Fota: Minsk-Naviny
Pa-siamiejnamu i ź siabrami
Darja adznačała Novy hod u kole siamji, jeździła ŭ hości da baćkoŭ. Tamu asnoŭnyja traty pa zakupcy praduktaŭ dla śviatočnaha stała lahli na plečy mamy i taty. Adnak padličyć vydatki dziaŭčynie ŭsio ž udałosia, i vynik jaje mocna ździviŭ.
«Nievialikija padarunki plus stoł na traich darosłych i adno dzicia paciahnuli na 600 rubloŭ. Kali ščyra, ja ŭ šoku», — napisała Darja.
Ździŭleny vynikami padlikaŭ akazaŭsia i Illa. Jon adznačaŭ śviata ŭdvaich ź dziaŭčynaj. I za ŭmieranaje zastolle z haračym, aliŭje, buterbrodami ź ikroj i ałkaholem addaŭ 150 rubloŭ.
«Da hetaha na pracy pravodzili Tajemnaha Santu — 30 rubloŭ, plus viačorki z kalehami — taksama 30 rubloŭ», — pieraličvaje małady čałaviek.
Padarunki baćkam — simvaličnyja. Abyšlisia ŭ 100 rubloŭ. Ź dziaŭčynaj damovilisia krychu adpačyć — zamiest prezientaŭ schadzili ŭ SPA. Dla hetaha abnavili kupalnyja rečy. U sumie vyjšła na 250 rubloŭ. Razam: 560 rubloŭ.
«A raniej zdavałasia, što vydatkoŭvaŭ mienš. Nie zadumvaŭsia pra heta», — adznačyŭ chłopiec.
U dźviuch krainach
Siarhiej (imia źmienienaje na prośbu hieroja) raspavioŭ, što adznačyŭ Novy hod u dvuch haradach dźviuch roznych krain: u Hrodnie i Biełastoku.
U biełaruskim abłasnym centry jon zvadziŭ dzicia ŭ dramteatr na navahodni pakaz. Vidovišča abyšłosia ŭ 24 rubli. A voś kupla suvieniraŭ na haradskim kirmašy i viačera ŭ restaranie na «piešachodcy» — u 100 rubloŭ.
U jakaści padarunka schadzili z žonkaj na masaž, jaki na dvaich paciahnuŭ na 200 rubloŭ.
U apošni dzień 2023-ha para zładziła viačeru ŭ restaranie Biełastoka. Da asnoŭnych straŭ zamovili i vino miascovaj vytvorčaści. Razam u čeku atrymałasia 230 złotych (185 rubloŭ).
«Tradycyjna Novy hod my nie adznačajem: nie robim vielizarny stoł doma, nie hatujem vialikuju kolkaść sałat i inšaj ježy», — raspavioŭ Siarhiej.
U vyniku zimovyja śviaty abyšlisia siamji krychu bolš čym u 500 rubloŭ.
Čatyrochznačnyja traty
Volha ŭ pryncypie viadzie ŭlik vydatkaŭ i dachodaŭ. Ale niekatoryja katehoryi vielmi abstraktnyja, kaža dziaŭčyna.
«Naprykład, u hrafu «pradukty» traplajuć nie tolki vydatki dla navahodniaha stała, a vydatki za ŭvieś śniežań. Tamu ŭsie padliki prykładnyja», — tłumačyć Volha.
Pieršaje, što jana ŭličvaje, — padarunki. Ich dziaŭčyna časam kuplaje za niekalki miesiacaŭ da Novaha hoda, «kab nie było tak baluča ad vielizarnych trat u śniežni». Tak što niekatoruju častku jana padrychtavała jašče ŭvosień, inšuju — niepasredna napiaredadni Novaha hoda.
«Jašče adna asablivaść niekalkich apošnich hadoŭ — šmat siabroŭ i svajakoŭ, jakija źjechali. Padarunkami abmieńvajemsia nie z usimi i tolki tady, kali znachodzim mahčymaść pieradać prezient praz kahości. U nas pryncyp: hałoŭnaje nie padarunak, a zachavać znosiny i blizkaść, niahledziačy na adlehłaść u tysiačy kiłamietraŭ», — dzielicca Volha.
