Źleva naprava: Sueła Bravierman, Bien Uoles, Ryšy Sunak, Pieni Mordaŭnt, Borys Džonsan
Adznačajecca, što Sunak, jaki papiaredžvaŭ, što ekanamičnaja palityka Tras cierpić niaŭdaču, ličycca favarytam i siarod bukmiekieraŭ. Suprać jaho moža, adnak, zhulać toje, što jość sumnievy ŭ tym, što jon moža abjadnać Kansiervatyŭnuju partyju, uličvajučy, što mienavita hety palityk adyhraŭ značnuju rolu ŭ adstaŭcy byłoha lidara kansiervataraŭ Borysa Džonsana.
Akramia Sunaka, šancy ŭznačalić brytanski ŭrad, na dumku ahladalnikaŭ Sky News, maje lidar Pałaty hramad brytanskaha parłamienta Pieni Mordaŭnt, dziejny ministr abarony Złučanaha Karaleŭstva Bien Uoles, były premjer-ministr Borys Džonsan i dziaržaŭny sakratar Ministerstva ŭnutranych spraŭ va ŭradzie Liz Tras Sueła Bravierman.
Dziaržaŭny viaščalnik Vialikabrytanii Bi-bi-si, spasyłajučysia na staŭki bukmiekieraŭ, aceńvaje šancy Ryšy Sunaka zaniać pasadu premjer-ministra ŭ 36%, Pieni Mordaŭnt — u 18%, Biena Uolesa — u 9%, a Borysa Džonsana — u 7%.
Adznačajecca taksama, što ciapierašni kancler kazny Złučanaha Karaleŭstva Džeremi Hant, jakoha ličyli adnym z mahčymych pierajemnikaŭ Liz Tras na pasadzie premjer-ministra, publična admoviŭsia ad baraćby za hetaje kresła.
Siońnia premjer-ministarka Vialikabrytanii Liz Tras zajaviła, što sychodzić u adstaŭku. Jana budzie vykonvać svaje abaviazki, pakul nie budzie abrany jaje pierajemnik. Čakajecca, što vybary novaha lidara Kansiervatyŭnaj partyi i premjer-ministra adbuducca ŭžo na nastupnym tydni.
Liz Tras uznačaliła Kansiervatyŭnuju partyju 5 vieraśnia i stała premjer-ministram Brytanii 6 vieraśnia 2022 hoda paśla adstaŭki Borysa Džonsana.
