Fota: Minsk-Naviny
Dzie možna kupacca
Na minułym tydni MNS apublikavała kartu dazvolenych dla kupańnia miescaŭ. U Minsku i vakolicach heta Minskaje mora (jano ž Zasłaŭskaje vadaschovišča), Cnianskaje vadaschovišča, Drazdy /Krynica i Kamsamolskaje voziera.
Pobač z numarami plažaŭ Minskaha mora ŭ dužkach paznačany administracyjnyja rajony Minska. Što heta značyć? Minskaje mora znachodzicca ž za miežami administracyjnaj haradskoj miažy? Nasamreč heta ŭsio maje značeńnie, ale pra toje paśla.
Prablema prybiralniaŭ na plažy
Minčuki skłali pietycyju: ich nie zadavalniaje situacyja z tualetami na plažy №5 Minskaha mora — adnym z samych vialikich.
«Na plažy №5 na Minskim mory adsutničaje stacyjanarnaja hramadskaja prybiralnia. U apošni čas heta miesca stała vielmi papularnaje, adkryta niekalki dobrych kaviarniaŭ, rehularna pravodziacca festy i inšyja mierapryjemstvy. U dobraje nadvorje letam abo padčas mierapryjemstvaŭ na plažy znachodziacca sotni, a mahčyma, i tysiačy ludziej. Bijaprybiralni kateharyčna nie spraŭlajucca sa svajoj funkcyjaj i praktyčna adrazu zapaŭniajucca i zabrudžvajucca! Užo praz paru hadzin tudy niemahčyma zajści z-za smurodu i brudu! U vyniku sotni ludziej chodziać zapaskudžvać les — «miny» i papierki paŭsiul.
Pierakanaŭča prosim pabudavać na plažy stacyjanarnuju prybiralniu (možna płatnuju, letam adboju ŭ achvotnych dakładna nie budzie).
Adznačym, što najaŭnaść dastatkovaj kolkaści hramadskich prybiralniaŭ — adna z umoŭ kamfortnaha baŭleńnia času hramadzian u rekreacyjnych zonach. Taksama najaŭnaść hramadskich prybiralniaŭ — minimalny standart jakaści žyćcia, jakomu pa siłach adpaviadać i našamu lubimamu horadu!»
Dalej iduć spasyłki na niekalki narmatyŭnych pravavych aktaŭ, a zaviaršajuć aŭtary patrabavańniami:
«Na padstavie vyšejskazanaha, prosim:
-
abstalavać hramadskuju prybiralniu — u adpaviednaści z patrabavańniami NPA i TNPA;
-
na padstavie p. 6 praviłaŭ — uklučyć praviadzieńnie rabot pa abstalavańni hramadskaj prybiralni ŭ Płan mierapryjemstvaŭ pa dobraŭparadkavańni i ŭtrymańni (ekspłuatacyi) terytoryi na 2023 abo 2024 hod».
Chto adkazvaje za prybiralni i plažy?
Aŭtary adpravili pietycyju dvum adrasatam: u ŽKH Minskaha rajona i ŽKH Minskaj vobłaści. Heta vyhladaje łahičnym: Minskaje mora znachodzicca pa-za miežami Minska, a kankretna — u Minskim rajonie, jaki, u svaju čarhu, adnosicca da Minskaj vobłaści.
A dalej pačynajucca dziŭnyja pryhody i padarožža pietycyi. Akazałasia, dla niekatorych dziaržaŭnych arhanizacyj prynaležnaść plažaŭ Minskaha mora — takaja ž zahadka, jak i dla zvyčajnych minčan.
Takim čynam, možna pabačyć, jaki šlach prarabiła pietycyja.
Pieršy atrymalnik — ŽKH Minskaha rajona. Ad jaho pietycyja trapiła ŭ Baraŭlanski śpieclashas (uvachodzić u Minskaje dziaržaŭnaje lesahaspadarčaje abjadnańnie). A śpieclashas pieranakiravaŭ zvarot va ŭnitarnaje pradpryjemstva «Minskaja lesaparkavaja haspadarka». Heta daččynaje kamunalnaje pradpryjemstva ŭvachodzić u strukturu «Minskzielanbud».
I voś ad «Minskaj lesaparkavaj haspadarki» pryjšoŭ adkaz pa sutnaści. Hety adkaz pryvodzicca krychu nižej.
A što z druhim atrymalnikam pietycyi — ŽKH Minskaj vobłaści? Adtul pietycyju pierasłali, u svaju čarhu, jašče dvum adrasatam. A mienavita: u Minski rajvykankam i ŭ «Minskuju haradskuju žyllovuju haspadarku».
Minski rajvykankam staŭ adzinaj dziaržstrukturaj, jakaja źniała ź siabie adkaznaść: nikomu pietycyju pierasyłać nie stali, ale zatoje vykankam vyrazna zaśviedčyŭ, chto adkazvaje za plažy.
