Ilustracyjnaja vyjava. Fota: «Naša Niva»
Jak paviedamlaje partał ZME Science, navukoŭcy z ZŠA raspracavali preparat, jaki daje arhanizmu efiekt ad fizičnych praktykavańniaŭ bieź nieabchodnaści zajmacca sportam. Raspracoŭka preparata doŭžyłasia bolš za 10 hadoŭ, a sam jon byŭ paśpiachova pratestavany na hryzunach.
«U asnovie preparata lažyć navastvoranaje bijachimičnaje złučeńnie pad kodavaj nazvaj SLU-PP-332, jakoje pryvodzić u dziejańnie ŭsie try vidy białkoŭ ERR (ekstrahien — źviazanyja receptary). Hetyja białki ŭ zvyčajnych umovach aktyvujucca tolki padčas fizičnych praktykavańniaŭ i adyhryvajuć asnoŭnuju rolu ŭ kiravańni reakcyjaj arhanizma na fizičnuju nahruzku i palapšeńni mietabalizmu», — raskazali partału ZME Science raspracoŭščyki preparata.
Navukoŭcy adznačyli, što efiekt ad preparata «mocna nahadvaje» efiekt ad zaniatkaŭ sportam, i što heta adkryvaje novyja mahčymaści dla zmahańnia z atłuścieńniem, sardečnaj niedastatkovaściu, źnižeńniem funkcyj nyrak i navat z chvarobaj Alchiejmiera.
U budučyni preparat płanujecca vypuskać u zvyčajnych tabletkach.
«Adnak heta nie zamienić usie pieravahi ad fizičnaj aktyŭnaści i sportu, bo preparat lepš za ŭsio dziejničaje mienavita ŭ sukupnaści ź fizičnymi praktykavańniami, jak uzmacnialnik.
Da taho ž preparat stvaraŭsia nami ŭ pieršuju čarhu dla tych, chto nie maje fizičnaj mahčymaści zajmacca sportam», — padahulnili navukoŭcy.
Čytajcie taksama:
U ZŠA injekcyi dla pachudańnia aficyjna ŭchvalili ŭ jakaści lekaŭ pry sardečnych zachvorvańniach
Ultraapracavanyja pradukty mohuć upłyvać nie tolki na naša cieła, ale i na mozh — navukoŭcy
