«Ludzi z całkam sinimi nahami». Jak katujuć biełarusaŭ?
Źbivajuć zatrymanych pa palityčnych matyvach, jak praviła, pry zatrymańni ci ŭ budynku HUBAZiKa. Časta źbitym pryznačajuć administracyjny aryšt, kab za «sutki» syšli hiematomy. Bo pierad pastupleńniem u SIZA pravodzicca miedyčny ahlad na paškodžańni. Byli vypadki, kali praz mocnyja ślady źbićcia, supracoŭniki «Vaładarki» admaŭlalisia prymać źniavolenaha. Tak, naprykład, było z byłym śledčym Mikitam Staraženkam. Jak adznačaje sukamiernik, u IČU jaho ŭtrymlivali tolki troje sutak — paśla hetaha jaho sprabavali pieravieści ŭ SIZA-1, ale jaho tam pieršy raz nie pryniali praz mocnaje źbićcio. Siłaviki vazili Staraženku ŭ lakarniu. Z druhoha razu jaho pryniali ŭ SIZA-1, dzie jon znachodziŭsia ŭ čakańni suda.
Pra źbićcio palitviaźniaŭ pravaabaroncy daviedvajucca ź ich zajavaŭ na sudach, z materyjałaŭ spravy, ad byłych sukamiernikaŭ, ad svajakoŭ, ad samich palityčnych źniavolenych paśla vyzvaleńnia.
Jak raspaviadajuć aryštanty, ciapier źbivajuć bolš za ŭsio tych, kaho zatrymlivajuć za «źliŭ infarmacyi». Samaje raspaŭsiudžanaje — źbićcio dubinkaj noh i jahadzic. Taksama vykarystoŭvajucca elektrašokiery, udušeńnie pakietam i inšyja sposaby. Heta ŭsio supravadžajecca pahrozami jašče bolšaha hvałtu.
«Jany naohuł lubiać bolš za ŭsio źbivać ajcišnikaŭ i tych, chto «źlivaje» infarmacyju», — adznačaŭ były aryštant IČU na Akreścina.
«Byli ludzi z całkam sinimi nahami. Heta samaje raspaŭsiudžanaje. Ale mianie bili pa hałavie, tamu byli siniaki i pad vačyma. U mianie vielmi drenny zrok, ale pry pastupleńni ŭ CIP adzin z supracoŭnikaŭ admoviŭsia mnie vydać akulary, skazaŭšy, što za 15 sutak pačnu bačyć», — raspaviadaŭ jašče adzin były viazień.
«Pa kalidory vadzili i bili maci». Pa «spravie Aŭtuchoviča» maci i syna asudzili da 15 i 19 hadoŭ kałonii
Hrodzienski abłasny sud 17 kastryčnika ahučyŭ prysudy pa rezanansnaj «spravie Aŭtuchoviča» — ad 2,5 da 25 hadoŭ kałonii. Asudžanyja — Mikałaj Aŭtuchovič, śviatar Siarhiej Rezanovič, jahonaja žonka Luboŭ Rezanovič, ich syn Pavieł Rezanovič, piensijanierka Halina Dzierbyš, baranavicki aktyvist Uładzimir Hundar, aktyvistka Volha Majorava, piensijanierka Iryna Mielchier i jaje syn Anton Mielchier, Iryna Haračkina, Viktar Śniehur i Pavieł Sava. Tolki dvoje ź ich całkam pryznali svaju vinu.
Dajučy pakazańni na sudzie, były supracoŭnik adździeła prymusovaha vykanańnia Leninskaha rajona Bresta Pavieł Rezanovič zajaviŭ, što suprać jaho ŭžyvalisia fizičnyja i psichałahičnyja katavańni dla taho, kab jon padpisaŭ zahadzia padrychtavanyja pakazańni. Rezanovič navat nazvaŭ proźviščy ludziej, adkaznych za katavańni — heta śledčy KDB z Bresta Ciarošyn, a taksama načalnik śledčaha adździeła hrodzienskaha KDB Varaniecki. Jak śćviardžaŭ palitviazień, Ciarošyn pryjšoŭ da jaho z padrychtavanym «scenaram» na čatyry arkušy, jaki Pavieł pavinien byŭ padpisać. Što tyčycca Varanieckaha, to toj pałochaŭ abvinavačanaha karcaram, a taksama sudździami, jakija pakarajuć Rezanoviča «pa maksimumie». Sudździa spytaŭ u Rezanoviča, jak jon, čałaviek ź jurydyčnaj adukacyjaj, moh takoje padpisać. Adkaz byŭ nastupny:
«Supracoŭniki KDB pałochali mianie aryštam žonki, a pa kalidory ŭ toj čas vadzili i bili maci, i ja čuŭ jaje kryki. U takich umovach padpišaš i nie takoje».
