Maryna Adamovič i Mikoła Statkievič paśla padačy dakumientaŭ u CVK na rehistracyju inicyjatyŭnaj hrupy na vybarach prezidenta. 15 maja 2020 hoda. Praz 16 dzion, za piać tydniaŭ da vybaraŭ, Mikołu Statkieviča zatrymajuć, a jašče praz paŭtara hoda asudziać na 14 hadoŭ asobaha režymu. Fota: «Naša Niva»
Partyja «Narodnaja hramada» na fonie čutak pra śmierć svajho lidara, palitźniavolenaha Mikałaja Statkieviča zapatrabavała ad «adkaznych asob u Biełarusi nieadkładna arhanizavać» dla jaho spatkańnie z žonkaj Marynaj Adamovič.
Na minułym tydni hałoŭnaja redaktarka «Chartyi'97» Natalla Radzina napisała pra mahčymuju śmierć Mikoły Statkieviča.
Partyja «Narodnaja hramada» patrabuje adkaznych asobaŭ u Biełarusi nieadkładna arhanizavać spatkańnie Maryny Adamovič i Mikoły Statkieviča i abvierhnuć albo padćvierdzić infarmacyju, jakaja tyčycca palityka Mikałaja Statkieviča.
«Zaklikajem biełarusaŭ da praviadzieńnia akcyj salidarnaści z palitviaźniami Biełarusi kala budynkaŭ palityčnych siłaŭ krainy znachodžańnia z metaj pieradačy zakliku kamandy Mikałaja Statkieviča partyi «Narodnaja hramada». Zaklikajem mižnarodnuju supolnaść vystupić z patrabavańniem nieadkładna ad adkaznych asobaŭ u Biełarusi arhanizacyi spatkańnia Maryny Adamovič i Mikałaja Statkieviča. Zaklikajem ŚMI adkazna pastavicca da pracy i dapamahčy davieści patrabavańni partyi Narodnaja Hramada», — havorycca ŭ zajavie partyi.
«Zaklikajem pravaabarončyja arhanizacyi Biełarusi prajavić salidarnaść, zaklikać da nieabchodnaści vyzvaleńnia ŭsich, chto niezakonna ŭtrymlivajecca režymam i davieści realnuju situacyju ab pahrozie dla ludziej, jakija znachodziacca ŭ turmach», — adznačajecca ŭ zvarocie partyi.
Pra Mikołu Statkieviča, jaki adbyvaje pakarańnie ŭ Hłybockaj kałonii, niama źviestak užo 290 dzion, z 9 lutaha.
Na žal, jaho vypadak nie adzinkavy siarod palitviaźniaŭ.
