Na biełaruskim rynku pracy narastaje deficyt. Fota: «Naša Niva»
Na 1 červienia 2023 hoda, pavodle Ministerstva pracy, najmalniki šukali 118,5 tysiačy rabotnikaŭ.
U sakaviku ličba była nižejšaj — 103 989.
U lidarach pa kolkaści vakansij — pradpryjemstvy Minska. Im nie chapała 31 tysiaču rabotnikaŭ.
U sakaviku dla minčukoŭ vakansij było mieniej — 27 080.
MAZ
Aŭtamabilny chołdynh na čale z MAZam i mnostvam raskidanych pa krainie filijałaŭ dy arhanizacyjaŭ sacyjalnaj infrastruktury šukaje 2200 rabotnikaŭ.
358 vakansij u elektronnaj słužbie zaniataści źjaviłasia z 11 krasavika 2023 hoda.
Pradpryjemstvu brakuje śpiecyjalistaŭ inžyniernych prafiesijaŭ i zvyčajnych rabaciah: zvarščykaŭ, malaroŭ, ślesaraŭ, zborščykaŭ.
Za 10 miesiacaŭ niedachop pracaŭnikoŭ na pradpryjemstvie vyras amal udvaja. U vieraśni minułaha hoda MAZu byli patrebnyja 1166 rabotnikaŭ. Brakavała tych ža inžynieraŭ i pradstaŭnikoŭ rabočych śpiecyjalnaściaŭ.
U 2021 hodzie ŭ chołdynhu pracavała 14 tysiač čałaviek.
Traktarny zavod
Minski traktarny zavod šukaje 1994 rabotnika. 250 vakansij dadali z 19 červienia.
Traktarnamu patrabujucca 233 śpiecyjalisty z vyšejšaj adukacyjaj: inžyniery, načalniki ŭčastkaŭ, ekanamisty, prahramisty. 1710 pracaŭnikoŭ pradpryjemstva hatovaje ŭziać ź siaredniaj adukacyjaj.
Dla 16-tysiačnaha zavoda zapatrabavanaja kolkaść rabotnikaŭ vyhladaje fantastyčnaj.
U lutym 2022 hoda adkrytych vakansij było 362.
Ilustracyjnaje fota
Na Minskim traktarnym zavodzie aryšty i zvalnieńni ŭdzielnikaŭ ruchu za svabodnyja vybary i za sumlenny padlik hałasoŭ u 2020-m byli asabliva masavyja. Dziasiatki paviedamleńniaŭ pra heta źjaviłasia ŭ kanałach siłavikoŭ.
Mahiloŭščyna
Na 1 červienia rehijonu nie chapaje 12,5 tysiačy rabotnikaŭ. U studzieni vakansij było 10 117, u sakaviku ich pabolšała da 10 714.
Dniami Dziaržkantrol pryznaŭ, što z upłyvam sankcyj i strataj rynkaŭ zbytu pradukcyi miascovaj haspadarcy brakuje kvalifikavanych kadraŭ.
Kantralory nazvali dva miascovyja pradpryjemstvy, dzie, jak vynikaje, situacyja z pracoŭnaj siłaju vyhladaje biadotnaju.
Asipovickamu zavodu transpartnaha mašynabudavańnia patrabujecca sotnia rabotnikaŭ: elektrazvarščyki, ślesary, frezieroŭščyki, malary, a taksama inžyniery.
Administracyja hatovaja brać na pracu navat piensijanieraŭ.
U 2020 hodzie były dyrektar zavoda Siarhiej Kuźmič zapeŭnivaŭ, što prablemaŭ z kadrami niama. Tady na pradpryjemstvie pracavali 435 čałaviek. Takim čynam, siońnia pradpryjemstva niedaŭkamplektavanaje pryblizna na čverć.
Ciapier na pradpryjemstvie novy kiraŭnik — Mirza Čałojan. Raniej jon kiravaŭ Asipovickim vahonabudaŭničym zavodam, jaki sioleta abviaścili bankrutam.
