Prapahandystka «Minskaj praŭdy» Dzijana Šybkoŭskaja. Kałaž: «Radyjo Svaboda»
Hazieta «Minskaja praŭda» da apošniaha času była małazaŭvažnaja ŭ šerahu inšaj dziaržaŭnaj presy. Pisała pra žyćcio ŭ Minskaj vobłaści: pasiaŭnaja, nadoi, lon-daŭhuniec.
Situacyja karennym čynam źmianiłasia ŭ 2020 hodzie, kali hałoŭnaj redaktarkaj vydańnia stała Łarysa Koršun, jakaja da hetaha pracavała ŭ dziaržynskaj rajoncy «Uzvyšša».
Koršun adrazu pasprabavała pieraŭtvaryć «Minskuju praŭdu» ŭ jarki tabłoid. Ničoha inšaha, jak zdabyvać sabie papularnaść na ckavańni apazicyi, biełaruskaj movy, nacyjanalnych simvałaŭ i histaryčnych postaciaŭ, u haziecie nie prydumali. «Minskaja praŭda» atrymała viadomaść dziakujučy krynžovym karykaturam na pieršaj staroncy aŭtarstva vićbiča Antona Astroŭskaha.
Naprykład, Astroŭski malavaŭ Babaryku i Capkału ŭ vyhladzie rasijskaha dvuchhałovaha arła, kali adnosiny z Rasijaj pierad vybarami 2020 hoda byli nie samyja biaschmarnyja. Ludziej, jakija vychodzili na pratest, pakazvali jak pacukoŭ, śviniej, prastytutak ci pradstaŭnikoŭ ŁHBT-supolnaści.
Skandalnym staŭ vypadak, kali na pieršaj staroncy vydańnia byli namalavanyja ksiandzy sa svastykami. Tahačasny ministr zamiežnych spraŭ Uładzimir Makiej u vyniku navat musiŭ apraŭdvacca pierad papskim nuncyjem.
Hazieta žyvie nie tolki karcinkami, ale i tekstami. Adna z najbolš zaŭvažnych prapahandystak vydańnia — Dzijana Šybkoŭskaja. Što pra jaje viadoma?
Dzijana Šybkoŭskaja. Skryn videa
Baćka taksama baraniŭ Łukašenku
Dzijanie Šybkoŭskaj 42 hady. U intervju jana padkreślivaje, što naradziłasia 31 maja, u Mižnarodny dzień błandzinak. Šybkoŭskaja rodam ź Minska, skončyła žurfak BDU.
Baćka Dzijany Šybkoŭskaj — viadomy ŭ 1990-ja prapahandyst Jury Dudzinaŭ. U svoj čas jon papracavaŭ na BT, a taksama vioŭ na dziaržaŭnym radyjo pieradaču «Razmova pa sutnaści» ź Ninaj Čajkaj.
«Jość dva-try žurnalisty — Alaksandar Zimoŭski na telebačańni, Nina Čajka i Jury Dudzinaŭ na radyjo, — jakija jašče sprabujuć adstojvać i tłumačyć narodu palityku Łukašenki», — pisała ŭ 2001 hodzie rasijskaje vydańnie «Zavtra» (redaktar — stalinist Alaksandar Prachanaŭ).
Karani siamji Šybkoŭskich — z Rasii. Pra heta Dzijana raskazvała ŭ adnym ź intervju. «Lubimy rasijski horad — heta Kursk, siało Straleckaje, dzie naradzilisia i pachavanyja mnohija z maich prodkaŭ, tam da hetaj pary žyvuć maje svajaki. Lublu Maskvu za toje, što hety horad padaravaŭ mnie niezabyŭnuju sustreču i vialikaje kachańnie, jakoje nakiravała majo žyćcio pa novym kursie. Lublu Picier — tut žyvuć maje siabry dziacinstva. Ja lublu Rasiju, choć i naradziłasia na biełaruskaj ziamli. Hetak ža, jak i Biełaruś, ja liču Rasiju svajoj Radzimaj. Dla mianie takoje naturalna, jak dla dziciaci mieć dvaich baćkoŭ».
«Rumoł» i hieorhijeŭskija stužki
Prapahandystka pracavała na infarmacyjnaje ahienctva «Intierfaks-Zapad», hazietu «7 dniej», rasijski sajt «Sputnik».
