Alaksandr Sivakoŭ. Fota: gomeltv.by
U pačatku lutaha źjaviłasia infarmacyja, što kiraŭnik administracyi Čyhunačnaha rajona Alaksandr Sivakoŭ byŭ zatrymany na pracoŭnym miescy. Paviedamlałasia taksama, što razam z kiraŭnikom pa padazreńni ŭ ździajśnieńni złačynstva była zatrymanaja i jaho namieśnik pa ekanamičnych pytańniach Natalla Žuk.
Adnak nijakaj aficyjnaj infarmacyi ab zatrymańni kiraŭnictva administracyi nie było. Nie paćviardžali fakt zatrymańnia i ŭ samoj administracyi rajona. Raniej na zvanok žurnalistaŭ «Našaj Nivy» ŭ pryjomnaj adkazvali, što Sivakoŭ i Žuk znachodziacca na balničnych.
Adnak u kancy lutaha infarmacyja pra zatrymańnie ŭskosna paćvierdziłasia: z sajta administracyi Čyhunačnaha rajona i Homielskaha harvykankama byli vydalenyja zhadki pra kiraŭnika i namieśnika pa ekanamičnych pytańniach.
U pryjomnaj administracyi skazali nastupnaje: «Sivakoŭ u nas bolš nie pracuje».
Dźvie krynicy ŭ miascovych orhanach ułady Homiela paviedamili, što padrabiaznaści kryminalnaj spravy nieviadomyja navat padnačalenym zatrymanych. Viadoma tolki, što eks-kiraŭnikam rajona staviać u vinu ekanamičnyja złačynstvy.
Alaksandr Sivakoŭ uznačaliŭ administracyju Čyhunačnaha rajona ŭ śniežni 2019 hoda. U 2010—2017 hadach kiravaŭ pradpryjemstvam «HarSAP». Byŭ členam vybarčaj kamisii ad rajonnaj arhanizacyi «Biełaja Ruś» Savieckaha rajona Homiela ŭ 2016 hodzie, a taksama deputatam Homielskaha haradskoha Savieta deputataŭ 27 sklikańnia.
Niekudy źnikli kiraŭnik adnaho z homielskich rajonaŭ i jaho namieśnica. Mahčyma, ich zatrymali
