Dźmitryj Łazar. Fota: spring96.org
U sudzie Maładziečanskaha rajona 2 sakavika jaho asudzili pavodle art. 391 (abraza sudździ abo narodnaha zasiadaciela), art. 369 (abraza pradstaŭnika ŭłady), č. 1 art. 368 (abraza Łukašenki) KK. Sud pryznačyŭ Dźmitryju 2,5 hoda kałonii i štraf pamieram u 100 bazavych vieličyń (3700 rubloŭ).
Stała viadoma, što 10 maja ŭ Vaŭkavysku adbudziecca čarhovy sud nad palitviaźniem. Hetym razam jaho abvinavačvajuć pavodle art. 391 KK (abraza sudździ). Spravu budzie razhladać sudździa Mikałaj Tałaška.
Dźmitryja Łazara zatrymali 11 listapada 2022 hoda i źmiaścili pad vartu. Jaho abvinavacili ŭ tym, što ŭ studzieni 2022 hoda jon u telehram-čacie pakinuŭ abraźlivyja kamientaryi ŭ dačynieńni da minskaj prakurorki Žanny Baranavaj, kapitana minskaj milicyi DAI Pakładka, kapitana babruskaj milicyi AMAP Bykava, sudździ suda Leninskaha rajona Hrodna Mikałaja Siarhiejki, majora milicyi, namieśnika načalnika achovy pravaparadku i prafiłaktyki RUUS Frunzienskaha rajona Minska Marcula, siaržantaŭ milicyi AMAP Mahiloŭskaha abłasnoha UUS Saratasa i Małafieja.
U jakaści materyjalnaj kampiensacyi maralnaj škody prakurorka Žanna Baranava paprasiła sud spahnać ź Dźmitryja 2000 rubloŭ, jakija namiervałasia pieraličyć na karyść dziciačaha doma. Marcul zaprasiŭ 1500 rubloŭ. Zajaŭlenyja sumy kampiensacyi Dźmitryj pahasiŭ adrazu paśla abviaščeńnia.
Baranava i Marcul paśla kampiensacyi maralnaj škody adazvali svaje iski suprać Łazara.
Mužčyna całkam pryznaŭ vinu.
Dziaržabvinavačańnie zaprasiła dla Dźmitryja čatyry hady kałonii. Sudździa pryniaŭ rašeńnie asudzić mužčynu na dva z pałovaj hady pazbaŭleńnia voli.
Dźmitryju Łazaru 38 hadoŭ. Mužčyna maje vyšejšuju adukacyju i pracuje kiroŭcam u pryvatnaj firmie.
Padtrymać palitviaźnia možna listami i telehramami: IČU Vaŭkavyskaha RAUS. 231900, Hrodzienskaja vobłaść, h. Vaŭkavysk, vuł. Savieckaja, 46, Dźmitryju Uładzimiraviču Łazaru.