Były viazień bresckaha SIZA-7 paćvierdziŭ pravaabaroncam, što, kali pa kalidory vadzili maci Paŭła Luboŭ, jana kryčała tak, što było čutno na ŭvieś izalatar. Pavieł kožny raz vielmi emacyjna reahavaŭ na heta: jon taksama kryčaŭ i kidaŭsia na dźviery, za što jaho niekalki razoŭ kidali ŭ ŠIZA.
Sudździa Maksim Fiłataŭ pryznačyŭ Paŭłu Rezanoviču 19 hadoŭ kałonii, a jaho maci Lubovi — 15 hadoŭ.
«U lesie dopyt ź pistaletami». Były palitviazień Alaksiej Kavaleŭski ŭciakaŭ z krainy paśla suda, ale staŭ fihurantam spravy «rejkavych partyzan»
33-hadovaha prahramista ź Minska Alaksieja Kavaleŭskaha zatrymali letaś u śniežni za ŭdzieł u akcyjach pratestu ŭ žniŭni 2020 hoda. Paśla čatyroch miesiacaŭ u SIZA-1 pa «narodnym» 342-m artykule Kryminalnaha kodeksa jaho asudzili da dvuch hadoŭ «chimii» i adpuścili da nakiravańnia ŭ papraŭčuju ŭstanovu. Alaksiej vyrašyŭ adrazu źjechać: jon vyjšaŭ na ludziej, kab źjechać u Litvu, ale ŭsio skončyłasia čarhovym zatrymańniem. Alaksiej patrapiŭ u śpiecapieracyju KDB, jakaja zajmałasia spravaj babrujskich «rejkavych partyzan» i Alesi Bunievič. Źbivańni, daroha ŭ bahažniku, dopyt u lesie, izalatary Hrodna i Mahilova — heta toje, što pieražyŭ Alaksiej za niaŭdałuju sprobu ŭciačy ź Biełarusi.
Alaksieja asudzili 31 sakavika pavodle č. 1 art. 342 Kryminalnaha kodeksa (udzieł u dziejańniach, jakija hruba parušajuć hramadski paradak) za ŭdzieł u akcyjach pratestu 9 i 16 žniŭnia 2020 hoda da dvuch hadoŭ abmiežavańnia voli z nakiravańniem va ŭstanovu adkrytaha typu. Kali Alaksieja vypuścili paśla prysudu da nakiravańnia na «chimiju», jon vyrašyŭ adrazu ž pakinuć Biełaruś i pačaŭ šukać vyjście. Na nastupny dzień jon užo byŭ u Hrodnie dla vyjezdu z krainy, ale hetaja sproba skončyłasia žorstkim zatrymańniem:
«Ale čamuści čałaviek, jaki mnie dapamahaŭ, vyrašyŭ arhanizavać hrupu, kab ja pierabiahaŭ miažu nie adzin, a ź inšymi ludźmi. U vyniku my musili pierasiakać miažu ŭtroch. I voś ja sadžusia ŭ mašynu da ludziej, ź jakimi musili pierachodzić miažu. My tolki adjazdžajem ad Hrodna — nas adrazu maksimalna žorstka prymaje KDB. Mašynu tolki spyniaje DAI, kiroŭca nie paśpieŭ zaciahnuć ručnik, užo adčyniajucca dźviery — mnie prylataje ŭdar pa skivicy i ludzi stajać tykajuć pistaletami. Adrazu — «mordaj u padłohu» i kuča ŭdaraŭ, jakija ŭžo nie źličyć. Potym nas z kiroŭcam viazuć u bahažniku ŭ les, tam dastajuć i źbivajuć, u tym liku bjuć elektrašokieram. U lesie pravodziać dopyt ź pistaletami. Supracoŭniki byli ŭ cyvilnym.
