Atrymańnie takoha statusa — klučavy krok dla Kijeva na šlachu da ŭstupleńnia ŭ ES. Adnak navat kali Jeŭrakamisija ŭchvalić nadańnie krainie hetaha statusa, jaje rašeńnie jašče pavinny padtrymać usie krainy ES.
Čakajecca, što Jeŭrakamisija prymie svajo rašeńnie 17 červienia, udakładnili krynicy ahienctva Bloomberg.
Heta było zajaŭlena i aficyjna.
«Kamitet jeŭrakamisaraŭ praviadzie sumiesnyja debaty ŭ paniadziełak (13 červienia) pa hetym pytańni. Vypracuje mierkavańnie na naradzie, jakaja adbudziecca ŭ piatnicu 17 červienia», — zajaviŭ aficyjny pradstaŭnik ES Eryk Mamier.
Lidary Jeŭrasajuza źbirajucca abmierkavać hetaje pytańnie ŭ Brusieli 23-24 červienia. Pavodle źviestak ahienctva, šerah krain vystupili suprać hetaha kroku. Na ich dumku, niapravilna addavać pieravahu Ukrainie pierad inšymi kandydatami. Praces ustupleńnia ŭ ES uklučaje ŭ siabie šerah krokaŭ i ŭmovaŭ, vykanańnie jakich moža zaniać bolš za 10 hadoŭ, nahadvaje ahienctva.
Suprać nadańnia Ukrainie statusa kandydata na ŭstupleńnie ŭ ES vystupili, u pryvatnaści, Niderłandy, paviedamili krynicy ahienctva. Ale bolšaść krain padtrymlivajuć pazicyju Jeŭrakamisii: Polšča, Litva i Irłandyja na sustrečy ambasadaraŭ ES paprasili lidaraŭ Jeŭrasajuza chutčej nadać Ukrainie status kandydata, raskazali surazmoŭcy ahienctva. Hiermanija ž ličyć, što vynikam sprečak moža stać tolki ŭmoŭny status kandydata.
U dypłamatyčnaj nocie Danija zajaviła, što Ukraina nie adpaviadaje kryteryjam, źviazanym sa stabilnaściu instytutaŭ, jakija harantujuć demakratyju, viaršenstva zakona, pravy čałavieka, pavahu i abaronu mienšaściaŭ.
Kapienhahien ličyć, što Ukraina «ŭ cełym znachodzicca na vielmi rańniaj stadyi» ŭ płanie hatoŭnaści ŭziać na siabie abaviazacielstvy pa siabroŭstvu ŭ ES i stvaryć kankurentazdolnuju na adzinym rynku ekanomiku.
Raniej vice-premjer Ukrainy Volha Stefanišyna kazała, što ŭvohule jość try krainy, jakija «nie chočuć davać zialonaje śviatło Ukrainie». Pavodle jaje słoŭ, heta «nie ŭschodniejeŭrapiejskija i nie bałtyjskija krainy».
Status kandydata, kali jon budzie nadadzieny, aficyjna pačnie praceduru ŭstupleńnia ŭ ES. Dahetul apošniaj krainaj, jakaja dałučyłasia da błoka ŭ 2013 hodzie, była Charvatyja, i praces razhladu jaje zajaŭki doŭžyŭsia 10 hadoŭ.
8 červienia zaklikaŭ nadać Kijevu status kandydata na ŭstupleńnie ŭ ES Jeŭraparłamient.