Pradukcyja Mahiloŭskaha vahonabudaŭničaha zavoda. Ilustracyjnaje fota: mogvagonzavod.ru
Mahiloŭskamu vahonabudaŭničamu zavodu patrebnyja amal 50 rabotnikaŭ.
U studzieni kiraŭnictva pryznavała, što za hod pradpryjemstva znajšło 76 novych rabotnikaŭ, ale adkrytych vakansij chapała. Najbolš zapatrabavanymi byli tokary, zvarščyki, ślesary. Śpiecyjalistaŭ hetych prafiesijaŭ nazyvali «zołatam».
Dva hady tamu situacyja z kadrami była takoj ža. Tady kiraŭnictva zabaraniła zvalniać rabotnikaŭ da adpracoŭki imi kantraktaŭ.
Na pradpryjemstvie pracuje blizu 470 čałaviek. Jano śpiecyjalizujecca na vyrabie vahonaŭ dla transpartavańnia ziernia, cemientu, minieralnych uhnajeńniaŭ.
Homielščyna
Homielskaj haspadarcy nie chapaje 13,8 tysiačy rabotnikaŭ. Za dva apošnija miesiacy kolkaść niezaniatych miescaŭ vyrasła na tysiaču. U sakaviku vakansij było 12 771.
Biełaruski mietałurhičny kambinat šukaje 91 rabotnika. 25 vakansij dadali za apošnija dva tydni.
Pradpryjemstvu patrebnyja śpiecyjalisty z ahulnaj siaredniaj adukacyjaj, hatovyja pracavać z vadkim mietałam. Patrabujucca taksama kiroŭcy, naładčyki abstalavańnia.
U vieraśni 2022 hoda pradpryjemstva šukała bolš za 80 rabotnikaŭ, pieravažna z vyšejšaj adukacyjaj.
Na pradpryjemstvie pracujuć kala 11 tysiač čałaviek.
Niekalki dziasiatkaŭ byłych rabotnikaŭ zavoda — palitźniavolenyja. U 2020 hodzie žychary Žłobina intensiŭna pratestavali suprać falsifikacyi vybaraŭ, udzieł u pratestach masava brali rabočyja.
U adnym z cechaŭ Biełaruskaha mietałurhičnaha zavoda. Ilustracyjnaje fota: belsteel.com
Vytvorčamu pradpryjemstvu «Biełarusnafta» z ofisam u Śvietłahorsku nie chapaje 45 rabotnikaŭ.
Najmalniku dastatkova, kab jany mieli siaredniuju adukacyju, ale byli navučanyja zapatrabavanaj prafiesii.
Na karparatyŭnym sajcie vakansij dla ŭsich strukturnych padraździaleńniaŭ abjadnańnia paznačanyja pad 150 niezaniatych pracoŭnych miescaŭ. Rabotniki patrabujucca z vyšejšaj i siaredniaj adukacyjaj.
Hety sajt zapuścili ŭ žniŭni 2021 hoda, i tady na im było 92 vakansii.
Viciebščyna
Rehijanalnaj pramysłovaści patrebnyja 13 tysiač rabotnikaŭ. Za apošnija dva miesiacy kolkaść vakansij pavialičyłasia bolš, čym na tysiaču.
U sakaviku ich było 11 772. U siarednim miascovyja pradpryjemstvy i arhanizacyi šukajuć pa 20-30 rabotnikaŭ.
Viciebskamu domabudaŭničamu kambinatu patrebnyja 69 rabotnikaŭ.
Pałovu z vakansij apublikavali na sajcie Respublikanskaj słužby zaniataści za apošnija niekalki dzion.
Pradpryjemstvu patrebnyja śpiecyjalisty ź siaredniaj adukacyjaj, jakija viedajuć tołk u budoŭli, a taksama kiroŭcy i ślesary. Minimalny zarobak — ad 600 rubloŭ.
U vieraśni 2021 hoda kambinatu brakavała 79 rabotnikaŭ: siarod ich mašynisty, mantažniki, cieślary, ślesary.
