Ich zatrymali ŭ noč na 30 sakavika 2022 hoda. Pavodle viersii abvinavačvańnia, jany datyčnyja da źniščeńnia dvuch relejnych šaf sihnalnych ustanovak pad Asipovičami. Padčas zatrymańnia Dźmitryj Klimaŭ byŭ paranieny siłavikami. Babrujčan sudziać pa piaci ciažkich artykułach Kryminalnaha kodeksa, u tym liku za «akt teraryzmu», «zdradu dziaržavie» i «ŭdzieł u terarystyčnaj arhanizacyi». Spravu razhladaje sudździa Ihar Šviedaŭ. Palitviaźniam pahražajuć vialikija turemnyja terminy, za kratami jany ŭtrymlivajucca 10 miesiacaŭ.
U čym abvinavačvajuć palitviaźniaŭ?
Im inkryminujecca adrazu piać artykułaŭ Kryminalnaha kodeksa:
— č. 3 art. 289 — akt teraryzmu arhanizavanaj hrupaj;
— č. 2 art. 290-4 — udzieł u arhanizacyi dla ažyćciaŭleńnia terarystyčnaj dziejnaści;
— č. 1 art. 356 — zdrada dziaržavie;
— č. 4 art. 309 — naŭmysnaje pryviadzieńnie ŭ nieprydatnaść transpartnaha srodku abo šlachoŭ złučeńnia;
— č. 2 art. 406 — niedaniasieńnie ab złačynstvie.
Raniej pa artykule za «ŭdzieł u arhanizacyi dla ažyćciaŭleńnia terarystyčnaj dziejnaści» sudzili tolki fihurantaŭ «spravy AHSB». Babrujskich partyzan sudziać za suviaź z ByPOL i płanam «Pieramoha». Pakolki sud prachodzić u zakrytym režymie, to padrabiaznaści spravy nieviadomyja.
Što admietna, «rejkavych partyzan» nie ŭnieśli jašče ni ŭ «śpis ekstremistaŭ», ni ŭ «śpis terarystaŭ».
Nahadajem, u noč na 30 sakavika 2022 hoda pry siłavoj padtrymcy SACHRa byli zatrymanyja troje «rejkavych partyzan» z Babrujska. Pra heta 6 krasavika paviedamiła MUS. Na kadrach apieratyŭnaj zdymki ŭ adnaho ź ich pierabintavanyja kaleni, i jon ź ciažkaściu adkazvaje na pytańni apieratyŭnikaŭ, u druhoha kroŭ na tvary, a treci mocna napałochany. Pa infarmacyi viedamstva, «padčas zatrymańnia mužčyny akazali aktyŭny supraciŭ i pasprabavali ŭciačy». Siłaviki ŭžyli zbroju na paražeńnie. Adzin z zatrymanych byŭ paranieny i niejki čas znachodziŭsia ŭ lačebnaj ustanovie. Inšym akazanaja mieddapamoha na miescy. Jak vynikaje z apieratyŭnaha videa, pry zatrymańni byŭ paranieny Dźmitryj Klimaŭ. Na videa zatrymańnia ŭ jaho pieraviazanyja kaleni, a ŭ izalatary jon kulhaje.
