Ciapier akazvajecca, ničoha nie vyrašana
Vydańnie BFM.ru raźbirałasia, ci vyhadnaje Rasii budaŭnictva porta dla pieravałki biełaruskich hruzaŭ i ci ryzykujuć rasijskija biznesmieny trapić pad sankcyi za dapamohu ŭ vyvazie kalijnych uhnajeńniaŭ.
Nahadajem, Uładzimir Pucin nibyta rasparadziŭsia nieadkładna pačać budaŭnictva terminała dla pieravałki biełaruskich hruzaŭ, pra što zajaviŭ Łukašenka na pres-kanfierencyi pa vynikach dvuchbakovych pieramoŭ.
Pa słovach Łukašenki, hrošy na budaŭnictva porta jość, adnak jon nie ŭdakładniŭ krynicy finansavańnia. Na čyje hrošy i za jaki termin moža być pabudavany port? Vydańniu prakamientavaŭ situacyju kirujučy partnior kampanii «Infraprajekty» Alaksiej Biezbarodaŭ:
«Heta 10-15 młrd rubloŭ jak minimum. Času nie mienš za čatyry hady. I dziŭna naohuł usio heta vyhladaje, tamu što jašče try tydni tamu premjer-ministr Biełarusi kazaŭ, što ŭsio vyrašana, usie pytańni ŭtreśli, usia łahistyka pradumanaja. Ciapier akazvajecca, ničoha nie vyrašana.
Hetyja razmovy nie vyrašać prablemu siońnia, zaŭtra ci paślazaŭtra. Praz try hady možna budzie dabudavać port», — praciahvaje ekśpiert. «Biełaruśkalij», naturalna, pavinien heta finansavać. Nijak inakš».
«A Rasija ŭvohule nie budzie datyčnaja da budaŭnictva abo taksama ŭniasie svaju leptu?» — zapytaŭsia žurnalist rasijskaha vydańnia.
«A nam heta navošta?» — adkazvaje ekśpiert.
Łukašenka atrymaŭ u Rasii dabro na ŭsio
Maskva i Minsk demanstrujuć poŭnuju adnadušnaść, što hruntujecca na supraćstajańni z Zachadam, piša «Niezavisimaja hazieta».
Alaksandr Łukašenka, jaki trapiŭ u poŭnuju zaležnaść ad Maskvy, patrebny joj jak adziny sajuźnik, ličyć vydańnie:
«Miarkujučy pa adnadušnaści, jakuju apošnim časam demanstrujuć Maskva i Minsk, Alaksandru Łukašenku ŭdałosia pierakanać Uładzimira Pucina ŭ svajoj niezamiennaści, i jaho pakul što vyrašyli nie pryśpiešvać z tranzitam.
Aktualnymi dla Biełarusi napiaredadni sustrečy ŭ Maskvie ekśpierty nazyvali jašče i pytańni kredytavańnia (Minsk zapytaŭ 3,5 młrd dalaraŭ, ale Maskva hatovaja dać tolki adzin). Adnak padčas svajoj vynikovaj pres-kanfierencyi hetuju temu ni Łukašenka, ni Pucin nie zakranuli.
Nie vyrašaje prablemu Biełarusi i pierśpiektyva budaŭnictva ŭ Rasii porta dla pieravałki kalijnych uhnajeńniaŭ, pakolki ŭhnajeńni treba pradavać užo ciapier, a budaŭnictva — heta praciahłaja pierśpiektyva».
Pałkoŭniku nichto nie piša
Straciŭšy mahčymaści dla bałansu pamiž Rasijaj i Zachadam, Łukašenka robić usio, kab prademanstravać siabie ŭ jakaści vajskovaha chaŭruśnika, piša «Finam».
Dla Łukašenki vučeńni heta mahčymaść pahulać muskułami, majučy za śpinaj padtrymku «starejšaha brata». U niadaŭnim intervju Uładzimiru Sałaŭjovu jon navat paskardziŭsia na toje, što nie atrymaŭ ad Pucina zvańnie pałkoŭnika rasijskaj armii, adznačaje vydańnie.
«Padobnaje, zrešty, vyhladaje nonsensam — kiraŭnik rasijskaj dziaržavy nie moža prysvojvać voinskija zvańni zamiežnym hramadzianam. Miž tym, «pałkoŭniku nichto nie piša». Zachad nie zanadta imkniecca da dyjałohu ź Biełaruśsiu, ličačy Łukašenku de-fakta nielehitymnym lidaram», — havorycca ŭ materyjale.
Paśla prezidenckich vybaraŭ 2020 hoda, jakija supravadžalisia žorstkimi dziejańniami biełaruskich siłavikoŭ, Łukašenka straciŭ mahčymaści dla bałansu pamiž Rasijaj i ES, adznačajuć rasijskija žurnalisty.
U hetych umovach Maskva stanovicca hałoŭnym partnioram Minska, pra što Pucin znoŭ zajaviŭ na sumiesnaj pres-kanfierencyi z Łukašenkam. Pry hetym, niahledziačy na vidavočny cisk Rasii, Łukašenka pakul što nie vykanaŭ svajho abiacańnia pryznać Krym rasijskaj terytoryjaj.
Vizit Łukašenki ciapier całkam straciŭ luby sens
Łukašenka skarystaŭsia vizitam, kab papužać Zachad i adyhracca za minułyja abrazy, piša «Moskovskij Komsomolec».
