Fota: pixabay.com
Na marafon pasprabavaŭ zarehistravacca čytač «Našaj Nivy» Andrej — ajcišnik, jaki pierajechaŭ u Vilniu paśla pačatku vajny. Užo niekalki hadoŭ mužčyna zajmajecca bieham, i ciapier jon vyrašyŭ pasprabavać siabie na Vilenskim paŭmarafonie 27 maja.
Biełarus raskazvaje, što rehistravaŭsia na zabieh zahadzia, u pačatku krasavika. A potym atrymaŭ list, što dla biełarusaŭ i rasijan uvodziacca abmiežavańni: «Jość papiera ad Fiederacyi lohkaj atletyki Litvy pra toje, što prafiesijnyja spartsmieny nie mohuć udzielničać u masavych lohkaatletyčnych spabornictvach u krainie pad ściaham Rasii ci Biełarusi, i kali jany raptam patrapiać u pryzy, hetyja pryzy im nie ŭručać. Taksama tam było prapisana, što, kab udzielničać u paŭmarafonie, hramadzianie Rasii ci Biełarusi pavinny mieć dazvoł na žycharstva ŭ Litvie».
Hetaja situacyja, raskazvaje Andrej, amal nie adroźnivajecca ad paŭmarafonu ŭ minułym hodzie, kali taksama nielha było vybrać pry rehistracyi Biełaruś, ale tady nie patrabavałasia mieć DNŽ. Možna było paznačyć padčas rehistracyi, što ty mižnarodny ŭdzielnik abo žyvieš u Litvie, atrymać pierad zabieham svoj numar i spaborničać.
Ale sieleta da ŭmoŭ dadałosia patrabavańnie napisać arhanizataram list, u jakim udzielniki-biełarusy musili b patłumačyć, jak jany staviacca da vajny va Ukrainie.
U Andreja takoje patrabavańnie vyklikała sprečnyja pačućci:
«Razumieju, kali padčas padačy dakumientaŭ na dazvoł na žycharstva tabie dajuć ankietu, u jakoj treba paznačyć tvajo staŭleńnie da vajny i prynaležnaści Kryma, i heta byccam buduć uličvać. Potym hetaja papiera moža paŭpłyvać na toje, što tabie daduć dakumienty i ty atrymaješ prava na žycharstva ŭ krainie. Ale heta list ad arhanizataraŭ zabiehu, u jakim udzielničaje šmat amataraŭ, u tym liku i biełarusy. Jany zbolšaha trapili siudy praź pieraśled ci praź nievynosnyja ŭmovy žyćcia na radzimie, i tut ich prosiać, maŭlaŭ, napišycie, što vy nie viarblud.
Ja tak razumieju, što kali ŭžo zdarajucca takija vypadki, kali cikaviacca našym staŭleńniem da vajny ŭžo nie na dziaržaŭnym uzroŭni, a na ŭzroŭni peŭnaj arhanizacyi, to nastupnym krokam moža być toje, što buduć pytacca heta ž samaje na ŭvachodzie ŭ kramu. A to i žoŭtuju zorku pryjdziecca našyć, kali ty biełarus».
My źviarnulisia da arhanizataraŭ paŭmarafonu pa kamientar, ale pakul što nie atrymali adkazu.
14 sakavika Litoŭskaja fiederacyja lohkaj atletyki pryniała dekłaracyju pa ŭdziele hramadzian Rasii i Biełarusi ŭ masavych atletyčnych spabornictvach. Rašeńnie litoŭskich spartovych čynoŭnikaŭ niesuciašalnaje dla hetych atletaŭ. Pavodle jaho, u adpaviednych turnirach mohuć brać udzieł tolki tyja hramadzianie Rasii i Biełarusi, jakija majuć litoŭski DNŽ, pry hetym u dakumientach i pratakołach spabornictvaŭ nielha paznačać hramadzianstva hetych atletaŭ, taksama jak i zabaroniena rehistravać ich u bazie danych Mižnarodnaj asacyjacyi lohkaatletyčnych spabornictvaŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Biełarus-pastar vyjhraŭ vialiki zabieh u Polščy. Paśla hetaj hutarki vy jaho dakładna palubicie
Kitajec prabieh marafon za 3,5 hadziny, choć kuryŭ usiu dystancyju
Jaki najlepšy čas dla śniadanku, kali zranku vy zajmajeciesia sportam?
