Apošnija zamiery hladackich simpatyj rasiejskaj aŭdytoryi pakazali, što prapahandysckija šou Uładzimira Sałaŭjova i Volhi Skabiejevaj upieršyniu za doŭhi čas vypali z top-10 najpapularniejšych pieradač. Z pačatku poŭnamaštabnaj vajny va Ukrainie dźvie hetyja pieradačy ŭvohule ŭvachodzili ŭ top-5, ciapier ža Sałaŭjoŭ spuściŭsia na 17-je miesca, a Skabiejeva — na 13-je.

Dyrektar rasiejskaha «Lavada-centra» Dzianis Vołkaŭ tłumačyŭ, što «hladač paźbiahaje navin pra vajnu, kab zachavać psichičnaje i fizičnaje zdaroŭje».

Tym nie mienš sami pieradačy praciahvajuć vychodzić z zajzdrosnaj pieryjadyčnaściu, a haściami tam vystupajuć nie tolki rasiejskija ŭdzielniki, ale i hości ź Minska.

«Svaboda» pahladzieła, što havaryli ciaham apošnich miesiacaŭ biełaruskija prapahandysty na takich šou.

«Moža, zatrymaješsia na 3-5 hadoŭ»

Samym častym hościem Uładzimira Sałaŭjova źjaŭlajecca kiraŭnik biełaruskaha tavarystva «Viedy», były dekan fiłasofskaha fakulteta BDU Vadzim Hihin. Na efiry jon prychodziŭ 9, 16, 17, 18, 19, 20, 23, 31 kastryčnika, a taksama 6 i 15 listapada.

«Mety denacyfikacyi my całkam padzialajem», — skazaŭ Hihin u efiry 6 listapada.

Jon pierakanany, što rasiejskija sałdaty cudoŭna razumiejuć, za što jany vajujuć, a voś niekatoryja čynoŭniki iduć na damovy z Ukrainaj. U jakaści prykłada jon pryvioŭ tak zvanuju «charčovuju ŭhodu» (pahadnieńnie ab vyvazie ziernia z Ukrainy. — RS). Hihin pierakonvaŭ, što Łukašenka nikoli b nie pavieryŭ «kijeŭskamu režymu», jak heta robiać niekatoryja ŭ Rasiei.

«Łukašenka havaryŭ, što jašče pryjdzie toj čas, kali my z Pucinym budziem razam adstrelvacca. My ŭsio jašče viadziom vajnu ŭ ramkach sistemy, a nie pa-revalucyjnamu, my zastajomsia ŭ ramkach zachodniaj sistemy. I pakul tam zastajomsia, tam vyjhrać pa-vialikamu nie atrymajecca. Vyjhrać možam tolki pa-revalucyjnamu, kali vyrviemsia z hetaj sistemy», — pierakanany Hihin.

Kiraŭnik «Viedaŭ» prapanoŭvaŭ biełarusam, jakija aburajucca, što nie mohuć za miažoj paŭdzielničać u hałasavańni, pryjechać na radzimu. «Pryjazdžaj u Biełaruś i hałasuj. Nu, moža, zatrymaješsia na 3-5 hadoŭ», — žartavaŭ jon, namiakajučy na kryminalny pieraśled.

Taksama Hihin padkreślivaŭ, što, u adroźnieńnie ad Astany ci Jerevana, u Minsku nichto nie prysłuchoŭvajecca da prapanoŭ Zachadu dystancyravacca ad hetaj vajny.

«Mnie raskazvali našy pamiežniki. Vychodzić USU-šnik, navodzić na našaha aŭtamat i robić vyhlad, što stralaje. My čujem zajavy: «A ci nie ŭdaryć nam pa Biełarusi?». Samaja hałoŭnaja terarystyčnaja hrupoŭka na Ukrainie — vyviedka pad kamandavańniem Budanava. Jany rychtavali terakty na našaj terytoryi», — kazaŭ Hihin.

Nijakich dokazaŭ tamu, što Ukraina sapraŭdy rychtavała terakty ŭ Biełarusi, Hihin u rasiejskich efirach nie pryvodziŭ. Toje samaje ŭłaściva i inšym prapahandystam ź Biełarusi.

«Salut u Maskvie, kali taptali rasiejskija ściahi, ciažka zrazumieć»

Nastupnymi pa papularnaści biełaruskimi piersanažami ŭ Sałaŭjova z'ŭlajucca palityčnyja ahladalniki Alaksandr Špakoŭski i Alaksiej Dziermant. I adzin, i druhi nazyvajuć rasiejskaje vojska i rasiejskuju ŭładu «našymi».

