ dla hramadzian.