Jak vyjaviłasia, u majoj hrupie musili pierasiakać miažu «rejkavyja partyzany» z Babrujska. Ich zatrymali zadoŭha da hetaha, a naša zatrymańnie było insceniroŭkaj. Ludzi z našaj mašyny, jakija niby mielisia z nami pierabiahać miažu, byli padstaŭnyja supracoŭniki. Ja heta zrazumieŭ adrazu. Kali nas zatrymlivali, to hetyja trymali mianie za ruki ŭ samoj mašynie. Voś u mianie «paplečniki» — trymajuć, kali mianie zatrymlivajuć! Usio tupa, pa-idyjocku i nieprafiesijna. Potym jany razyhryvali scenku z prastrelenymi kaleniami. Kryčali, što i nam prastrelać taksama. Bili tak, kab jak byccam źnieprytomnieŭ, ale mianie ž dapytvajuć — maksimalna dziŭna heta było. Usia hetaja śpiecapieracyja była, kab złavić čałavieka, jaki dapamahaje ź pierachodam miažy. Da nas u les na dopyt potym pryvieźli Alesiu Bunievič».
«Ja dumaŭ, što prosta nie dajedu». Pieršaha zatrymanaha pa «spravie ČKB» asudzili da 11 hadoŭ kałonii
U Minskim haradskim sudzie 8 lutaha ahučyli prysud dvum palitźniavolenym eks-supracoŭnikam «Biełtelekama» — Alaksieju Byčkoŭskamu i Arciomu Parchamoviču. Za «źliŭ danych» u telehram-kanał «Čornaja kniha Biełarusi» sudździa Śviatłana Bandarenka asudziła ich pa vaśmi artykułach Kryminalnaha kodeksa da 11 hadoŭ kałonii ŭzmocnienaha režymu kožnaha. Sud prachodziŭ u zakrytym režymie.
Pavodle adnoj z administratarak telehram-kanała «ČKB» Volhi Vysockaj, jakuju ciapier zavočna sudziać, Arciom Parchamovič byŭ pieršym čałaviekam, jakoha zatrymali za supracoŭnictva z ČKB pa źlivie hubazaŭca Artura Hajko. 26 kastryčnika MUS vykłała videa z Parchamovičam: jon raskazvaŭ ab supracoŭnictvie z ČKB, na nosie i brovach u jaho byli prykmietnyja ranki. U toj ža dzień byŭ zatrymany Alaksiej Byčkoŭski, choć jany nie byli znajomyja pamiž saboj.
Paźniej žonka Byčkoŭskaha raspaviała «Našaj Nivie», što muža vielmi źbili paśla zatrymańnia:
«Muža źbili, kałacili da paŭśmierci pry zatrymańni. Bo ja havaryła z tymi, chto bačyŭ jaho paśla zatrymańnia, muž byŭ u žudasnym stanie, pa ich słovach.
Ja nie chaču navat havaryć, što ź im rabili — heta prosta pryniźliva dla jaho. Ale, mnie skazali, jaho bili elektrašokieram, jon hublaŭ prytomnaść…
Dzie jaho bili, ja nie viedaju. Ale ja havaryła z kalehami muža, jany raskazali, što siłaviki pasadzili jaho ŭ bus — i mašyna jašče davoli doŭha stajała prosta la budynka «Biełtelekama» na Matusieviča. Paśla tolki jaho dastavili ŭ Śledčy kamitet. A sam muž napisaŭ u adnym ź listoŭ pra darohu ŭ SK: «Ja dumaŭ, što prosta nie dajedu».
«Vysocki kryčaŭ: «Ubju n*j, jeśli čto-to udališ». Mastaku Dźmitryju Padrezu pryznačyli 7 hadoŭ kałonii
15 sakavika 2022 hoda Minski haradski sud vynies jašče adzin prysud pa «spravie Čornaj knihi Biełarusi» suprać palitźniavolenaha stryt-art mastaka (viadomaha jak Dzima Dream) i IT-śpiecyjalista Dźmitryja Padreza — siem hadoŭ kałonii va ŭmovach uzmocnienaha režymu. Dźmitryja zatrymali 15 lipienia minułaha hoda — tady siłaviki na viaroŭkach praz akno ŭvarvalisia ŭ kvateru ajcišnika. Pravaabaroncam «Viasny» tolki viasnoj hetaha hoda ad jaho byłoha sukamiernika stała viadoma pra źbićcio i ździeki z boku supracoŭnikaŭ HUBAZiKa z palitviaźnia padčas zatrymańnia. Supracoŭniki SACHRa na viaroŭkach z dachu spuskalisia ŭ kvateru mastaka. Paśla taho, jak jany patrapili ŭ kvateru, zapuścili supracoŭnikaŭ HUBAZiKa, siarod jakich byli Valer Vysocki, Astaška i Vołkaŭ.
