Fota: sacsietki pieravozčyka
Varyjanty, ź jakoj metaj jedzie pasažyr, prapanuje sam pieravozčyk. Treba prosta pastavić ptušačku la adpaviednaj hrafy na sajcie. Možna vybrać takija varyjanty, jak «da miesca pracy/nazad da miesca pražyvańnia (znachodžańnia)», «da miesca vučoby».
Inšyja opcyi — «da miesca praviadzieńnia spartyŭnych, kulturna-vidoviščnych i inšych mierapryjemstvaŭ», «da miesca schodu (sustrečy) z hramadzianami (siabrami, svajakami, kalehami i inšymi katehoryjami ludziej) dla abmierkavańnia i rašeńnia pytańniaŭ, jakija zakranajuć intaresy». Taksama mahčyma pajechać u «padarožža, na ekskursiju», «u słužbovuju kamandziroŭku», «da miesca praviadzieńnia śviataŭ i inšych uračystaściej» albo «da miesca praviadzieńnia rytualnych i inšych abradaŭ».
Ale čamu raptam pieravozčyka stała cikavić, ź jakoj metaj pasažyr jedzie ich maršrutkaj?
Voś što adkazała dyśpietčarka kampanii «Diesiatočka-ekspriess»:
«My pierajšli na biełaruski sajt, tamu ciapier treba ŭkazvać proźvišča i metu pajezdki. Možacie vybrać lubuju. Heta zusim nie pryncypova. Danyja my nikudy nie pieradajem, prosta ŭ nas takaja prahrama, što zapytvaje.
My zajmajemsia nierehularnymi pieravozkami. I ciapier usie nierehularnyja pieravozčyki buduć rabić hetak ža, albo pojduć u rehularnyja pieravozki».
Dyśpietčarka patłumačyła, što vyjšli źmieny ŭ zakonie pra nierehularnyja pasažyrskija pieravozki i jość punkt, jaki abaviazvaje zapytvać hetu infarmacyju.
Inšaja žančyna na linii była bolš rezkaja:
«Pa našym zakanadaŭstvie treba ŭkazvać proźvišča i metu pajezdki. My vymušanyja heta rabić. Danyja pieradajucca pry patrabavańni orhanaŭ transpartnaj milicyi, naprykład.
Heta dla kiroŭcy treba, a nie dla vas.
Kali nivodny z prapanavanych varyjantaŭ nie padychodzić, vybirajcie luby. Udakładniać, kudy vy pajechali, nichto nie budzie».
A kali pasažyr nie choča paviedamlać, kudy jon jedzie?
«Značyć, jedźcie rehularnymi pieravozčykami», — adkazała dyśpietčarka.
Ale što za źmieny ŭ zakanadaŭstvie? My prakansultavalisia ŭ jurysta — źmianieńniaŭ zakonaŭ ab nierehularnych pasažyrskich pieravozkach nie znajšli.
Pa dziejnych normach, pieravozčyk moža zadavać takija pytańni, ale kali pasažyr nie choča adkazvać, to admović jamu ŭ pajezdcy nielha. Inakš heta parušaje pravy pasažyra na pryvatnaje žyćcio i abmiažoŭvaje jaho pravy spažyŭca.