«Paciahnuŭ mianie za ich navierch pa leśvicy — prosta jak pakiet»
U miežach kryminalnaj spravy Alaksandra zatrymali sioleta ŭviesnu. Jaho, jak i šmatlikich biełarusaŭ, identyfikavali praz zdymak z maršaŭ i raspačali suprać jaho kryminalnuju spravu pavodle č. 1 art. 342 Kryminalnaha kodeksa (aktyŭny ŭdzieł u dziejańniach, jakija hruba parušajuć hramadski paradak). Supracoŭniki HUBAZiKa žorstka zatrymlivali Alaksandra 14 krasavika.
«Kala 11-j hadziny ranicy ja pračnuŭsia ad mocnaha hrukatu ŭ dźviery. Ja adrazu padumaŭ, što pryjšli supracoŭniki milicyi, ale nadoječy moj susied pa kvatery zabyŭsia klučy i dakładna hetak ža hrukaŭ u dźviery, tamu ja nie byŭ upeŭnieny, chto heta. Susied nie adkazvaŭ na majo paviedamleńnie, i chvilin praz 15 ja vyjšaŭ z doma pakuryć. Da mianie padyšoŭ chłopiec i paprasiŭ cyharetu — ja jamu addaŭ svaju. Potym z mašyny vyjšaŭ inšy mužčyna i taksama paprasiŭ cyharetu. Ja zrazumieŭ, što heta supracoŭniki milicyi, tamu pačaŭ uciakać.
Ja kinuŭ svoj telefon na leśvicu, kab raźbić jaho i nie dać dostup siłavikam. Supracoŭnik pavaliŭ mianie i pačaŭ bić pa hałavie. Jon nadzieŭ mnie kajdanki i paciahnuŭ mianie za ich navierch pa leśvicy — prosta jak pakiet. Paśla hetaha ŭ mianie niekalki miesiacaŭ było źniamieńnie vialikaha palca na adnoj ruce».
Pabity televizar, vydranaja staronka pašparta i vykradzienyja hrošy
Kali siłaviki pryciahnuli Alaksandra da jahonaj kvatery, to pačali bicca ŭ dźviery, niahledziačy na toje, što chłopiec addaŭ im kluč. Trapiŭšy ŭ kvateru, supracoŭniki adrazu spytali, dzie lažyć bieł-čyrvona-bieły ściah.
«Ja skazaŭ dzie — jany zabrali ściah. A pierad hetym supracoŭnik, jaki mianie źbivaŭ, raźbiŭ televizar i, jak paśla vyśvietliłasia, inšuju techniku. Ja stajaŭ tvaram da ściany, tamu nie bačyŭ, čym mienavita jon raźbivaŭ, ale, chutčej za ŭsio, dubinkaj. Kali ja pacikaviŭsia, navošta było raźbivać, jon abhruntavaŭ heta tym, što ja raźbiŭ telefon i niby kinuŭ jaho ŭ ich.
Paśla jon pakazaŭ mnie fatahrafiju «Biełsata» z pratestaŭ i pačaŭ pytacca, dzie adzieńnie, u jakim ja tady byŭ. Kali nie znachodzili štości, to jon «udrukoŭvaŭ» mianie hałavoj u ścianu».
Pry hetym usim nie było paniatych, pastanovy na vobšuk taksama nie skłali.
«Hety vobšuk naohuł nie fihuravaŭ u materyjałach kryminalnaj spravy. Nibyta mianie zatrymali na Akreścina paśla praviedzienaj pravierki z nahody publikacyi kanałam «Žoŭtyja ślivy» reposta majho «pakajalnaha» videa i fota vobšuku z kanała HUBAZiKa».
Pavodle Alaksandra, supracoŭnik, jaki źbivaŭ chłopca, vyrvaŭ hałoŭnuju staronku ź jahonaha pašparta. U pašparcie lažała 180 dalaraŭ i 5 rubloŭ.
«Kali mianie pryvieźli ŭ Zavodski RUUS, to vyśvietliłasia, što ŭ mianie vyniaty tolki 30 dalaraŭ, 15 rubloŭ i maniety. Adkul źjavilisia jašče 10 rubloŭ — ja nie viedaju. Mahčyma, heta kampiensacyja za 150 dalaraŭ, jakija byli vykradzienyja razam z pašpartam i vajennym biletam. Ja admaŭlaŭsia padpisvać vopis. Na niejkim etapie źnikli i 15 rubloŭ: ci to ŭ RUUS, ci to na Akreścina. Tak što mianie abakrali dvojčy. Nie viedaju, chto mienavita z supracoŭnikaŭ HUBAZiKa vykraŭ 150 dalaraŭ, ale pa ironii losu adzin ź ich hadoŭ vosiem tamu šukaŭ dla mianie skradzienuju reč. Pra heta jon raskazaŭ mnie sam».