«Zabiehli ŭ vanny pakoj, zachapili i pakłali ŭ pakoi. Na ruki — kajdanki. Supracoŭnik HUBAZiKa Vysocki dastaŭ z palicy źlepak hipsavaj ruki, naciahnuŭ preziervatyŭ i kaža: «Davajcie ŭstavim ŭ zadni prachod». Ale pakłaŭ hipsavuju ruku kala hałavy. A pierad hetym sachraviec udaryŭ nahoj pa ściohnach, a inšy — palčatkaj pa tvary. Spytali parol — Dźmitryj daŭ.
Pry pieratrusie hubazaviec Vysocki ŭziaŭ karcinu mastaka Zachara Kudzina i parezaŭ jaje trojčy sa słovami: «Tak budiet krasivieje». Potym parezaŭ fotakarciny. Potym Vysocki ŭziaŭ stary noŭtbuk, razłamaŭ jaho na dźvie častki, stuknuŭ adnoj častkaj pa kamodzie sa słovami: «Tiepieŕ točno nie rabotajet».
U chatniaj biblijatecy znajšli ruska-polski razmoŭnik. Hubazaviec Astaška ŭdaryŭ razmoŭnikam pa tvary sa słovami: «Ty čto, b*, nie patriot?»
Kali prahladzieli noŭtbuk, Vysocki kryčaŭ: «Ubju nach*j, jeśli čto-to udališ».
Potym hubazaŭcy Vysocki i Vołkaŭ bałončykam u kalidory na ścianie napisali «UKB». Parvali kanapu, kali krucili jaje. Kvateru nie dali začynić.
Pavieźli ŭ HUBAZiK, kali padjechali, Vysocki skazaŭ: «Dobro požałovať v hiestapo», — raspavioŭ były sukamiernik Dźmitryja.
«Jon byŭ uvieś sini: ad kanca pazvanočnika i amal da piatak». Eks-śledčaha Staraženku asudzili da 7 hadoŭ kałonii
2 śniežnia Minski haradski sud ahučyŭ prysud palitźniavolenamu byłomu śledčamu Mikitu Staraženku — siem hadoŭ kałonii va ŭmovach uzmocnienaha režymu. Sa słoŭ jaho byłoha sukamiernika, mienavita Staraženka byŭ pryznačany ŭ 2020 hodzie vieści spravu suprać 16-hadovaha źbitaha siłavikami chłopca (vierahodna, havorka idzie pra Cimura Mickieviča) — tady Mikita zvolniŭsia sa śledčych orhanaŭ. Jaho abvinavacili ŭ «źlivie» kantaktaŭ siłavikoŭ «pratesnym kanałam».
Mikita byŭ brutalna zatrymany 1 lutaha 2022 hoda ŭ Minsku ŭ handlovym centry. Na «pakajalnym» videa jon vyhladaŭ vielmi napałochanym, a na tvary byli bačnyja paškodžańni. Jaho sapraŭdy źbivali paśla zatrymańnia — heta «Viaśnie» paćvierdziŭ jahony sukamiernik.
«Kali Mikita pryjšoŭ u kamieru, to byŭ vielmi napałochany, tamu što jaho pužali tym, što adpraviać u kamieru da «pieŭniaŭ», dzie jaho buduć źbivać. Pužali, što praz toje, što pracavaŭ śledčym, adpraviać jaho da «maciorych». My kali ŭbačyli, što jon źbity, zrazumieli, što jon nijaki nie padstaŭny. My razumieli, što adčuvaje čałaviek u takija chviliny, tamu aściarožna siabie ź im pavodzili. Jaho napužali 12-hadovym terminam.
Jon byŭ uvieś sini: ad kanca pazvanočnika i amal da piatak. U jaho byli navat nie sinija, a ciomna-fijaletavyja nohi. Na tvary i na hałavie byli ranki, ślady ad kajdankoŭ. Mikita raskazvaŭ, što bili nahami, dubinkami, namotvali anuču na hałavu, nadziavali viadro dla śmiećcia na hałavu i bili pa viadry, kab śladoŭ źbićcia nie zastavałasia. Ale ŭsio adno ŭ jaho było raśsiačeńnie na nosie, kala vucha była vialikaja ranka. Vidać, pa nosie jamu patrapiła narmalna, tamu što jon jašče i čyrvony byŭ. Taksama ŭ jaho byli apuchłyja vusny, siniak na padbarodku».