«Mnie padabajecca być aktyŭnaj, zaniataj i rašać mnostva pytańniaŭ. Ja ščaślivaja, kali rablu niešta važnaje, sacyjalna karysnaje, kali daznajusia niešta novaje», — pisała jana pra siabie ŭ haziecie «7 dniej», jakuju vydaje dziaržaŭnaje ahienctva BiełTA. Šybkoŭskaja pryznavałasia, što chacieła pisać pra palityku, ale redaktar nie daŭ z farmuloŭkaj: «Ty ž błandzinka». Tamu i davodziłasia pisać pra kulturu i sacyjałku.
Ciahu da palityčnaj publicystyki Dzijana Šybkoŭskaja zadavalniała publikacyjami na sajcie biełaruskaha adździaleńnia arhanizacyi «Ruś mołodaja» (Rumoł). U pryvatnaści, tam jana pisała pra toje, jak biełaruskija apazicyjaniery rychtujucca va Ukrainie da paŭtareńnia Majdanu, pra biełarusaŭ, jakija zavajoŭvali miedali pa rasijskich šaškach, pra situacyi ŭ Sierbii i Armienii.
Šybkoŭskaja i sama brała aktyŭny ŭdzieł u žyćci arhanizacyi «Rumoł». 9 maja 2015 hoda jana piša: «Razdali z «Ruśju mołodoj» hieorhijeŭskija stužki kala HUMa. Narod navalvaŭsia z usich bakoŭ. 400 stužak razdali za 20 chvilin». Zastalisia fotazdymki, dzie Šybkoŭskaja razam ź inšymi aktyvistami «Rumoła» paziruje paśla spabornictvaŭ pa «ruskim žymie». Siarod tych, chto zaśviaciŭsia na fota, jość Kanstancin Burykin, viadomy jak «baciuška sa svastykaj». Lidar arhanizacyi «Rumoł» Siarhiej Łušč staŭ viadomy, siarod inšaha, tym, što doŭhi čas byŭ prychilnikam nieapahanskaj i nieanacysckaj siekty «Schron Jež Słavien».
Potym adnačasova z pracaj u vydańni «7 dniej» Šybkoŭskaja pačała pisać dla rasijskich sajtaŭ «Imhoclub» — biełaruskaj častkaj tam tady zajmaŭsia prarasijski publicyst Alaksiej Dziermant, a taksama «Jevrazija.Ekśpiert». U hety čas vykładała sumiesnyja zdymki z adnym ź ideołahaŭ «russkoho mira» Mikałajem Starykavym.
«Pašpart Homielskaj vobłaści» i Armienija
Kali ŭ 2014 hodzie pačalisia padziei va Ukrainie, Šybkoŭskaja na svaich staronkach u sacyjalnych sietkach aktyŭna padtrymlivała prarasijskich bajevikoŭ u Daniecku i Łuhansku. U vieraśni 2014 hoda jana vykłała zdymak z «pašpartami Homielskaj vobłaści» i podpisam: «Jak vam?».
U sacsietcy «UKantakcie» Šybkoŭskaja aktyŭna repościła z takich resursaŭ, jak «Ukrainy bolšie niet», «Novosti opołčienija Novorośsii», «My patrioty Biełoj Rusi».
Ad maja 2016 hoda Dzijana Šybkoŭskaja stała hałoŭnym redaktaram u vydańni armianskaj dyjaspary Biełarusi «Mijasin». Pry hetym nijakich armianskich karanioŭ jana nie maje. Žurnalistka kaža, što adnojčy pryjšła na kursy armianskaj movy dla darosłych, dzie paznajomiłasia ź ludźmi, jakija ŭ budučyni i prapanujuć uznačalić vydańnie. U adnym z rańnich intervju Dzijana Šybkoŭskaja kazała, što ŭ budučyni maryć stać ekśpiertam u temie krain Kaŭkaza, ale pakul da hetaj mety nie nabliziłasia.
