«Mytny sajuz — heta pierš za ŭsio najmacniejšaja padtrymka dla Rasii» — takuju dumku vykazaŭ kiraŭnik 24 listapada na sustrečy z kiraŭnikami dziaržaŭnych infarmahienctvaŭ SND u Minsku.
«My vielmi spadziajemsia, što Biełaruś, Kazachstan nie buduć na zadvorkach hetaha mytnaha sajuza», — padkreśliŭ Alaksandr Łukašenka.
Pavodle słoŭ prezidenta, biełaruski bok raźličvaje, što ŭdzieł u mytnym sajuzie daść jamu ekanamičny efiekt. «Dla nas heta bolš nadzieja na toje, što budziem mieć efiekt u ekanomicy. U tym vyhladzie, u jakim my ciapier jaho prymajem (majecca na ŭvazie mytny sajuz), jon jašče pakul nie daść efiektu. Heta praces, ale nie daloki. My za paŭhoda unifikujem usie mytnyja taryfy, stvarajem kamisiju i vychodzim da adzinaj ekanamičnaj prastory. Voś adzinaja ekanamičnaja prastora — heta pośpiech», — zajaviŭ Łukašenka.
Tema mytnaha sajuza Biełarusi, Kazachstana i Rasii abmiarkoŭvałasia taksama na siońniašniaj sustrečy Łukašenki z namieśnikam hienieralnaha sakratara JeŭrAzES, adkaznym sakratarom kamisii mytnaha sajuza Siarhiejem Hłaźjevym.
Zapłanavanaje na 27 listapada ŭ Minsku padpisańnie dakumientaŭ ab stvareńni mytnaha sajuza Hłaźjeŭ nazvaŭ losavyznačalnym rašeńniem, ź jakoha pačynajecca «faza praktyčnaj realizacyi sajuza». «Na ekśpiertnym uzroŭni ŭ nas usio prapracavana: adziny mytny taryf z usimi asablivaściami jaho prymianieńnia, adzinaja sistema nietaryfnaha rehulavańnia», — cytuje čynoŭnika pres-słužba prezidenta.
Hłaźjeŭ paviedamiŭ, što 1 studzienia 2010 hoda ŭ miežach mytnaha sajuza płanujecca pierajści na univiersalnuju sistemu nietaryfnaha rehulavańnia. U adpaviednaści z prapanovami biełaruskaha boku budzie abmiarkoŭvacca mahčymaść admieny ŭsich uzajemnych abmiežavańniaŭ va ŭnutranym handli da 1 lipienia nastupnaha hoda.
Adnačasova budzie prapanavany dla padpisańnia sumiesny płan da dahavora ab mytnym kodeksie z rašeńniem ab uviadzieńni ŭ dziejańnie hetaha dahavora 1 lipienia. «Heta značyć z 1 lipienia ŭ nas zapracuje adzinaja mytnaja terytoryja, — padkreśliŭ Hłaźjeŭ. — Heta fundamient, jaki zatym budzie dabudoŭvacca i sadziejničać pastupovamu pierachodu da adzinaj ekanamičnaj prastory».
