Skryn videa
Siońnia łukašenkaŭcy zładzili niezvyčajnuju prapahandysckuju akcyju na minskaj «Alimpik-Arenie». Alaksandr Łukašenka pakataŭ u invalidnym kreśle mužčynu, jaki vajavaŭ u šerahach rasijskaj armii na vajnie va Ukrainie.
Pavieł Pracharenkaŭ, uradženiec Danbasa, vajavaŭ na baku Rasii suprać Ukrainy. Spačatku jon słužyŭ u tak zvanaj «narodnaj milicyi DNR» — rasijskim uzbrojenym farmiravańni, što farmalna ličyłasia samastojnym. Z pačatkam poŭnamaštabnaj vajny jaho adpravili na pieradavuju.
U krasaviku 2022 hoda mužčyna padarvaŭsia na minie, straciŭ adnu nahu, ledź nie straciŭ i druhuju, ale, pišuć prapahandysty, dapamahli biełaruskija miedyki.
Ciapier Pracharenkaŭ ź siamjoj žyvie ŭ Minsku. Maryć pra biełaruskaje hramadzianstva. Na jakoj padstavie hety čałaviek moža pretendavać na biełaruskaje hramadzianstva, što jaho źviazvaje ź Biełaruśsiu i čamu jon nie choča žyć u Rasii, za jakuju vajavaŭ, prapahandysty nie paviedamlajuć.