Ź siabrami i svajakami jana daŭno prytrymlivajecca schiemy sa składańniem wish-listoŭ na peŭnuju sumu. Sioleta limit na košt padarunkaŭ ustalavali ŭ pamiery 30-40 rubloŭ.
Takim čynam, na ŭsie padarunki Volha vydatkavała kala 450—500 rubloŭ. Ale i heta jašče nie ŭsio: navahodni abmien prezientami pakul nie zavieršany.
Vydatki na navahodni stoł padzialili pamiž usimi ŭdzielnikami śviatkavańnia. Volha adkazvała za zakuski. Ź jaje vyjšła 180-200 rubloŭ plus pa butelcy vina i šampanskaha.
Asobny artykuł vydatkaŭ u Volhi — pieradnavahodnija sustrečy z usimi siabrami.
«Heta ludzi z roznych kampanij, tamu śviaty ź imi asobnyja. Na nievialikija zastolli pa hetych vypadkach vydatkavała jašče prykładna 260 rubloŭ z ałkaholem», — dadała dziaŭčyna.
Ahułam vydatki Volhi padčas navahodnich śviataŭ — kala 1000 rubloŭ.
Śviata na miesiačny zarobak
Čarada adznačeńniaŭ u Alaksieja pačałasia z karparatyvu. Na śviata z kalehami vydatkavaŭ 65 rubloŭ.
Na nastupny dzień zakupiŭsia praduktami dla siamiejnaj viačery. Ček «važyŭ» 450 rubloŭ. Zastolle płanavałasia na pieciarych čałaviek.
Adnak samaj zatratnaj častkaj mužčyna nazvaŭ padarunki.
«Baćku padaryŭ nabor prafiesijnych instrumientaŭ za 600 rubloŭ, mamie — robat-pyłasos taksama za 600 rubloŭ. U brata 31 śniežnia dzień naradžeńnia. Jamu prezientavaŭ kampjutar za 500-600 rubloŭ. Siastry (sioleta pajšła ŭ škołu) — smartfon, jaki daŭno abiacaŭ. Hadžet uziaŭ niedarahi, za 300 rubloŭ. Jašče salut na 16 załpaŭ, jaki siabry pryvieźli ź Minska», — pieraličyŭ Alaksiej.
Ahułam małady čałaviek vydatkavaŭ na Novy hod bolš za 2600 rubloŭ. «Atrymlivajecca, heta moj miesiačny zarobak abo nazapašvańni za dva-try miesiacy», — ździŭlajecca Alaksiej.
Jon žyvie adzin i pryznajecca, što hrošy tracić asabliva niama kudy. Tamu zrabić pryjemnaje rodnym — u radaść.
Kala 2000 rubloŭ za zimovyja śviaty vydatkavaŭ i Ihar. Siudy ŭvachodziać traty na prezienty dla kampańjonaŭ i kalehaŭ, karparatyŭ na pracy, a taksama śviatkavańnie 31 śniežnia.
Tak, siamja i siabry Ihara napiaredadni Novaha hoda sabralisia ŭ saunie. Mužčyna ŭsim rodnym i blizkim padrychtavaŭ padarunki, tamu vynikovaja suma vyjšła niemaleńkaja, ale heta našaha hieroja nie źniervavała.
«Śviata šmat nie byvaje. Ščaście pry adkryćci padarunkaŭ pad jełkaj usio akuplaje», — adznačyŭ mužčyna.
Da taho ž u pieryjad tradycyjnych zimovych śviataŭ u siamji Ihara jość jašče dźvie pryjemnyja daty: dzień naradžeńnia jaho i jaho syna.
Na hetyja ŭračystaści Ihar płanuje vydatki ŭ pamiery 500-600 rubloŭ.
Čytajcie taksama:
Jak akuratna skłaści navahodniuju hirlandu, kab pierad nastupnym Novym hodam było lohka razbłytać
Vareńnie z šyšak, advar ź ihołak. Jak dać navahodniaj jalincy druhoje žyćcio?
