«Što nastupnym mianie zachaplać pačnie, pra toje dalej zdymać i budziem»
— Pieršaje pytańnie — dla tych, chto z vami jašče nie znajomy. Chto taki GomZik? Jaki ŭ vas vopyt u hiejmdevie/prahramavańni, i čamu vy vyrašyli akramia ahladaŭ hulniaŭ jašče i pakazvać, jak hetyja samyja hulni robiacca?
— Alaksiej aka Homzik Homza prahramuje ciaham, moža, hadoŭ z 13-ci, sa škoły jašče raspačaŭ. U 7-m kłasie ja napisaŭ pieršuju nievialičkuju hulniu z «vydranymi» madelkami z usim viadomaj CS (1.6 na toj momant,) dzie treba było stralać pa kubach.
Zaŭsiody cikavili hulni i jak jany stvoranyja, ale hrošyki ja zarablaju, prahramujučy bekendy. U volny ad pracy čas, byvaje, natchniajusia i sprabuju napisać niejkuju svaju hulniu, ale zvyčajna dalej za nakidy nie dachodziła.
Niekalki miesiacaŭ tamu ja nabyŭ devajs, stvorany dla emulacyi starych hulniaŭ. Jon padaŭsia mnie takim zručnym dla hetaj spravy, što mnie znoŭ strelnuła dumka ŭ hałavu — a ci dam ja rady svaju hulniu na joj zapuścić?
Paśla nievialičkaha huhleńnia daviedaŭsia, što jość takaja štuka jak PICO-8. Što heta davoli chutka i prosta, i ŭsio, što treba, kab zrabić nievialičkuju hulniu, užo jość u asiarodździ raspracoŭki, jakaja ŭbudavanaja ŭ sam pakiet PICO-8. Što jość padabienstva z užo viadomym mnie ruchavikom love2d, i nie treba vyvučać usie hetyja šejdery, kab atrymać niejki vynik.
I tak mnie ŭsio ŭ hetym pradukcie spadabałasia, jon tak natchniaje na toje, kab vučycca i vučyć, što dumka stvaryć kanał nie prymusiła siabie doŭha čakać.
— Jakija videa vy płanujecie vykładvać na kanale? Moža, kožny vypusk budzie pryśviečany jakoj-niebudź adnoj kłasičnaj hulni?
— Kankretnaha płana niama, pracujem pa abstavinach. Płanuju zrabić niekalki prajektaŭ na PICO-8 u farmacie «prahramuj sa mnoj razam». Moža, niekalki vidosaŭ nakštałt «voś vam cikavinka, pra jakuju vy mahli nie daviedacca samastojna».
Što dalej, pakul adkazać nie mahu, zaŭsiody chaciełasia zrabić niejki bolš «darosły» prajekt na bolš «darosłych» technałohijach i ruchavikach. Ale adčuvańnie, byccam adnamu čałavieku takija rečy ŭ sučasnym śviecie składana paciahnuć. Treba i madelavać dobra, i muzyku i huki stvarać, niejki art– i hiejmdyzajn rabić, dy jašče i prahramavać dobra. Tamu historyi nakštałt «sam u adzin tvar zrabiŭ niejki bambičny prajekt» mianie zaŭsiody natchniajuć, ale kožny raz ja nie razumieju — jak. Peŭna, što nastupnym mianie zachaplać pačnie, pra toje dalej zdymać i budziem.
— Chto, jak vy dumajecie, vašaja metavaja aŭdytoryja?
— Na hetaje pytańnie mnie zaŭsiody składana adkazvać. Zdajecca, z adnaho boku — prahramisty, jakija, jak i ja, pracujuć u inšaj śfiery, ale zaŭsiody cikavilisia hulniami z «navukovaha» punktu hledžańnia. Ź inšaha boku, hetyja videa padyduć i niejkim pačatkoŭcam. Chaj ja i nie sprabuju navučyć movie prahramavańnia, ale ŭsio adno, chočaš nie chočaš, a ŭ niekatoryja detali zalezieš.
PICO-8 sam pa sabie taki pradukt, jaki ŭražvaje ciabie amal jak dzicia. Tamu jość adčuvańnie, što taki kantent moh by padyści navat padletkam. Ale tut ja ŭžo nie ŭpeŭnieny, bo sprava nie tolki ŭ infarmacyi, jakuju ty raspaviadaješ. Vielmi važna i jak ty heta robiš.