«Zona masavaha adpačynku «Zasłaŭskaje vadaschovišča» plaž №5 zamacavanaja za administracyjaj Frunzienskaha rajona horada Minska, dobraŭparadkavańnie prybiarežnaj zony, u tym liku ŭstanoŭka hramadskich prybiralniaŭ, zamacavanaja za UP «Minskaja lesaparkavaja haspadarka».
Pietycyja ž, pieranakiravanaja ŭ «Minskuju haradskuju žyllovuju haspadarku», prarabiła bolš doŭhi šlach. MHŽH adkazała, što zvarot pieranakiravany ŭ «Harramaŭtadar Minharvykankama». Harramaŭtadaraŭcy pieranakiravali jaho va UP «Minskzielanbud». I voś adtul užo pryjšoŭ razhornuty adkaz.
Blizko.by skłała schiemu ruchu pietycyi, ź jakoj vidać, jakuju niaprostuju darohu jana prarabiła, kab u adpačyvalnikaŭ na plažy źjaviłasia prybiralnia. U vyśviatleńnie losu plažnych prybiralniaŭ akazalisia ŭciahnutymi vosiem dziaržaŭnych arhanizacyj. Koła zamknułasia, i ciapier choć dakładna viadoma, chto adkazvaje za absłuhoŭvańnie plažaŭ i ich dobraŭparadkavańnie.
U pačatku artykuła zhadvałasia karta i nazvy rajonaŭ Minska na joj. Dyk voś, tyja nazvy i adznačajuć adkaznych za plažy.
Atrymlivajecca, za plažami Minskaha mora hladziać Zavodski, Pieršamajski, Frunzienski i Centralny rajony, kankretna za plaž №5 adkazvaje Frunzienski. Za vadaschovišča Drazdy / Krynica adkazvajuć Leninski, Maskoŭski i Centralny rajony, za Cnianskaje vadaschovišča — Saviecki, za Kamsamolskaje voziera — Centralny. A za dobraŭparadkavańnie prystaličnych plažaŭ adkazvaje «Minskzielanbud» i jaho padraździaleńnie — «Minskaja lesaparkavaja haspadarka».
Dyk a z prybiralniami što?
Ciapier, zrazumieŭšy ijerarchiju prybiralna-plažnaj haspadarki, samy čas vyśvietlić: što ž budzie z zapytanaj stacyjanarnaj prybiralniaj? Voś što adkazała daččynaja struktura — «Minskaja lesaparkavaja haspadarka»:
«Na plažy №5 Zasłaŭskaha vadaschovišča ŭstanoŭlena dzieviać bijaprybiralniaŭ, jakija dla hramadzian, što adpačyvajuć, biaspłatnyja, vydatki na ich ustanoŭku i absłuhoŭvańnie całkam kładucca na naša pradpryjemstva.
Varta adznačyć, što ŭ vypadku praviadzieńnia roznych masavych mierapryjemstvaŭ, ustalavańnie dadatkovych bijaprybiralniaŭ pavinna zabiaśpiečvacca arhanizatarami nazvanych mierapryjemstvaŭ u kolkaści, nieabchodnaj dla zabieśpiačeńnia patreby płanavanaj da ŭdziełu kolkaści ludziej. Ułaśniki roznych kaviarniaŭ i inšych ustanoŭ, jakija akazvajuć pasłuhi pa arhanizacyi adpačynku i hramadskaha charčavańnia, abaviazanyja ŭličvać kolkaść naviedvalnikaŭ i ŭ vypadku nieabchodnaści ŭstaloŭvać dla svaich haściej dadatkovyja prybiralni i (abo) bijaprybiralni.
U svaju čarhu, paviedamlajem, što pradpryjemstvam pry płanavańni rabot pa padrychtoŭcy zon adpačynku da viasnova-letniaha siezona 2024 hoda, z ulikam faktyčnaj zabiaśpiečanaści prybiralniami ŭ 2023 hodzie, budzie praanalizavana ich nieabchodnaja kolkaść dla zabieśpiačeńnia kamfortnaha baŭleńnia času hramadzian».
Adkaz ad hałaŭnoj struktury — unitarnaha pradpryjemstva «Minskzielanbud» — praktyčna słova ŭ słova paŭtaraje paviedamleńnie ad «Minskaj lesaparkavaj haspadarki».
Takim čynam, hetym haračym letam dadatkovych prybiralniaŭ na plažy №5 čakać nie davodzicca. Adpačyvalnikam pryjdziecca karystacca tymi samymi, što i raniej.
Mahčyma, situacyja źmienicca tolki ŭ nastupnym hodzie, ale ŭsio adno zielanbudaŭcy nie havorać, što pabudujuć stacyjanarnuju prybiralniu. Najimavierniej, u najlepšym vypadku dadaduć niekalki płastykavych kabinak.
Čytajcie taksama:
Kiraŭnik Dobrušskaha rajona vyratavaŭ chłopčyka, jaki tanuŭ u viry na Ipuci, dobraj paradaj