Karjer z dałamitavaj rudoju. Ilustracyjnaje fota: vitvesti.by
«Dałamitu», adzinamu ŭ Biełarusi pradpryjemstvu, jakoje zdabyvaje i pierapracoŭvaje dałamitavuju syravinu, nie staje 25 rabotnikaŭ ź siaredniaj adukacyjaj.
Voźmuć na pracu buldazierystaŭ, ślesaraŭ-naładčykaŭ, ekskavatarščykaŭ.
U 2021 hodzie na adnym z kirmašoŭ vakansij administracyja šukała na pradpryjemstva 19 rabotnikaŭ.
Tady patrabavalisia ŭzryŭniki, mašynist buravoj ustanoŭki i horny majstar.
Na pradpryjemstvie pracuje kala 800 čałaviek.
Hrodzienščyna
U rehijonie niedachop rabotnikaŭ ciapier siahaje 15,6 tysiačy.
U lutym vakansij było 12 780.
Da prykładu, škłozavod «Nioman» maje patrebu ŭ 117 rabotnikach.
Na pradpryjemstva voźmuć śpiecyjalistaŭ z navykami apracoŭki škła i absłuhoŭvańnia admysłovaha abstalavańnia, taksama padsobnych rabotnikaŭ. Zarobak ad 550 rubloŭ da 1200 rubloŭ.
Kalektyŭ pradpryjemstva ciapier składaje kala 1300 čałaviek. U 2008 hodzie pracavała 4000 čałaviek.
Brestčyna
Miascovyja pradpryjemstvy šukajuć 13 tysiač rabotnikaŭ. Za dva apošnija miesiacy kolkaść vakansij vyrasła na 1300. U sakaviku ich było 11 771.
66 rabotnikaŭ šukaje ptuškafabryka «Družba».
Na ptuškafabrycy «Družba». Ilustracyjnaje fota: produkt.by
Pradpryjemstvu patrabujucca śpiecyjalisty z navykami raźbirańnia ptuški. Za takuju pracu abiacajuć płacić da 2000 rubloŭ.
Na inšym resursie kolkaść vakansij ad ptuškafabryki siahaje 200 rabotnikaŭ.
Dźvie chvali emihracyi
Užo amal try hady, jak sučasnaja Biełaruś pieražyvaje samuju vialikuju chvalu emihracyi nasielnictva ŭ svajoj historyi. U adkaz na biesprecedentnyja pa svaich maštabach pratesty suprać dyktatury Alaksandra Łukašenki ŭ 2020 hodzie ŭłada raspačała masavyja represii.
Z pačatkam vajny va Ukrainie ŭ Biełarusi startavała nastupnaja, jašče bolš maštabnaja chvala mihracyi, jakaja ŭ tym liku supravadžałasia arhanizavanym masavym rełakiejtam IT-kampanij. I choć pikavyja momanty ŭžo prajšli, ludzi dahetul praciahvajuć źjazdžać z krainy praz represii i vajnu.
Upieršyniu za mnohija dziesiacihodździ ŭ 2021-2022 hadach pačała źnižacca kolkaść nasielnictva ŭ Minsku.
Treć kvater u Minsku pradajecca pa davieranaści, choć raniej dola takich ździełak składała kala 3-5%.
Pra rost kolkaści ździełak z vykarystańniem davieranaściaŭ kažuć i pradaŭcy patrymanych aŭto.
Miarkujučy pa ličbach, jakija sabrała «Naša Niva», usiaho za 2021-2022 hady krainu pakinuli kala 200-250 tysiač čałaviek.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
Ekanamist tłumačyć, jak dabrabyt biełarusa źviazany z canoj na harełku i śvininu
Biełaruskaja ekanomika ŭ 2023-m moža daciahnuć da ŭzroŭniu 2019 hoda, a moža i nie daciahnuć
Pradpryjemstva «Połack-Škłovałakno» niasie straty ad sankcyj