To-bok, ja nie kažu, što heta nie važna darosłamu — viadoma, važna! Ale kali darosły viedaje, navošta jon heta hladzić, to lohka moža ciarpieć niejkija chiby. A voś utrymać fokus uvahi dziciaci — heta jašče adna vialikaja zadača (kali ty chočaš aryjentavacca na ich). Tak što dumaju, maja metavaja aŭdytoryja — bolš darosłyja ludzi. Sam ja nie adčuvaju, što mahu davać infarmacyju pa-sapraŭdnamu pryhoža i zachaplalna.
«Biełarusy, na žal, žyvuć u rasijskaj infaprastory, i ja baču ŭ hetym šmat kiepskaha»
— Časam pad našymi navinami pra biełaruskamoŭnyja prajekty dla ajcišnikaŭ pišuć — «navošta heta, kali možna pa-anhlijsku». Što vy dumajecie nakont hetaha? Ci treba nam bolej kantentu dla ajcišnikaŭ na biełaruskaj?
— Viadoma, možna i pa-anhlijsku. Bolš za toje, u anhlijskim siektary internetu zaŭždy budzie bolš aktualnaja, bolš dakładnaja i daskanałaja infarmacyja pa našaj z vami temie.
Ale ž sam ja biełarus, razmaŭlaju biełaruskaj movaj (tak, navat ź siabrami i navat na pracy, kali nie anhlijskaj), niahledziačy na toje, što ros ja ŭ rasiejskamoŭnym atačeńni.
Biełarusy, na žal, žyvuć u rasijskaj infaprastory, i ŭłasna ja baču ŭ hetym šmat kiepskaha (niachaj i bačyć ja heta pačaŭ nie tak daŭno). Peŭna, niekatoryja kamientatary skažuć, što vałodańnie rasijskaj movaj — heta dostup da šmatlikich krynic ź infarmacyjaj i hetak dalej. Adnak u hetym vypadku mahu skazać, što anhlijskaja mova daje dostup da jašče bolš šmatlikich krynic, ale, nakolki ja mahu nazirać, nie toje kab adsotak biełarusaŭ, jakija viedajuć anhlijskuju, imknuŭsia da 100. Tamu arhumient hety krychu kryvadušny, na moj pohlad.
Maja mara — što biełarus budzie karystacca biełaruskaj pa zmoŭčańni. Vidavočna, heta składany praces, jaki nie nadta zaležyć ad amataraŭ nakštałt mianie. Ale na vypadak, kali źjavicca popyt na kantent biełaruskaj, u nas budzie što prapanavać. A ciapier ja heta rablu, bo… prosta padabajecca!
Što tyčycca bolš kantentu dla ajcišnikaŭ, tut ja adkažu prosta: bolš kantentu biełaruskaj movaj, choć jakoha, nie abaviazkova dla ajcišnikaŭ — heta supier, heta nam treba.
— Jakoha naohuł kantentu nie chapaje na biełaruskim YouTube? U vas naohuł jość «kankurenty» ŭ vašaj śfiery?
— Och, dy šmat čaho nie chapaje. Nie toje kab ja amatar takoha kantentu, ale roznyja tam treš-šou vielmi papularnyja ŭ śviecie. Reakcyi na takija treš-šou taksama papularnyja. A ŭ biełaruskim YouTubie ničoha takoha byccam i niama.
Viadoma, heta nie adziny niedachop, šmat jašče čaho niama. Dazvolu sabie pierafrazavać, užo dakładna nie pomniu, chto heta skazaŭ — što biełaruskaja mova tady budzie žyvoj, kali ty ź jaje dapamohaj i kvitok u opieru nabyć možaš, i kali ŭ ciabie stały naviedvalnik kram z samaha ranku budzie drobiaź prasić. Z tym sensam, što ŭ idealnym śviecie biełaruskaja mova prasiakaje ŭsio biełaruskaje hramadstva, niezaležna ad miesca i abstavin.
Svaich pramych kankurentaŭ ja nie viedaju. Ale kožny raz, kali zapuskajecca niejki novy kanał albo źjaŭlajecca novy strymier, ja radujusia jak dzicia i abaviazkova sprabuju raspaŭsiudzić takuju infarmacyju pa svaich kanałach. Bo praz kankurencyju zvyčajna pieramahaje toj, chto źjaŭlajecca spažyŭcom praduktu ci pasłuhi. A mianie heta nie moža nie radavać.
Čytajcie taksama:
Dzie znachodzicca Sianno? Biełarusy stvaryli bot, jaki dapamoža lepiej vyvučyć hieahrafiju radzimy