«Prysud Siemčanku zasłužany»
U «Minskaj praŭdzie» Šybkoŭskaja zmahła pisać pra palityku ŭ svaim razumieńni. Ciapier jana aktyŭna publikuje teksty pra zavočnyja sudy nad apazicyjnymi palitykami — takimi, jak Śviatłana Cichanoŭskaja, Valer Capkała, Pavieł Łatuška. Naviedvaje i sudy nad palitźniavolenymi, była na ahučvańni prysudu Marynie Zołatavaj i Ludmile Čekinaj z Tut.by.
«Prysud zasłužany. Uvohule biełaruskija sudy vynosiać abjektyŭnyja rašeńni», — skazała Šybkoŭskaja ab prysudzie byłomu žurnalistu ANT Dźmitryju Siemčanku, jaki raniej byŭ kiraŭnikom łukašenkaŭskaha pułu žurnalistaŭ. Sama Šybkoŭskaja da pułu dałučyłasia niadaŭna i aśviatlaje tolki vizity Łukašenki ŭ Minskuju vobłaść.
Voś cytata ź jaje artykuła «Palityčny paŭraspad apazicyi. Kudy źnikli zmahary ziamli biełaruskaj?»: «U mianie była mahčymaść razhledzieć Andreja Dźmitryjeva jak śled. I ja čysta pa-žanočamu źviarnuła ŭvahu, jak nieachajna jon byŭ apranuty. Katyški na zamytaj bajcy, irvany zaplečnik, ź jakim soramna źjaŭlacca na publicy lubomu hramadskamu dziejaču. Kali praz paru hadoŭ ja ŭbačyła Dźmitryjeva ŭ liku kandydataŭ u prezidenty, u dumkach uspłyŭ toj vobraz z dranym zaplečnikam na plačy. Jak alehoryja taho, u što moža pieratvarycca maja Biełaruś, kali da ŭłady pryjdzie palityk, jaki i za saboj nie zdolny dahladać i elemientarna nie moža pryvieści siabie ŭ paradak».
Nie tak daŭno Dzijana Šybkoŭskaja pasprabavała siabie ŭ roli jutub-błohiera. Jana spadziavałasia pačać sieryju hutarak pad nazvaj «ZaŠIBiś». Pieršym hościem staŭ viadučy STB Ryhor Azaronak. Sama Šybkoŭskaja skazała, što dobra siabravali jašče ich baćki, a ciapier siabrujuć i jany sami. Videa pravisieła na jutubie ŭsiaho niekalki dzion, a potym źnikła praz parušeńnie standartaŭ płatformy.
U sužycielstvie z Andrejem Łazutkinym
Što tyčycca asabistaha žyćcia, to nie tak daŭno ŭ efiry telekanała «Biełaruś-1» u prahramie «Skažiniemołči» prahučała, što «hramadzianski muž» Šybkoŭskaj — praŭładny palitołah, były supracoŭnik Ministerstva adukacyi 31-hadovy Andrej Łazutkin. Sumiesnyja fotazdymki z Łazutkinym Šybkoŭskaja pastajanna publikuje na svajoj staroncy ŭ fejsbuku.
Łazutkin — siabra Kamunistyčnaj partyi Biełarusi, viadomy svaimi vykazvańniami z admaŭleńniem taho, što ŭ Kurapatach ludziej rasstrelvali savieckija ŭłady. Taksama jon aŭtar niekalkich ruskamoŭnych knih prozy, vydańniu pieršych knih Łazutkina spryjaŭ u tym liku likvidavany ciapier ŭładami Biełaruski PEN-Centr.
Ad pieršaha šlubu ŭ Dzijany Šybkoŭskaj jość 18-hadovaja dačka Miłana. Ciapier jana studentka Technałahičnaha kaledža. Dziaŭčyna navučałasia ŭ Nacyjanalnaj škole pryhažości. Pracavała madellu na mnohich dziaržaŭnych mierapryjemstvach. «Niadaŭna jana mnie zajaviła, što taksama kamunistka», — kazała Šybkoŭskaja pra dačku.
Čytajcie taksama:
Pracavała na telekanałach Miedźviedčuka. Chto takaja Nadzieja Sas — novaja prapahandystka STB
«Heta ž prosta jeraś!» Prapahandysty sabralisia na STV abhavaryć fejki, i pakaciłasia
«Dzikaje palavańnie» Kiryła Kazakova. Što za prapahandyst raskrytykavaŭ kaleh? VIDEA
