Fota: SBU
Ekśpierty ličać, što vybuch nie pryviadzie da praciahłaha parušeńnia linij kamunikacyj z Krymam, ale jaho nastupstvy, vierahodna, na niejki čas pahoršać prablemy ŭ rasijskaj łahistycy. Abrynutaja pałasa aŭtadarožnaha mosta abmiažuje pieramiaščeńnie rasijskich vajskoŭcaŭ, pakul most nie budzie adramantavany, i prynamsi častka rasijskich vajskoŭcaŭ vymušanaja budzie niejki čas spadziavacca na paromnyja pieravozki.
Rasijskija siły, vierahodna, pa-raniejšamu zmohuć pieravozić ciažkuju vajennuju techniku pa čyhuncy, piša ISW. Adnak pravierki biaśpieki ŭsich transpartnych srodkaŭ, jakija pierasiakajuć most, buduć uzmocnienyja, i heta pryviadzie da zatrymak u pieramiaščeńni rasijskaj vajskovaj techniki, asabovaha składu i hruzaŭ u Krym.
Kreml, vierahodna, zrobić Minabarony kazłom adpuščeńnia za vybuch na Kierčanskim moście i inšyja niaŭdačy rasijskich vajskoŭcaŭ, kab źbierahčy reputacyju Pucina. Ministerstva dahetul nie zrabiła aficyjnaj zajavy z nahody incydentu.
Niekatoryja prychilniki vajny ŭ rasijskaj infarmacyjnaj prastory adznačyli, što Pucin i jaho najbližejšaje asiarodździe nie zmahli nieadkładna adreahavać na vybuch na moście, jaki maje vialikuju simvaličnuju značnaść. Niekatoryja navat ŭpieršyniu vykazali pramuju krytyku ŭ adras Pucina.
Tak, adzin z vajennych błohieraŭ zajaviŭ, što, kali Pucin nie raspačnie dziejańniaŭ u adkaz, heta «budzie pamyłkova pryniataje za słabaść samoha prezidenta». Inšy adznačyŭ, što z boku Kramla kryvadušna zaklikać rasijan zhurtavacca vakoł Pucina, kali jon nie moža prakamientavać takija važnyja padziei, jak zatapleńnie «Maskvy», abmien pałonnymi, uklučajučy bajcoŭ «Azoŭstali», abo krach Charkaŭskaj linii frontu.
Rasijskija błohiery i prapahandysty zaklikali Kreml adnavić udary pa ŭkrainskaj infrastruktury. Adnak, zaŭvažajuć ekśpierty ISW, jany nie prapanoŭvali vykarystoŭvać taktyčnuju jadziernuju zbroju suprać Ukrainy.