Špakoŭski niaredka krytykuje dziejańni rasiejskich uładaŭ za niepaśladoŭnaść, patrabuje bolšaj žorstkaści i zakručvańnia hajek. Naprykład, jaho aburyła śviatkavańnie Dnia horada ŭ Maskvie, kali rasiejskija vojski adstupali ŭ Charkaŭskaj vobłaści.

«Salut u Maskvie, kali ŭ Charkaŭskaj vobłaści zdymali i taptali rasiejskija ściahi — heta ciažka zrazumieć», — kazaŭ jon.

Paśla taho, jak ukrainskija vojski vyzvalili Chierson, Špakoŭski skazaŭ: «My addajom častku Rasiei, i heta treba ŭśviedamlać vajskoŭcam. Heta nie šachmaty, dzie piešku addaŭ — piešku zabraŭ».

Špakoŭski pierakanany, što vajna Rasiejaj nie budzie vyjhranaja, pakul hramadzianie krainy nie pačnuć usprymać jaje jak narodnuju. Jon raskazvaŭ vypadak, jak lacieŭ u Maskvu adnym rejsam z rasiejskim sałdatam, jaki viarnuŭsia z Ukrainy. Toj byccam jamu skazaŭ: «Kali treba, to my znoŭ vierniemsia ŭ Kijeŭ».

«Rasieja była, jość i budzie najvažniejšym faktaram biaśpieki našaj krainy, pastaŭlaje nam zbroju. Ale treba razumieć, što rasiejskija vojski pajšli ź Biełarusi, a Miensk zastaŭsia raźbiracca z ašalełym, usio bolš borzym kijeŭskim režymam, jaki abiacaje nanieści ŭdary pa našaj terytoryi», — kazaŭ Špakoŭski ŭ efiry Sałaŭjova.

Alaksiej Dziermant taksama padaje Rasiei šmat u jakich pytańniach prykład Biełarusi. U pryvatnaści, u pytańni palityčnych represij.

«Niedapuščalna, kab niejkija paskvilanty hłumilisia z hierojaŭ. U nas adrazu ich biaruć za vucha, viazuć u adpaviednyja orhany i nastupaje adkaznaść. Pavinna być pazbaŭleńnie hramadzianstva dla tych, chto ŭciok i nanosić škodu z-za miažy. Svaich zdradnikaŭ my nazaŭždy pavinny vykraślić z našaha žyćcia», — kazaŭ Dziermant.

«Heta hienacyd rasiejcaŭ»

Na efiry rasiejskaj televizii bolej nie zaprašajuć amal nikoha inšaha ź biełaruskich prapahandystaŭ, a voś u prahramach, što vychodziać u internecie, puł našmat bolšy. Naprykład, na šou «Sałaŭjoŭ Live» dastatkova časta prychodzić kiraŭnik Biełaruskaha sajuza žurnalistaŭ Andrej Kryvašejeŭ.

«Heta hienacyd rasiejcaŭ pa ŭsim śviecie», — kazaŭ Kryvašejeŭ pra staŭleńnie da hramadzian RF za miažoj.

Deputat Pałaty pradstaŭnikoŭ Tenhiz Dumbadze ŭ pieradačy Sałaŭjova zajaviŭ, što nie ŭ biełaruskim charaktary ŭciakać.

«Biełaruś nie choča vajavać. Ale kali da nas pryjdzie niechta ŭzbrojeny, to što rabić? Bajaźliva ŭciakać i sastupać? Heta nie ŭ našych praviłach i nie ŭ našym charaktary. My ŭsie naščadki vialikich hierojaŭ. Jak ja mahu heta zabyć?» — skazaŭ Dumbadze.

Viadoŭca BT Maryja Piatraška była pierakananaja, što Polšča rychtuje vajnu na terytoryi Biełarusi (nijakich dokazaŭ hetamu jana taksama nie prademanstravała. — RS).

«Praz hieahrafičnaje stanovišča my zaŭždy pad udaram. Nam hetaha nie paźbiehnuć. Viadoma, lepš ustupać u vajnu z zahartavanymi aficerami. Ale ŭ nas vialiki aryjencir na ekanomiku. Łukašenka kaža, što kožny pavinien zajmacca svaimi spravami», — skazała Piatraška.

Analityk Biełaruskaha instytuta stratehičnych daśledavańniaŭ Alaksiej Aŭdonin taksama havaryŭ pra toje, što Polšča sumiesna z Vašynhtonam i Łondanam rychtuje vajnu na terytoryi Biełarusi.

«Jany hatovyja pajści na vyrašalny boj», — kazaŭ Aŭdonin.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?