Fota: vecteezy
Kiepskaje seksualnaje žyćcio moža stać pradvieśnikam prablem z pamiaćciu ŭ nastupnyja hady. Niadaŭniaje daśledavańnie pakazała, što mužčyny siaredniaha ŭzrostu, jakija adznačali źnižeńnie seksualnaha zadavalnieńnia, pa miery staleńnia taksama zvyčajna adnačasova adčuvali bolš jaŭnaje źnižeńnie kahnityŭnych zdolnaściaŭ. Atrymanyja danyja śviedčać ab tym, što naša seksualnaje zdaroŭje ciesna źviazana sa zdaroŭjem našaha mozha, choć nieabchodny dadatkovyja daśledavańni, kab lepš zrazumieć hetuju suviaź, kažuć aŭtary daśledavańnia.
Minułyja daśledavańni vyjavili suviaź pamiž seksualnaj i kahnityŭnaj funkcyjami, u tym liku ŭ pažyłych ludziej. Ale bolšaja častka hetych daśledavańniaŭ abapirałasia na vyvučeńnie ludziej tolki ŭ asobnyja momanty ich žyćcia. U novym ža daśledavańni pad kiraŭnictvam navukoŭcaŭ z Univiersiteta štata Piensilvanija kamanda atrymała dostup da danych, jakija dazvolili im sačyć za ludźmi praciahły čas.
U pryvatnaści, daśledčyki praanalizavali danyja sotniaŭ pažyłych mužčyn, jakija ŭdzielničajuć u praciahłym daśledavańni VETSA (Vjetnamskaje daśledavańnie, jakoje vyvučaje stareńnie dvajniat). VETSA sprabuje vyznačyć hienietyčnyja faktary i faktary navakolnaha asiarodździa, jakija ŭpłyvajuć na stareńnie mozha ludziej. Bolš za 800 mužčyn byli ŭklučanyja ŭ analiz kamandy, siaredni ŭzrost jakich składaŭ 56 hadoŭ na pačatak daśledavańnia. Hetyja mužčyny adkazvali na pytańni pra svajo žyćcio, a ich kahnityŭnyja zdolnaści i pamiać praviaralisia ŭ troch chvalach daśledavańnia na praciahu ažno 12 hadoŭ.
Daśledčyki vyjavili, što seksualnaje zadavalnieńnie mužčyn u pačatku daśledavańnia nie było źviazana ź ich pieršapačatkovaj kahnityŭnaj funkcyjaj. Ale mužčyny, čyjo seksualnaje žyćcio ź ciaham času pajšło na spad, časta taksama adčuvali paharšeńnie pamiaci. Mužčyny, jakija paviedamlali pra erektylnuju dysfunkcyju, taksama mieli tendencyju da horšaj kahnityŭnaj funkcyi jak u pačatku, tak i na praciahu ŭsiaho daśledavańnia. Vyniki kamandy byli apublikavanyja ŭ apošnim numary časopisa Gerontologist.
Pradoŭžanyja daśledavańni vyhadna adroźnivajucca ad karotkaterminovych tym, što pakazvajuć sapraŭdnuju suviaź pamiž lubymi dvuma faktarami — u hetym vypadku seksualnym zdaroŭjem i zdaroŭjem mozha. Adnak adno tolki hetaje daśledavańnie ŭsio jašče nie moža pakazać nam, u jakim kirunku raźvivajecca hetaja ŭzajemasuviaź: jaki faktar pieršapačatkova jość pryčynaj, a jaki — nastupstvam; ci abodva faktary (i seksualnaje žyćcio, i zdaroŭje mozha) znachodziacca pad upłyvam inšaha niaŭličanaha faktaru.
Ale niekatoryja teoryi ŭ aŭtaraŭ jość, piša Gizmodo. U vyniku mužčyny, u jakich paharšajecca seksualnaje žyćcio, mohuć adčuvać bolšy stres, što, naprykład, moža niepasredna ŭpłyvać na ich kahnityŭnaje zdaroŭje. Taksama viadoma, što niaznačnyja źmieny ŭ krovazvarocie pavyšajuć ryzyku erektylnaj dysfunkcyi ŭ mužčyn i, mahčyma, mohuć nanieści škodu hetaksama i mozhu.
Aŭtary kažuć, što ich vyniki jak minimum źviartajuć uvahu na toje, što paharšeńnie seksualnaha zdaroŭja pažyłych mužčyn moža być rańnim sihnałam prablem z pamiaćciu. U ideale heta taksama moža aznačać, što ludzi mohuć padtrymlivać rozum, aktyŭna vyrašajučy prablemy sa svaim seksualnym žyćciom.
«Palapšeńnie seksualnaha zadavalnieńnia moža faktyčna vyklikać palapšeńnie funkcyi pamiaci. My kažam ludziam, što jany pavinny bolš zajmacca sportam i charčavacca lepš. My pakazvajem, što seksualnaje zadavalnieńnie taksama maje važnaje značeńnie dla našaha zdaroŭja i ahulnaj jakaści žyćcia», — havorycca ŭ zajavie aŭtara daśledavańnia Marcina Ślivinski, prafiesara čałaviečaha i siamiejnaha raźvićcia ŭ Piensilvanskim univiersitecie.
Čytajcie taksama:
Studentka praanalizavała, jak pratesty paŭpłyvali na seksualnaje žyćcio biełarusaŭ
Para z Hrodna pierajechała ŭ Polšču i zarablaje hrošy zdymkami filmaŭ dla darosłych
