Fota: Nomadsoul1 / depositphotos.com
Pad Kijeŭ u niadzielu rasijanie praciahvali ściahvać techniku ź Biełarusi. Mahčyma, tut płanujecca hienieralny nastup. Ale ŭ noč na niadzielu boj u Irpieni skončyŭsia poŭnym razhromam rasijskaj tankavaj kałony. Na videa bačna, jak dymicca źniščanaja technika i lažać cieły. Jašče bolšaja kałona rasijskaj techniki była całkam źniščanaja ŭ inšym pryharadzie Kijeva, Bučy, piša «Uoł-stryt džornał».
Daradca Zialenskaha Alaksiej Arastovič paviedamiŭ u niadzielu, što, pavodle źviestak ukrainskaj raźviedki, nasupierak publičnym zajavam Łukašenki, biełaruskaja armija hatovaja ŭstupić u kanflikt na rasijskim baku.
Adnak daradca Zialenskaha paprasiŭ nie pierabolšvać vajennaha značeńnia takoha kroku, bo ŭ Biełarusi ŭsiaho 45 000 sałdat, ź ich tolki 17 000 bajazdolnych, pryčym, na dumku Arastoviča, mnohija ź ich nie rvucca vajavać z susiedziami.
Ukraina zajaviła, što ŭ niadzielu pa aeraporcie Žytomira byŭ naniesieny ŭdar balistyčnaj rakietaj ź Biełarusi, a inšuju balistyčnuju rakietu, vypuščanuju pa Kijevie, udałosia źbić.
Z kožnym dniom zajavy kiraŭnikoŭ Ukrainy hučać usio bolš upeŭniena, piša «Uoł-stryt džornał». Zdajecca, uparty i realna ŭsienarodny supraciŭ sarvaŭ płan Pucina źniščyć łancužki kamandavańnia i blickryham źnieści ŭkrainskaje kiraŭnictva.
Analityki adznačajuć, što va ŭkrainskich rukach vydatna zarekamiendavali siabie supraćtankavyja i supraćpavietranyja rakiety, jakija Ukraina atrymała ad krain Zachadu napiaredadni ŭvarvańnia.
Ukrainskaje hramadstva rašuča abjadnałasia vakoł dziaržaŭnych uładaŭ. Sacyjołahi dali źviestki, što 90% ukraincaŭ uchvalajuć dziejańni Zialenskaha i kala 70% vierać u pieramohu Ukrainy.
Prezident Zialenski ŭ niadzielu abviaściŭ pra stvareńnie Mižnarodnaha lehijona pry ŭkrainskaj armii, pa anałohii ź interbryhadami, jakija ŭ 1930-ja abaraniali ad fašystaŭ Ispaniju. Zakanadaŭstva Ukrainy nie zabaraniaje inšaziemcam słužyć va ŭkrainskaj armii, i Zialenski zaklikaŭ usich achvotnych źviazvacca z vajskovymi ataše ŭkrainskich pasolstvaŭ.
«Heta nie tolki napad Rasii na Ukrainu, heta pačatak vajny suprać Jeŭropy. Suprać adzinstva Jeŭropy. Suprać fundamientalnych pravoŭ čałavieka ŭ Jeŭropie», — skazaŭ Zialenski.
Ministr zamiežnych spraŭ Vialikabrytanii Liz Tras skazała Bi-Bi-Si ŭ subotu, što budzie vitać ustupleńnie brytanskich hramadzian u hetyja čaści. Jana zajaviła, što ciapier idzie bitva za svabodu «nie tolki Ukrainy, ale i ŭsioj Jeŭropy».
Mižnarodnaja supolnaść daŭno nie była takoj adzinaj, jak u adkazie na cyničnaje ŭvarvańnie va Ukrainu. Paniadziełak moža stać dniom abviaščeńnia takich sankcyj, ź jakimi Rasija jašče nie sutykałasia — až da zamarožvańnia valutnych reziervaŭ. ZŠA i Jeŭrasajuz raspačynajuć pastaŭki zbroi Ukrainie — heta bolš nie šlemy, havorka navat pra samaloty-źniščalniki. Navat Hiermanija, jakaja raniej ustrymlivałasia, pryniała rašeńnie pastavić Ukrainie sotni «Stynhieraŭ» i «Džavielinaŭ». A MVF, jak čakajecca, vydzielić Ukrainie šmatmiljardnuju dapamohu.
Zdajecca, Maskva nie čakała ni takoj siły supracivu ŭkraincaŭ, ni takoj reakcyi śvietu. Ëść niebiaśpieka, što, kab dabicca svaich metaŭ, Pucin addaść zahad na jašče bolš žorstkija bambardziroŭki.
Za pieršyja 4 dni vajny, jak paviedamlaje Ministerstva achovy zdaroŭja Ukrainy, zahinuli 352 mirnyja žychary, u tym liku 14 dziaciej. Miljony ludziej va ŭkrainskich haradach hetuju noč pravodziać u bombaschoviščach.
