Piaty dzień suda pa «spravie zmoŭščykaŭ» pačaŭsia z dopytu śviedak. Pieršymi pačali davać pakazańni ŭ sudzie śviedki, jakich vyklikaŭ bok abvinavačvańnia. Pakazańni daŭ muž abvinavačanaj Volhi Hałubovič, jon hramadzianin Małdovy, ale žyvie i pracuje ŭ Biełarusi.
Adkazvajučy na pytańni prakurora, muž abvinavačanaj paćvierdziŭ infarmacyju pra toje, što jaho žonka atrymlivała i pieradavała hrošy ad Juryja Ziankoviča, častka jakich, jak ustanaviła śledstva, išli na apłatu štrafaŭ pratestoŭcaŭ.
Pavodle jaho słovaŭ, za pasłuhi Volzie Hałubovič płacili kožny miesiac pa 200 dalaraŭ.
Muž Hałubovič taksama raspavioŭ sudu, što čuŭ infarmacyju pra toje, što Ziankovič płanavaŭ stvarać u Biełarusi «partyju vizijanieraŭ».
Na sudzie jon adznačyŭ, što papiaredžvaŭ žonku, kab jana «bajałasia ŭklučeńnia ŭ palityčnuju dziejnaść». Muž Hałubovič udakładniŭ, što hrošy ad Ziankoviča jany chavali ŭ vyhladzie «zakładak», u tym liku adna ź ich była na mohiłkach, tam jany schavali piać tysiač dalaraŭ.
Abvinavačany Kraŭčuk u sudzie zajaviŭ, što paznaŭ śviedku — jon ź im sustrakaŭsia paru razoŭ u vieraśni 2020 hoda, atrymaŭ hrošy ŭ pamiery dvuch tysiač dalaraŭ, paśla čaho advioz ich na vakzał i pakłaŭ u jačejku kamiery zachoŭvańnia.
Taksama siońnia ŭ sud dla dačy pakazańniaŭ vyklikanaja śviedka z boku abarony Alaksandra Fiaduty, fiłosaf Volha Abramava. Jana raspaviała sudu, što znajomaja ź Fiadutam z 1993 hoda, tady jany paznajomilisia ŭ kułuarach telestudyi, kali prymali ŭdzieł u pieradačy. Pavodle jaje słovaŭ, Fiaduta ŭžo tady vykazvaŭsia za mirnyja reformy.
«Jon čałaviek tonkaj dušeŭnaj arhanizacyi i staramodnaha etykietu. Jon zaŭsiody pry sustrečach z žančynami całavaŭ im ručki», — skazała Abramava.
Jana adznačyła, što Fiaduta nie byŭ radykałam i nie imknuŭsia da ŭłady, heta nie było jaho metaj:
«Fiaduta — čałaviek pryncypaŭ, jon zaŭsiody byŭ prychilnikam mirnych pieramien i nikoli nie imknuŭsia da ŭłady. Ułada nikoli nie była samametaj. Jon nikoli nie byŭ radykałam».
Adkazvajučy na pytańnie prakurora, Abramava zajaviła, što, na jaje dumku, Fiaduta nikoli nie pomściŭ za toje, što jamu daviałosia bolš za 20 hadoŭ tamu syści z pasady z administracyi prezidenta. Jana taksama vykazała svajo staŭleńnie da taho, što jon byŭ zatrymany:
«U mianie byŭ šok, jak jon moh ździejśnić takoje hłupstva z takoj strukturaj asoby».
Na jaje dumku, jaho ŭ hetaje złačynstva ŭciahnuŭ Dźmitryj Ščyhielski.
Adkazvajučy na pytańnie prakurora pra toje, dla čaho jamu patrebny byŭ Fiaduta, Abramava skazała: «Mazhi».
https://d2lur0sisdcrej.cloudfront.net/ru/296715