U prakat vyjšła fantastyčnaja stužka «Avatar». Režysior, stvaralnik «Tytanika», Džejms Kemieran abiacaje vidovišča z sensam.
Džejms Kemieran
Minuła bolš za 10 hadoŭ jak Džejms Kemieran stajaŭ na oskaraŭskaj scenie i karanavaŭsia jak suśvietny kinamanarch. Na toje byli važkija padstavy: «Tytanik», da jakoha Kemieran napisaŭ scenar i jaki pastaviŭ, atrymaŭ 11 statuetak i prynios stvaralnikam amal 2 miljardy dalaraŭ. Ciapier kanadyjec viartajecca z praciahłaha adpačynku, i prapanuje svaim šmatlikim šanavalnikam stužku «Avatar» — novy, trochvymierny, navukovafantastyčny epas, u jaki pavodle jahonych stvaralnikaŭ musić pierajnačyć abličča kiniematohrafa i nahadać ludziać, što kino heta jašče i lusterka, a nie tolki vakno ŭ inšy śviet.
«Avatar» — ramantyčnaja fantastyka, dziei jakoj adbyvajucca ŭ siaredzinie nastupnaha stahodździa. U centry siužeta Džejk Sali (Sem Uortynhtan), marski piechaciniec, jaki traplaje na płanietu Pandora (šeść hadoŭ lotu ad Ziamli), kab vykanać śpiecmisiju: vyčarpać z płaniety vielmi kaštoŭny minierał. Kab dasiahnuć hetaha ziamlaninu i jaho paplečnikam treba ŭpakoryć dzikich žyviołaŭ i suvory klimat, ale ž samaje hałoŭnaje: telepatyčna parazumiecca ź siniaskurymi katapadobnymi tubylcami...
Scenar byŭ napisany Kameronam jašče ŭ 1995, ale tadyšnich technałohijaj brakavała, kab zadavolić najpierš voka duža patrabavalnaha režysiora. «Jak tolki ja ŭbačyŭ piersanaž Hołuma va «Uładary Piarścionkaŭ», dyk adčuŭ, što ŭžo možna zdymać i moj film», — kaža Kemieran. Z časoŭ «Tytanika» režysior źniaŭ tolki 2 dakumientalnyja stužki pra daśledavańni akijanskich hłybiniaŭ. Jak kaža sam Kemieran paralelna jon raspracoŭvaŭ i daskanaliŭsia ŭ novych mahčymaściach, jakija dali novyja kampjutarnyja technałohii. Razam nad filmam «Avatar» jon pracavaŭ čatyry z pałovaj hady.
Pavodle słovaŭ Kamierona, svaje idei dla filmaŭ jon čerpaŭ u antyvajennych i antyimpieryjalistyčnych stužkach Stenli Kubryka: «2001: Kaśmičnaja Adysieja», a taksama knih, jakija apaviadajuć parazumieńni pamiž dalokimi kulturaj ludźmi, kštałtu «Tarzana». «U navukova-fantastyčnych stužkach, na jakich ja hadavaŭsia, zaŭsiody było niejkaje sensavaje pasłańnie, — kaža 55-y režysior. — Zbolšaha jany zaścierahali ludziej pierad čymści niebiaśpiečnym. Tamu pa «Zornych vojnach» možna skazać dakładna, kali kiniematorhaf vyrašyŭ uchilicca ŭ bok uciokaŭ u nierealny śviet, dy straciŭ patrebu nieści ludziać jakiści karysny mesidž. Na maju dumku, «Avatar» — heta sproba viarnuć navukovuju fantastyku da svaich karanioj».
Kemieran nie tolki pradstaŭlaje ŭ filmie ekałahičnyja prablemy, ale uskosna ci naŭprost vykazvajecca taksama pra vajnu ŭ Vjetnamie dy Iraku. «Usie hetyja adsyłki da ziamnych prablemaŭ kruciacca vakoł hałoŭnaj temy: važnaść viedańnia čužoj kultury z hledzišča jaje nośbitaŭ, pohlad na jaje nie tolki svaimi vačyma, ale i vačyma inšaha boku, — kaža Kemieran. — Kałanijalnaja tradycyja pryviała da źniščeńnia tubylskaha pobytu, ich kultury i pryrody, dy siońnia my praciahvajem pašyracca takim samym paradkam».
Voś ža, hledaču abiacajuć vidovišča z sensam. Biełaruskaja premjera «Avatar» adbyłasia 17 śniežnia.