«U CIP jon pryjechaŭ z całkam fijaletavymi nahami». Byłoha pres-sakratara «A1» Mikałaja Bredzieleva asudzili da 4 hadoŭ kałonii
U Minskim haradskim sudzie 24 kastryčnika da čatyroch hadoŭ kałonii va ŭmovach ahulnaha režymu asudzili 35-hadovaha palitźniavolenaha kiraŭnika ŭpraŭleńnia suviaziaŭ z hramadskaściu kampanii A1 Mikałaja Bredzieleva. Jaho abvinavacili ŭ «finansavańni dziejnaści ekstremisckaha farmavańnia» (art. 361-2 Kryminalnaha kodeksa) za toje, što nibyta błohier Anton Matolka na svaim kanale pijaryŭ A1 sa žniŭnia pa śniežań 2020 hoda. Chacia telehram-kanał «MatolkaPamažy» byŭ pryznany «ekstremisckim farmavańniem» tolki 17 sakavika 2022 hoda. Paśla zatrymańnia Mikałaja ŭ śniežni 2021 hoda stała viadoma, što siłaviki jaho źbivali, ale nie byli viadomyja padrabiaznaści. Sukamiernik Mikałaja z Centra izalacyi pravaparušalnikaŭ na Akreścina niadaŭna raspavioŭ «Viaśnie», u jakim stanie Bredzieleŭ trapiŭ u kamieru.
Mikałaj Bredzieleŭ ź siabram Alaksiejem byŭ zatrymany 10 śniežnia 2021 hoda supracoŭnikami HUBAZiKa. Jaho były sukamiernik raspaviadaje, što Mikałaja ŭ CIP pryvieźli ŭsiaho źbitaha:
«U CIP jon pryjechaŭ z całkam fijaletavymi nahami, źbivali mocna. Miarkujučy pa jaho stanie — prymali žorstka. My — 15—20 čałaviek — spali na padłozie, tamu raspranalisia da majtkoŭ, bo aciapleńnie było na maksimumie. Tamu ŭsie bačyli siniaki Mikałaja. Heta byli prama čorna-fijaletavyja pa ŭsich ściohnach, na ciele taksama byli: śpina, baki. Nikoli nie zabudu».
Eks-sukamiernik Mikałaja uspaminaje, što toj nie raspaviadaŭ padrabiaznaści svajho zatrymańnia. Pavodle jaho, jon navat vykazać zdahadku nie moža, čym i jak treba było źbivać čałavieka, kab utvarylisia takija hiematomy:
«Kali dubinkaj, to treba vielmi šmat razoŭ udaryć, kab atrymać takoje sucelnaje zalivańnie».
Mikałaja zatrymlivali ź jaho siabram Alaksiejem. Jaho sukamiernik raspaviadaŭ, što toj taksama byŭ mocna źbity:
«Mikałaja Bredzieleva i jaho siabra-advakata Alaksieja, jak ja viedaju, zatrymlivali razam i vielmi žorstka. Ich źbili, u kvatery truščyli techniku. Advakat byŭ siniušny: nohi ŭ siniakach, pajaśnica, siniak pad vokam».
Jak adrazu paviedamlałasia ŭ praŭładnych telehram-kanałach, dzie było apublikavana i «pakajalnaje» videa z Bredzielevym, Mikałaj nibyta ź lipienia 2020-ha pieradavaŭ trecim asobam infarmacyju, źviazanuju ź jaho prafiesijnaj dziejnaściu (danyja klijentaŭ A1), ale potym u kampanii zajavili, što Bredzieleŭ nie mieŭ dostupu da danych klijentaŭ.
«Jaho vazili na dopyt ź CIPa i, jak ciapier pamiataju, jon pryjechaŭ nazad i skazaŭ, što śledčyja pryznajuć, što na jaho niama ničoha i maŭlaŭ «jaho padstavili». Jon zaŭsiody śćviardžaŭ, što ŭ jaho niama navat dostupu da hetaj infarmacyi, u źlivie jakoj jaho padazravali».
