Dala Hrybaŭskajcie. Fota: DELFI / Kiril Čachovskij
Eks-prezidentka Litvy skazała, što nielha adstupać paśla kožnaha zapałochvańnia z boku Rasii.
«Treba advažycca na kanfrantacyju i pryniać vyklik, jaki kinuła Rasija. Hetyja sproby Zachadu adstupać, kab nibyta paźbiehnuć Treciaj suśvietnaj vajny, — to
hetaja Treciaja suśvietnaja vajna ŭžo idzie. Jana jeŭrapiejskaja. Heta vajna nie tolki z Ukrainaj. Jana suprać usiaho demakratyčnaha śvietu, suprać ŭstalavanaj paśla Druhoj suśvietnaj vajny architektury biaśpieki, jana ŭžo idzie.
Nie my jaje pačali, nie my abvastrajem situacyju. Kali my budziem adstupać i dazvolim ahresaru sadzicca nam na hałavu, jon zalezie i źmienić uvieś paradak, nastupstvy buduć drennymi, my ź imi nie spravimsia. Asabliva takija krainy, jak my — maleńkija», — zaŭvažyła Hrybaŭskajcie.
Pa jaje słovach, zachodniki pavinny dumać pra svaju biaśpieku, kab Pucin byŭ spynieny i razdušany na terytoryi Ukrainy.
«Jeŭropa zanadta małaja dla kanviencyjnaj vajny, u płanie abarony — treba spyniać vajnu tam, dzie jana pačałasia, i jak maha chutčej, usimi siłami.
Naša biaździejnaść aznačaje pašyreńnie vajny. Čym bolš hieahrafična my budziem addalacca ad kanfliktu, tym chutčej jon nablizicca da nas», — papiaredziła Hrybaŭskajcie.
Na pytańnie, što Zachad pavinien rabić, kab zrynuć urad Pucina, eks-prezidentka adkazała:
«Mianie takoje pytańnie aburaje, heta prajava zachodniaj naiŭnaści. My sutykajemsia z zusim inšaj cyvilizacyjaj. Jahonaja ŭłada trymajecca nie na padtrymcy ludziej, a na «siłavikach» i inšych finansavych strukturach.
Nikoli pry najaŭnaści takoj prapahandy, takoj tatalitarnaj sistemy, takoha pieraśledu ludzi z-za strachu nie vyjduć na vulicy jaho zrynać».
«Tamu nie treba mieć iluzii, byccam my možam niejak upłyvać na mierkavańnie, niejak prapchnuć infarmacyju praz hety barjer, — usio roŭna, jakuju, joj nichto nie budzie vieryć. My dumajem na zachodni manier, a jany — na ŭschodni. Heta zusim inšaja cyvilizacyja. Siłkavać iluzii, byccam my možam niejak uździejničać, a ludzi na vulicach skinuć Pucina — hetaha ŭ historyi nikoli nie było i nie budzie», — miarkuje Hrybaŭskajcie.