Taksama ŭ chłopca zabrali kala 30 listoŭ ad palitviaźniaŭ, jakija paźniej dałučyli da kryminalnaj spravy. Siarod ich byŭ adkaz ad Marfy Rabkovaj.
«Kali my jechali ŭ HUBAZIK, to jany śmiajalisia, što ŭ Rabkovaj zuby pasypalisia. U SIZA ŭmovy takija, što troch miesiacaŭ dosyć, kab zuby zrabilisia vielmi krochkimi. U mianie samoha paśla čatyroch z pałovaj miesiacaŭ za kratami zuby pačali kryšycca. Taksama praź vielmi drennaje aśviatleńnie tam šmat u kaho psujecca zrok».
«Pačaŭ mianie bić, kab ja zapisaŭ videa»
Pa pryjeździe ŭ HUBAZiK Alaksandra pakłali tvaram u padłohu i praciahnuli źbivać.
«Jany pryvodziać u kabiniet i adrazu pačynajuć, pa sutnaści, katavańni. Mianie bajalisia mocna bić, tamu što ja vielmi chudy. Tak što va ŭsim jość svaje plusy. Adrazu mianie bili čymści pa azadku. Ja nie viedaju, što heta było, ale, napeŭna, mietaličny stryžań, jaki znachodzicca ŭsiaredzinie dubinki.
Mianie źbivaŭ tolki adzin supracoŭnik, i jamu heta dakładna padabałasia. U adzin momant jon skazaŭ svajmu kalehu: «Pahladzi, jon nie baicca bolu». Paśla čaho niejak stuknuŭ zzadu pa maim vuchu, što jano imhnienna apuchła i pavialičyłasia ŭ niekalki razoŭ».
Paśla źbivańniaŭ supracoŭniki HUBAZiKa paviali chłopca zapisvać «pakajalnaje» videa:
«Spačatku ja admaŭlaŭsia zapisvacca. Tady mnie supracoŭnik skazaŭ: «Što, mnie klikać na dapamohu?» U vyniku jon paklikaŭ taho, chto mianie źbivaŭ. I jon iznoŭ pačaŭ mianie bić, kab ja zapisaŭ hetaje videa. Ja ahučyŭ toje, pra što jany viedali z majho telefona. Ja prosta pryznaŭsia, što ja vychodziŭ na pratesty i prajeznuju častku i zarehistravaŭsia ŭ čat-bocie «Pieramoha».
Jany chacieli, kab ja skazaŭ, što nie zmoh uciačy ad ich, tamu što jany chutkija, ale ja skazaŭ, što nie zmoh uciačy, tamu što vielmi šmat kuru. U vyniku heta nie ŭvajšło ŭ videa. Doma ŭ mianie byli bieła-čyrvonyja šapka i šalik — jany heta nadzieli na mianie da zapisu. Akramia taho, jany nalapili mnie na łob paštovyja marki z pamidorami. Paśla chtości skazaŭ im adkleić».
Kryminalnuju spravu suprać chłopca za rehistracyju ŭ čat-bocie «Pieramoha» nie raspačali.
«Tak supała, što ŭviečary, napiaredadni zatrymańnia, mnie pryjšło paviedamleńnie ad čat-bota z prośbaj vyjści na suviaź. Pašancavała, što ja hetaha nie zrabiŭ. Jak skazała śledčaja, pa fakcie rehistracyi spravy nie zavodziać. Ahulnaja kryminalnaja sprava pa płanie «Pieramoha» jość, ale kali ty paśla rehistracyi nie ździajśniaŭ nijakich dziejańniaŭ, to asobnaj spravy nie budzie. Adnak paźniej pačałasia pravierka ŭ dačynieńni da mianie. Nie viedaju, ci źviazana heta z maimi ŭciokami abo ja prosta svoječasova pakinuŭ krainu».
U RUUS zamiest tualeta butelka, na Akreścina ŭ 8-miascovaj kamiery — da 43 čałaviek
Paśla HUBAZiKa Alaksandra dastavili ŭ RUUS ź litaralna sinimi ad źbivańniaŭ jahadzicami i nahami.
Adrazu na jaho skłali pratakoł pavodle art. 19.11 KaAP za «raspaŭsiud ekstremisckich materyjałaŭ»: nahodaj staŭ repost artykuła pra zdaroŭje z sajta «Naša Niva».