Užyvali hvałt i katavańni. Dźmitryj Sasnoŭski pa «spravie AHSB» asudžany da 20 hadoŭ kałonii
Minski abłasny sud 5 śniežnia vynies prysud pa «spravie «Atradaŭ hramadzianskaj samaabarony Biełarusi», pa jakoj prachodziać adrazu piać čałaviek — Dźmitryj Sasnoŭski, Alaksiej Hłotaŭ, Natalla Maćviejeva, Vadzim Hulevič, Kiryła Ašurak. Ahułam ich asudzili pa dziesiaci artykułach Kryminalnaha kodeksa, u tym liku za teraryzm, za sprobu padryvu vuzła suviazi vajskova-marskoha fłotu Rasii ŭ Vilejcy, zamach na prapahandysta Ryhora Azaronka i sprobu źniščyć lesanarychtoŭčuju techniku ŭ lashasach.
Dźmitryj Sasnoŭski — adziny pa spravie, chto nie pryznaŭ vinu ŭ akcie teraryzmu ŭ dačynieńni da prapahandysta Azaronka, zajaviŭšy što «heta była pravakacyja pravaachoŭnych orhanaŭ».
«Majo sumleńnie čystaje, ja ničoha nie ździajśniaŭ, na rolu terarysta ja dakładna nie padychodžu», — zajaviŭ Dźmitryj.
Na sudzie jon zajaviŭ sudu, što paśla zatrymańnia kala doma Azaronka da jaho «ŭžyvali hvałt i katavańni, prymusili napisać čystasardečnaje pryznańnie».
Zajavy Sasnoŭskaha ab katavańniach sudom nie byli pryniatyja da zaŭvahi. Sudździa Siarhiej Jepichaŭ pryznačyŭ jamu 20 hadoŭ kałonii.
Apranali pakiet na hałavu, było nie mienš za 50 udaraŭ. Anatola Łatušku asudzili da 6 hadoŭ kałonii
20 vieraśnia sud Centralnaha rajona Minska asudziŭ palitviaźnia, stryječnaha brata palityka Paŭła Łatuški, Anatola Łatušku da šaści hadoŭ kałonii i štrafu ŭ 300 bazavych vieličyniaŭ. Padčas suda byli ahučanyja padrabiaznaści prymianieńnia fizičnaj siły da jaho ŭ Centralnym RUUS. Padčas śledstva Łatuška raspaviadaŭ:
«31 studzienia 2022 hoda kala 01:00 ja byŭ zatrymany pablizu doma, dastavili ŭ Centralnaje RUUS, praviali na čaćviorty pavierch u adzin z kabinietaŭ, dalej pačali kamunikavać supracoŭniki, jakija tam znachodzilisia. Supracoŭnik apranaŭ mnie dva razy na hałavu polietylenavy pakiet, pry hetym jany tłumačyli, što chočuć atrymać ad mianie niejkija źviestki, pra jakija ja sam nie viedaŭ. Chtości z supracoŭnikaŭ uziaŭ u ruki dubinku, pačaŭ pahražać joj…» [sudździa prapuściŭ častku tekstu].
«Pra ŭdary niejkija, nie mienš za 50 razoŭ…» — praciahvaje sudździa.
«Kazali ab tym, što chočuć atrymać ad mianie infarmacyju, što datyčycca niejkich tielehram-kanałaŭ. Ja nie razumieŭ, što ad mianie chočuć. Ad taho, što na mianie akazvajuć fizičny cisk, ja pahadziŭsia davać pakazańni, jakija mnie skazali supracoŭniki milicyi. Pry hetym pa fakcie ja nazvanych złačynstvaŭ nie ździajśniaŭ. U dalejšym, kali ja pačaŭ davać pakazańni, fizičnuju siłu da mianie taksama supracoŭniki milicyi nie ŭžyvali. Dalej mianie spuścili ŭ dziažurnuju častku, i na nastupny dzień ja pracavaŭ sa śledčym. U dalejšym fizičnuju siłu da mianie nichto nie ŭžyvaŭ. Chaču ŭdakładnić, što ludzi, jakija pradstavilisia supracoŭnikami HUUS, pakinuli kabiniet da pačatku prymianieńnia da mianie fizičnaj siły», — skazana ŭ tłumačeńni Łatuški.
Na sudzie palitviazień paćvierdziŭ hetyja fakty.
***
Kali vy paciarpieli ad katavańniaŭ z boku siłavikoŭ ci sutyknulisia ź biesčałaviečnym i žorstkim abychodžańniem u SIZA, parušeńniem pravoŭ čałavieka — kali łaska, pišycie na: Telegram: @ViasnaDOC | Email: [email protected]. Taksama vy možacie raspavieści svaju historyju žurnalistam «Viasny»: @Spring96info. Usia infarmacyja moža być ananimnaj ci publičnaj. My pracujem anłajn i maksimalna biaśpiečna.
