Sajman Charys vitaje žurnalistaŭ paśla abrańnia jaho premjeram Irłandyi. Fota: Peter Morrison / AP
Heta pryznačeńnie adbyłosia paśla aficyjnaj adstaŭki jaho papiarednika Lea Varadkara. Charys skazaŭ, što ŭčorašni dzień staŭ dla jaho «zusim asablivym», i paabiacaŭ zrabić usio, kab uznačaleny im kaalicyjny ŭrad pracavaŭ u duchu «adzinstva, supracoŭnictva i ŭzajemnaj pavahi».
U pieršym ža vystupie paśla abrańnia jon zajaviŭ, što maje namier prykłaści maksimum namahańniaŭ dla taho, kab «apraŭdać akazany jamu davier», paabiacaŭ usialak padtrymlivać «pahadnieńni Vialikaj piatnicy» ab mirnym urehulavańni kanfliktu ŭ Paŭnočnaj Irłandyi i zaklikaŭ svaich suhramadzian «nie paddavacca piesimizmu».
Partyja Fine Heł, jakuju Charys uznačaliŭ paśla adstaŭki Varadkara, uvachodzić u kaalicyju z Respublikanskaj partyjaj Fijana Fajł i Partyjaj zialonych.
Niahledziačy na zakliki apazicyi abviaścić daterminovyja vybary, Charys užo daŭ zrazumieć, što jaho ŭrad maje namier pracavać poŭny termin, a ŭsieahulnyja vybary projduć, jak i było zapłanavana, u sakaviku nastupnaha hoda.
«Cišak» z «Tyktoka»
U 2012 hodzie, na pasiadžeńni adnaho z kamitetaŭ irłandskaha parłamienta, atmaśfiera nakaliłasia da takoj stupieni, što niekatoryja vystupy pieraraśli ŭ chrypłyja kryki.
Niečakana praz usieahulny chaos prarvaŭsia spakojny hołas: «Rassłabciesia, — skazaŭ 25-hadovy Charys, — davajcie ŭsio heta spynim».
Hetaja zajava dobra źbiantežyła jaho starejšych kalehaŭ, bo Charys užyŭ dziejasłoŭ «chillax» — adnosna niadaŭnaje słova, składzienaje z chill out (supakojsia) i relax (rassłabsia).
Niekatoryja źbiantežanyja parłamientaryi, jakija zmoŭkli ad ździŭleńnia, navat zadalisia ŭsłych pytańniem, ci nie źjaŭlajecca słova chillax łacinskim. Zdareńnie trapiła ŭ hazietnyja zahałoŭki, a sam Charys skazaŭ u intervju adnoj z haziet, što ŭsie maładyja ludzi viedajuć, što heta za słova, jak by namiaknuŭšy, što jaho kaleham varta było b iści ŭ nahu z časam.
Adnak sam jon za minułyja z hetaha dnia 12 hadoŭ rassłablacca tak i nie navučyŭsia, i, pa ahulnym mierkavańni, prahnuŭ zaniać najvyšejšuju palityčnuju pasadu ŭ krainie jašče ŭ padletkavym uzroście.
Jon vydatna viedaje, jak vykarystoŭvać sacsietku ŭ svaich metach, za što i atrymaŭ mianušku «Cišak» z «Tyktoka». (na helskaj — druhoj aficyjnaj movie krainy — premjer-ministr Irłandyi nazyvajecca Taoiseach (vymaŭlajecca «cišak»)).
Imklivy šlach navierch
Ciapierašni premjer Irłandyi naradziŭsia ŭ biednaj siamji. Jaho baćka byŭ taksistam, a maci pracavała pamočnikam nastaŭnika ŭ škole dla dziaciej z prablemami ŭ raźvićci.
Adzin ź ministraŭ kabinieta, Nił Ryčmand, jaki asabista viedaje Charysa voś užo na praciahu 20 hadoŭ, skazaŭ, što jašče ŭ škole Charys byŭ zaŭziatym udzielnikam debataŭ, napisaŭ u 13 hadoŭ pjesu i z samaha rańniaha ŭzrostu byŭ sapraŭdnym pracaholikam.
«Pracoŭnaj etycy jaho navučyli baćki: pracavać, pracavać i pracavać. Sajman litaralna apantany palitykaj: zaŭsiody vielmi śpiašajecca, vielmi chutka chodzić i vielmi chutka havoryć», — raspavioŭ Ryčmand.
Možna skazać, što palityčnaje žyćcio Charysa pačałosia ŭ 15 hadoŭ. U jaho małodšaha brata sindrom Aśpierhiera (razład aŭtyčnaha śpiektru), i Charys staŭ aktyŭna łabiravać palitykaŭ dla taho, kab palepšyć umovy lačeńnia i dapamohi takim dzieciam.
U 2009 hodzie jon byŭ abrany ŭ Radu hrafstva Uikłou, atrymaŭšy rekordnuju kolkaść hałasoŭ vybarščykaŭ. Da svajoj pracy budučy premjer staviŭsia vielmi surjozna i staranna i nie hrebavaŭ asabista hrukacca ŭ dźviery hramadzian, kab lepiej daviedacca, što ich bolš za ŭsio chvaluje.
U 2011 hodzie jon staŭ samym maładym členam parłamienta, a ŭ 2016 užo zajmaŭ pasadu ministra achovy zdaroŭja. Heta pryznačeńnie siniekuraj nie było i chutčej mahło pryvieści da zakančeńnia palityčnaj karjery, a nie da jaje prasoŭvańni.
Charysu ŭdałosia acaleć, ale nie pierastroić achovu zdaroŭja. Na hetaj pasadzie jon kuryravaŭ irłandski refierendum za admienu zabarony na aborty. Praciŭniki zabarony pieramahli, atrymaŭšy dźvie traciny hałasoŭ vybarščykaŭ, jakija ŭziali ŭdzieł u hałasavańni.
Akramia taho, na jaho dolu pryjšoŭsia i pačatak pandemii Covid -19.
U 2020 jon staŭ ministram vyšejšaj adukacyi (značna bolš spakojnaja pasada) i prykłaŭ niamała namahańniaŭ da taho, kab pryciahnuć na svoj bok deputataŭ ad svajoj partyi i jaje aktyvistaŭ.
U 2022 hodzie jon vitaŭ zvarot prezidenta Ukrainy Uładzimira Zialenskaha da irłandskich studentaŭ.
«Choć Irłandyja źjaŭlajecca niejtralnaj krainaj, my nie źjaŭlajemsia i nie možam dazvolić sabie być maralna ci palityčna niejtralnymi ŭ hetym pytańni. Voś čamu my praciahniem padtrymlivać sankcyi ES suprać Rasii, kab pryciahnuć jaje lidaraŭ da adkaznaści za ich dziejańni, i praz naša siabroŭstva ŭ Radzie Biaśpieki AAN praciahniem zaklikać ich nieadkładna spynić vajnu va Ukrainie», — zajaviŭ Charys, padtrymaŭšy tym samym palityku Lea Varadkara, jaki sam pryjazdžaŭ u Kijeŭ.
Irłandyja, kraina z nasielnictvam u krychu bolš za 5 miljonaŭ čałaviek, pryniała bolš za 100 tysiač ukrainskich biežancaŭ.
Čytajcie taksama:
Siostry Śviata-Jelisaviecinskaha manastyra pryjechali ŭ Irłandyju zarabić «na prajekty»
Upieršyniu pradstaŭnik nacyjanalistaŭ uznačalić urad Paŭnočnaj Irłandyi
