Pieršy raz Džonsan naviedaŭ Kijeŭ u krasaviku
Źviestki pra zapłanavany vizit Džonsana haziecie Times paćvierdzili i ŭkrainskija krynicy, adnak jany adznačyli, što ŭ ich niama kankretnaj infarmacyi pra datu pajezdki. U Kijevie pry hetym nahadali, što prezident Ukrainy Uładzimir Zialenski i Džonsan ličać adzin adnaho siabrami.
Pa danych Times, padčas vizitu Džonsan maje namier zaklikać zachodnich partnioraŭ Ukrainy i dalej akazvać joj vajskovuju i humanitarnuju padtrymku.
Guardian paviedamlaje, što ŭrad Vialikabrytanii nie viedaŭ pra płany Džonsana naviedać Kijeŭ, adnak tam nie stanuć piarečyć takoj pajezdcy, i eks-premjer moža atrymać dla jaje dziaržaŭnuju achovu.
Pry hetym aŭtary publikacyi cytujuć niekalkich vysokapastaŭlenych členaŭ Kansiervatyŭnaj partyi, jakija nie nadta zadavolenyja namieram byłoha premjera ździejśnić vizit u Kijeŭ. Jany ličać heta samarekłamaj Džonsana i aścierahajucca, što pajezdka niekalki adciahnie ŭvahu ad namahańniaŭ ciapierašniaha kiraŭnika ŭrada Vialikabrytanii Ryšy Sunaka.
Džonsana ličyli adnym z samych addanych prychilnikaŭ Ukrainy na mižnarodnaj arenie, i mienavita jon dapamoh skaardynavać zachodniuju padtrymku Kijeva. Džonsan byŭ pieršym zachodnim lidaram, jaki naviedaŭ Ukrainu paśla pačatku rasijskaha ŭvarvańnia.
Ryšy Sunak taksama pabyvaŭ u Kijevie ŭ listapadzie minułaha hoda, nieŭzabavie paśla svajho pryznačeńnia na pasadu premjer-ministra.