Były prezident Francyi Žak Šyrak adkazaŭ admovaj na prapanovu premjer‑ministra Rasii Uładzimira Pucina zaniać pasadu kiraŭnika prajekta pa budaŭnictvie hazapravodu «Paŭdniovy patok» (South Stream).
Pra heta piša francuzskaja hazieta Le Nouvel Observateur. Realizacyjaj «Paŭdniovaha patoku» zajmajucca rasijski «Hazprom» sumiesna ź italjanskaj Eni i francuzskaj EdF.
Pavodle źviestak vydańnia, Šyrak vyrašyŭ zasiarodzicca na pracy ŭłasnaha fondu i nie płanuje pakul pracavać u pryvatnaj kampanii.
«Paŭdniovy patok» — adzin z asnoŭnych hazatranspartnych prajektaŭ Rasii, jaki budujecca dla transparciroŭki hazu ŭ Jeŭropu ŭ abychod Ukrainy. Jaho maršrut pavinien prajści z Rasiei ŭ Baŭharyju pa dnie Čornaha mora, a zatym adna častka budzie prakładziena praz Hrecyju pa dnie Adryjatyki na poŭdzień Italii, a druhaja — praź Sierbiju i Vienhryju ŭ Aŭstryju.
Rasijski kancern raniej nieadnarazova pryciahvaŭ u svaje prajekty viadomych palitykaŭ. U pryvatnaści, były kancler FRH Hierchard Šroder ŭznačalvaje kamitet akcyjanieraŭ kampanii Nord Stream, jakaja viadzie hazapravod pa dnie Bałtyjskaha mora ŭ Niamieččynu.