Kali Alaksandr admoviŭsia padpisvać pratakoł, to supracoŭnik milicyi stuknuŭ jaho pa hałavie pry lekaru, jaki musiŭ pravodzić ahlad, ale hetaha nie zrabiŭ. Da ranicy chłopca trymali ŭ miascovaj kamiery, dzie zamiest tualeta była butelka. Zranku nad Alaksandram adbyŭsia sud. Praces prachodziŭ anłajn u prysutnaści ŭsich zatrymanych u RUUS. Sudździa zadavała pytańni zatrymanym i čaściakom sama ž na ich adkazvała.
Jak zvažaje chłopiec, usim zatrymanym pa niepalityčnych matyvach pryznačali da 5 sutak, a pa palityčnych — 15. Paśla hetaha ŭ bitkom nabitaj milicejskaj mašynie, dzie niemahčyma było ani siadzieć, ani stajać, jaho advieźli ŭ CIP na Akreścina. U vaśmimiesnaj kamiery ŭtrymoŭvałasia adnačasova da 43 čałaviek. U kamieru pieryjadyčna «padsialali bamžoŭ», u jakich byli vošy. Alaksandr bačyŭ mocna źbitych ludziej.
«Byli ludzi z całkam sinimi nahami. Heta samaje raspaŭsiudžanaje. Ale mianie bili pa hałavie, tamu byli siniaki i pad vačyma. U mianie vielmi drenny zrok, ale pry pastupleńni ŭ CIP adzin z supracoŭnikaŭ admoviŭsia mnie vydać akulary, skazaŭšy, što za 15 sutak pačnu bačyć».
Paśla administracyjnaha aryštu na Akreścina Alaksandru vystavili abvinavačvańnie pavodle č. 1 art. 342 Kryminalnaha kodeksa i pieraviali ŭ IČU ŭ miežach kryminalnaj spravy. Tam chłopiec pabyvaŭ u adnamiesnym karcary, dzie znachodziłasia da 8—12 čałaviek.
«U karcary byŭ chłopiec hadoŭ vasiamnaccaci, jakoha katavali elektrašokieram, — u jaho byli šmatlikija apioki. Pryčym jaho zatrymali za toje, što jon kryptavalutaj apłačvaŭ niejkuju internet-hulniu, ale jaho abvinavačvali ŭ tym, što jon finansavaŭ pratesty. Na momant hetych apłat jamu było 16 hadoŭ. Taksama byŭ chłopiec, jaki, pavodle jaho słoŭ, «uskryŭ» sabie žyvot u miescach źniavoleńnia, źbieh ź lakarni paśla apieracyi, doŭha chavaŭsia, ale jaho zatrymali znoŭ».
Akreścinskaja miedsiastra admaŭlała ŭ miedycynskaj dapamozie zatrymanym pa palityčnych matyvach
Pavodle chłopca, niekatoryja supracoŭniki IČU pavodzili siabie ahresiŭna, abražali, mahli stuknuć. Vyvodzili «łastaŭkaj», nachiliŭšy hałavu da kaleniaŭ. Asablivaj starannaściu vyłučaŭsia ŭžo davoli viadomy «Miša Bałakłava». Alaksandr taksama ŭzhadvaje žorstkaść akreścinskaj miedsiastry sa śvietłymi doŭhimi kučaravymi vałasami:
«Ja ź joj užo sutykaŭsia ŭletku 2021 hoda, kali mianie zatrymali biez tłumačeńnia pryčyn na pracy i adpravili na sutki niby za niepadparadkavańnie supracoŭniku. Mahčyma, heta taja, jakaja pytałasia ŭ siłavikoŭ «Chłopčyki, čamu tak mała pabitych hałoŭ?» paśla 9 žniŭnia 2020 hoda.
Jana admaŭlałasia akazvać miedycynskuju dapamohu zatrymanym pavodle palityčnych matyvaŭ. Kali da jaje źviartalisia, to jana zapytvała artykuł, i kali artykuł palityčny, to jana prosta razvaročvałasia i sychodziła. Na pravierkach, na jakich jana prysutničała, zaŭsiody padkołvała nas. Kali prasili lekara, to kazała, što my abydziemsia».
Pierapoŭnienyja kamiery na «Vaładarcy» — prynamsi adzin čałaviek spaŭ na padłozie
Paśla vaśmi sutak u IČU na Akreścina chłopca pieraviali ŭ SIZA na Vaładarskaha. Tam jon prabyŭ amal čatyry miesiacy.
