U budynku hetaha muzieja, pa adrasie Zavalnaja, 4 (Pylimo, 4) adkryjecca taksama muziej viadomaha mastaka XX stahodździa Rafaela Chvolesa, śviedki źniščeńnia Litoŭskaha Ijerusalima, paviedamlaje Delfi.lt.
Značnuju častku rabot Chvolesa (1913-2002) muzieju padaryli syny mastaka Milij i Alaksandr, jakija žyvuć u Paryžy. Jany pieradali ŭ muziej nie tolki karciny, ale i asabistyja rečy svajho baćki, jaho knihi.
Rafael Chvoles naradziŭsia ŭ Vilni ŭ 1913 hodzie, dzie i vučyŭsia. Paśla savieckaj akupacyi horada ŭ 1939 hodzie vyjechaŭ u Vilejku, dzie pracavaŭ dyrektaram Škoły vyjaŭlenčaha mastactva pry Domie narodnaj tvorčaści.
Rafael Chvoles. Fota: Wikimedia Commons
U červieni 1941 hoda Chvoles znachodziŭsia ŭ Minsku, adtul paśpieŭ evakujavacca ŭ Rasiju, adnak jaho ciažarnaja žonka Marjana była schoplenaja nacystami pa darozie ź Vilni ŭ Minsk i zahinuła. U Vilni padčas vajny zahinuli jaho baćki i try siastry, jašče dźvium siostram udałosia vyžyć.
Chvoles pa viartańni pisaŭ paślavajennuju Vilniu. U 1945-1947 hh. stvaryŭ samuju viadomuju sieryju karcin «Vilenskaje hieta». Jaho karciny išli nasupierak ź ideałohijaj stalinskaha pieryjadu. U Vilni nie było nivodnaj vystavy jaho karcin.
Rafael Chvoles z druhoj žonkaj i dvuma synami ŭ 1959 h. emihravaŭ u Polšču. Navat u emihracyi jon nie pierastavaŭ pisać Vilniu. Paśla 1967 h. siamja źjechała z Varšavy ŭ Paryž. U Paryžy jon žyŭ da samaj śmierci ŭ 2002 hodzie.
