Sojka raspavioŭ, što ŭ pieršaj pałovie hoda pradpryjemstva sutyknułasia z zakryćciom asobnych tradycyjnych rynkaŭ, źnižała zahruzku, nazapašvała hatovuju pradukcyju, pracavała sa stratami i deficytam abarotnych srodkaŭ.
Z červienia, pavodle hiendyrektara, pačaŭsia pierałom, «udałosia naładzić ustojlivyja kanały realizacyi pradukcyi».
— Rost abjomaŭ realizacyi dazvoliŭ nam pavialičyć abjomy pierapracoŭki nafty. U trecim kvartale byŭ nievialiki pryrost, usiaho 10%. Ale ŭličvajučy, što my raspradavali nazapašanuju pradukcyju, heta taksama niadrenny vynik, — kaža jon.
Pačynajučy z červienia pradpryjemstva štomiesiac pracuje prybytkova i skaračaje straty, jakija byli nazapašanyja ŭ pieršym paŭhodździ.
— My ŭžo pavialičyli nahruzku pa pierapracoŭcy nafty. U vieraśni my pierapracavali kala 380 tysiač ton. U nastupnym miesiacy «Naftan» płanuje pierapracavać kala 570 tysiač ton syraviny. My zmožam da kanca hoda praciahvać pracavać prybytkova, ažyćciaŭlać vypłaty, praduhledžanyja kalektyŭnaj damovaj. Rabotniki atrymajuć uznaharodžańni pa vynikach raboty za 2021 hod, materyjalnuju dapamohu da novaha hoda, vypłatu za vykanańnie achovy pracy, pracoŭnaj i vytvorčaj dyscypliny.
Pavodle hiendyrektara, takija pakazčyki — heta «vynik ahulnaj zładžanaj pracy ŭsiaho kalektyvu».
— U hetym hodzie praviedzienaja vialikaja rabota pa źnižeńni zatrat. Naša prahrama miarkuje atrymańnie efiektu ŭ 57 młn. rubloŭ u 2022-m. Naš vynik užo składaje 41 młn rubloŭ. Nie vyklikaje sumnievaŭ toje, što my zmožam vyjści na zajaŭleny pakazčyk. Asabliva padkreślu, što našamu naftachimičnamu kompleksu
była akazanaja biesprecedentnaja dapamoha z boku dziaržavy, jakaja vyražałasia ŭ pradastaŭleńni padatkovych ilhot i padatkovych kredytaŭ, finansavańni našaj biahučaj dziejnaści, u rehulavańni cen na paliva.
U vyniku ŭsich hetych mier udałosia stabilizavać pracu pradpryjemstva. Spadziavajusia, što čaćviorty kvartał stanie dla nas paśpiachovym. I kalektyŭ vykanaje ŭstalavanyja metavyja pakazčyki, — kaža jon.
«Naftan» apynuŭsia ŭ liku kampanij, jakija trapili pad sankcyi ZŠA, jakija ŭstupili ŭ siłu 3 červienia 2021 hoda.