«U pieršyja dni ŭ SIZA złaviŭ na sabie adnu voš, tamu daznaŭsia, što takoje «pražarka». Ciabie viaduć u sančastku, stryhuć, apracoŭvajuć hałavu, adpraŭlajuć u duš, a ŭsie rečy źmiaščajuć u admysłovuju piečku. Uletku vielmi ciažka znachodzicca na «Vaładarcy», tamu što vielmi dušna i horača — uvieś čas usie mokryja. Pavietra brakuje, a jašče i kurać non-stop u kamiery. Va ŭsich tam štodnia balić hałava. U mianie paśla hetaha staŭ padvyšany cisk, choć raniej takoha nie było.
Z druhoj pałovy leta na «Vaładarcy» byli pierapoŭnienyja kamiery. Niekatoryja ludzi spali na padłozie. Tam i biez hetaha vielmi ciesna. Sa słoŭ supracoŭnikaŭ i «dziadoŭ», raniej takoha nie było nikoli. Spačatku ja byŭ u kamiery na vosiem miescaŭ, dzie adnačasova mahło znachodzicca da 12 čałaviek. Potym ja byŭ u 12-miascovaj kamiery, dzie nas mahło być da 16 čałaviek. Ź siaredziny leta ŭ nas amal zaŭsiody minimum adzin čałaviek spaŭ na padłozie [u kancy leta Alaksandra asudzili da «chatniaj chimii» i adpuścili]».
Jak suprać palitviaźniaŭ fabrykujuć spravy pa «parnahrafičnych» artykułach
Chłopiec raspaviadaje, što pieršapačatkova zatrymanym pavodle palityčnych artykułaŭ pradjaŭlajuć i inšyja nadumanyja abvinavačvańni, u tym liku za «vyrab dziciačaj parnahrafii i ździajśnieńnie inšych dziejańniaŭ seksualnaha charaktaru» za fota ci videa z chatniaha archivu, dzie mužčyny, naprykład, kupajuć svaich maleńkich dziaciej. Tak zdaryłasia z adnym ź jahonych sukamiernikaŭ, jakoha zatrymali pa «spravie Zielcera», — kali sprava suprać jaho «razvaliłasia», to jamu vystavili «parnahrafičnyja» artykuły, vykarystoŭvajučy šantaž i pahražajučy pieraśledam čalcoŭ siamji.
«Tak i ź inšymi pa «spravie Zielcera», kaho za hod nie zmahli asudzić pa joj. Prychodziŭ supracoŭnik HUBAZiKa, ich vyklikali, prasavali i prymušali pryznavacca ŭ tym, čaho jany nie ździajśniali. Paśla hetaha ich nakiroŭvali da śledčaha.
Pa «spravie Zielcera» siadziać za zusim biaskryŭdnyja kamientary, za prosty smajlik, za malunačak z vyjavaj ruki, jakaja trymaje «Oskar». Chtości prosta napisaŭ: «Škada chłopca». U šmatlikich kamientarach navat ekśpiertyza nie vyjaviła ni raspalvańnia varažniečy, ni abrazy kaho-niebudź. Pa adnoj palityčnaj spravie ekśpiertyza ničoha nie vyznačyła, pa sutnaści, razvaliŭšy abvinavačvańnie, ale sudździa skazaŭ, što heta novaja forma pratestu».
Čyrvona-biełyja majtki jak dokaz pa spravie na sudzie
U prysudzie dokazami viny Alaksandra, aproč listoŭ ad palitviaźniaŭ i adzieńnia, u jakim chłopiec byŭ na fota z maršaŭ, taksama fihurujuć bieła-čyrvonyja šalik, šapka i majtki.
«Kali šalik i šapku ja chacia b sapraŭdy kupiŭ jak pratesnuju simvoliku, praŭda, užo paśla zaviaršeńnia maršaŭ, to majtki byli nabytyja šmat hadoŭ tamu i jany prosta čyrvonyja ź biełym. Pieršapačatkova śledčaja napisała, što majtki bieł-čyrvona-biełyja. Ale sudździa, mabyć, zadumałasia nad tym, jaki heta absurd, tamu ŭ prysudzie jany stali bieła-čyrvonymi.
Ja tak dahetul i nie zrazumieŭ, jak majtki dakazvajuć błakavańnie daroh, jakoje mnie stavili ŭ vinu, bo ja ŭ ich nie razhulvaŭ na darozie. Sudździa pastanaviŭ źniščyć ich. U narodzie jość vyraz «raspranuć da majtkoŭ» u značeńni «zabrać usio», dyk biełaruski sud pajšoŭ jašče dalej i pakinuŭ mianie navat biez majtkoŭ».
29 žniŭnia 2022 hoda Alaksandra asudzili da troch hadoŭ «chatniaj chimii». U metach biaśpieki jon vyrašyŭ pakinuć Biełaruś.
