Fota: AP
Tejbi nazvaŭ apublikavanyja materyjały «fajłami Twitter». Pa słovach žurnalista, u sacsietcy z kožnym hodam rasła kolkaść barjeraŭ dla raspaŭsiudžvańnia infarmacyi, choć pieršapačatkova Twitter zadumvaŭsia jak miesca, dzie takich pieraškodaŭ nie budzie.
«Da 2020 hoda zapyty ad źviazanych subjektaŭ na vydaleńnie tvitaŭ stali zvyčajnaj spravaj. Adzin kiraŭnik pisaŭ inšamu: «Jašče na razhlad ad kamandy Bajdena». Prychodziŭ adkaz: «Apracavana», — skazana ŭ adnym z tvitaŭ Tejbi, jaki jon paćviardžaje skrynam z unutranaj pierapiski kampanii. Jana datavana 24 kastryčnika 2020-ha, to-bok padziei adbyvalisia niezadoŭha da prezidenckich vybaraŭ u ZŠA.
Jak adznačyŭ žurnalist, «pa rasparadžeńni palityčnaj partyi» vydalali publikacyi jak zvyčajnych karystalnikaŭ, tak i znakamitaściaŭ. Zapyty pastupali nie tolki ad Demakratyčnaj partyi, ale i ad respublikancaŭ, Administracyi prezidenta Donalda Trampa ŭ pryvatnaści. Adnak aryjentacyja była chutčej na demakrataŭ, pakazvaje Tejbi.
Tamu, kali ŭ kastryčniku 2020-ha źjaviłasia publikacyja New York Post ab sakretnych elektronnych listach, atrymanych z zabytaha ŭ ramoncie noŭtbuka Chantera Bajdena, Twitter «pryniaŭ nadzvyčajnyja miery, kab schavać [hetuju] historyju».
U pryvatnaści, sacsietka vydalała spasyłki na jaje, raźmiaščała papiaredžańni ab ich «niebiaśpiečnaści» i zabłakavała ich pieradaču praz asabistyja paviedamleńni. Vydaleńnie historyi patłumačyli tym, što jana parušała palityku ŭ dačynieńni da «ŭzłamanych materyjałaŭ».
