Kala dvuch hadoŭ znachodzicca ŭ SIZA syn pretendenta na prezidenckuju pasadu Viktara Babaryki
— Pieršaja instancyja pakinuła skarhu biez zadavalnieńnia, padadzienaja skarha ŭ druhuju instancyju, — raspavioŭ «Narodnaj voli» advakat Uładzimir Pylčanka.
— Ci varta čakać stanoŭčaha vyniku dla Eduarda?
— Stanoŭčaha vyniku, miarkuju, u najbližejšy čas my nie dačakajemsia. Eduard taksama nie maje iluzij. Tym nie mienš heta jaho pryncypovaja pazicyja — abskardžvać kožnaje rašeńnie ab utrymańni pad vartaj, pakolki takija rašeńni, jon ličyć, biespadstaŭnyja i niezakonnyja.
— Niaŭžo takaja situacyja adpaviadaje zakanadaŭstvu?
— Pa-pieršaje, adznaču, što ŭtrymańnie pad vartaj pavinna prymianiacca tolki ŭ vyklučnych vypadkach, bo ŭmovy znachodžańnia tam adpaviadajuć turemnamu režymu — to bok najbolš strohamu pakarańniu. Tamu adzin dzień utrymańnia čałavieka ŭ SIZA zaličvajecca za paŭtara i navat za dva dni adbyvańnia pakarańnia ŭ papraŭčaj kałonii (za niekatorymi vyklučeńniami).
Pa-druhoje, utrymańnie čałavieka pad vartaj pavinna być vyklikanaje nieabchodnaściu bieśpieraškodnaha zboru dokazaŭ dla rasśledavańnia. Heta značyć, što čałavieka izalujuć tolki z metaj, kab jon nie falsifikavaŭ dokazy, nie akazvaŭ niezakonnaha ŭździejańnia na śviedak, nie ździejśniŭ złačynstva na voli i hetak dalej. Jak tolki dokazy sabranyja — a značyć, adpali padstavy dla ŭtrymańnia pad vartaj, — čałavieka pavinny adpuścić na volu, zamianiŭšy mieru strymańnia ci całkam admianiŭšy jaje.
Pa-treciaje, u vypadku z Eduardam maksimalny termin znachodžańnia pad vartaj na stadyi śledstva nie moža pieravyšać 18 miesiacaŭ, paśla čaho miera strymańnia źmianiajecca.
— I jakim čynam atrymałasia, što Eduard Babaryka ŭžo amal dva hady znachodzicca ŭ SIZA?
— Viadoma, što pieršapačatkova kryminalnuju spravu ŭ dačynieńni da jaho vioŭ KDB, u śledčym izalatary jakoha Eduard znachodziŭsia kala 17 miesiacaŭ, a ŭ listapadzie 2021 hoda byŭ pieraviedzieny ŭ SIZA MUS na vulicy Vaładarskaha. Eduardu rehularna, amal kožnyja dva miesiacy, praciahvaŭsia termin utrymańnia pad vartaj. Ale kali 18-miesiačny termin utrymańnia padychodziŭ da zaviaršeńnia, pa dzivosnym supadzieńni inšy orhan kryminalnaha pieraśledu — Śledčy kamitet — pryjšoŭ da vysnovy, što Eduard ździejśniŭ inšyja złačynstvy pa inšych artykułach. Adpaviedna, jaho znoŭ źmiaścili pad vartu (fizična z-pad varty jon i nie vyzvalaŭsia), ale heta zrabiŭ inšy orhan pa inšaj spravie.
Ciapier u vyniku takoha «elehantnaha» manieŭra całkam vierahodna, što Eduard moža zastavacca ŭ SIZA jašče 18 miesiacaŭ ciaham rasśledavańnia, jakoje viadzie ŭžo Śledčy kamitet.
— Jak Eduard psichałahična i fizična spraŭlajecca z takimi vyprabavańniami? U jakim jon stanie siońnia, čym zajmajecca?
— Jon u paradku — spakojny i razvažlivy. Nie sumniavajecca, što ŭ pierśpiektyvie ŭsio budzie dobra. U jaho ciapier ščylny hrafik, čas nie marnuje, vykarystoŭvaje ŭsie mahčymaści dla samaŭdaskanaleńnia.
Šmat čytaje — i knihi, i pieryjodyku. Maje mahčymaść atrymlivać aktualnyja naviny.
Z sakamiernikami dzielicca viedami pa jadziernaj fizicy i inšych navukovych halinach. Zajmajecca fizičnymi praktykavańniami, johaj. Amal sadzicca na špahat, što, darečy, karysnaje ŭmieńnie. Niejak jon navat vykazaŭsia, što ŭsprymaje svaju kamieru chutčej jak akademiju, dzie raźvivajucca rozum, duch i cieła.
— Prablem ź listavańniem niama?
— Listy ad siabroŭ i nieznajomych dachodziać vielmi redka, ale Eduard zaŭsiody adkazvaje ŭsim.
— Kolki jašče tearetyčna jon moža zastavacca za kratami da prysudu?
— Kala paŭhoda tamu možna było mierkavać pra chutkaje vyzvaleńnie, ale atrymałasia tak, što Eduard moža pravieści čarhovyja paŭtara hoda ŭ SIZA biez pradjaŭleńnia kančatkovaha abvinavačańnia i razhladu spravy.
Z hetaj pryčyny mnie ciažka prahnazavać niejkija terminy. Tym nie mienš, ja ŭpeŭnieny, što rana ci pozna ŭsie abvinavačańni z Eduarda buduć źniatyja.