«Vizity prezidenta Biełarusi ŭ Rasiju dobryja tym, što ich źmiest i padaploka zvyčajna dobra viadomyja zahadzia. Pryčym, ź pieršych vusnaŭ. Voś i na hety raz baćka nie ŭtrymaŭsia i jašče napiaredadni namałoŭ, čym jany z Pucinym buduć zajmacca ŭ piatnicu i ŭ subotu, uklučajučy sumiesnaje nazirańnie za vučeńniami sił stratehičnaha strymlivańnia. Ab takich dalokich płanach nie viedaŭ navat pres-sakratar rasijskaha lidara Dźmitryj Piaskoŭ», — iranizuje rasijskaje vydańnie.
Na dumku «MK», vajaŭničy nastroj Łukašenki tłumačycca žadańniem uziać revanš za svaje minułyja prynižeńni i pa isnujučaj histaryčnaj tradycyi pakazać Zachadu «kuźkinu maci».
Pieršuju za dva hady pres-kanfierencyju z Uładzimiram Pucinym biełaruski palityk vykarystaŭ, kab publična adtaptacca na svaich kryŭdzicielach. Jon papraknuŭ zachodnich lidaraŭ za biezadkaznaść i biesturbotnaść, a taksama zajaviŭ pra patałahičnuju niebiaśpieku ŭ tym liku dla ich ułasnych narodaŭ, piša «MK».
«Zrešty, jak by Łukašenka ni chrabryŭsia, usim, chto maje vočy i vušy, vidavočna: sam baćka daŭno ŭžo ničoha nie vyrašaje. I za žnivień 2020-ha pavinien być da mahiły ŭdziačny Kramlu», — adznačaje «Moskovskij komsomolec».
Charakterna, što tema budučaha refierendumu na pieramovach praktyčna nie hučała, tamu što nijakich značnych pieramienaŭ hetaja padzieja nie pryniasie. Paśla niadaŭnich padziej u Kazachstanie tema tranzitu kančatkova syšła z paradku dnia, pišuć rasijskija žurnalisty.
Hałoŭnaj metaj pieramoŭ Pucina i Łukašenki stała tema prymusu Ukrainy da miru
Takuju dumku vykazaŭ dyrektar «Centra hieapalityčnych ekśpiertyz» Valeryj Karovin vydańniu «Politika siehodnia».
Pavodle jaho słoŭ, pierad Rasijaj i Biełaruśsiu ciapier staić važnaja zadača — minimizavać vydatki ad kanfliktu nie tolki dla žycharoŭ Danbasa, ale i dla hramadzian Ukrainy ŭ cełym.
«Zrabić heta mahčyma tolki šlacham praviadzieńnia miratvorčaj apieracyi i likvidacyi taho maryjanietkavaha režymu, jaki pryjšoŭ u Kijevie ŭ vyniku ŭzbrojenaha buntu i niezakonnaha majdana. Voś hetym i źbirajucca zaniacca ŭzbrojenyja siły Sajuznaj dziaržavy, što i abmiarkoŭvałasia na hetaj sustrečy», — adznačyŭ praŭładny rasijski ekśpiert.
Karovin vykazaŭ upeŭnienaść, što zachodnija palityki ŭsprymajuć Ukrainu vyklučna jak instrumient ahresii suprać Rasii, kab prynieści joj «niekatoryja niazručnaści». Adnak u hetym prajaŭlajecca «ich pycha i abyjakavaść da losu ludziej, a nie ubostva dumki, jak miarkuje Łukašenka».
Sajuznaja dziaržava ciapier narešcie i praŭda isnuje, i ničoha z hetym nie zrobiš
U svaim aryhinalnym iraničnym styli pra sustreču Pucina i Łukašenki napisaŭ i žurnalist vydańnia «Kommiersant» Andrej Kaleśnikaŭ.
Jon źviarnuŭ uvahu na toje, što da hetaha času lidary, ź jakimi sustrakaŭsia rasijski prezident u apošnija dni, žyli ŭ Ritz-Carlton abo ŭ Four Seasons. Tam spynialisia prezidenty Francyi i Brazilii Emanuel Makron i Žair Bałsanaru, a taksama kancler Hiermanii Ołaf Šolc.
«Alaksandru Łukašenku abrali InterContinental na Ćviarskoj. Jon, viadoma, praściejšy (jak, zrešty, i sam Alaksandr Łukašenka)», — ździekliva piša rasijski žurnalist.
«Alaksandr Łukašenka, napeŭna, drenna spaŭ hetuju noč: nabryniałyja miaški pad vačyma vydavali ŭ im čałavieka, jaki namučyŭsia. Ale pry hetym jon byŭ vielmi ažyŭleny: abdymki Uładzimira Pucina, zdajecca, usialili ŭ jaho niešta viasiołaje», — piša Kaleśnikaŭ. — Alaksandr Łukašenka moža uzdychnuć spakojna: jon całkam abrynuŭ biełaruskuju ekanomiku — na rasijskuju. Padobna na toje, što voś mienavita ciapier, u hetyja dni Sajuznaja dziaržava raptam stała realnaściu. Tak, strašnaj, viadoma, a jak vy chacieli?»
Łukašenku dobra było z Uładzimiram Pucinym, ličyć Kaleśnikaŭ:
«Jon adčuvaŭ siabie tut jak doma i navat, dumaju, lepš, čym doma: bolš upeŭniena, spakojna, tut było na kaho pahladzieć u ciažkuju chvilinu z nadziejaj i z kim abniacca ŭ vypadku čaho (dy choć by i na raźvitańnie)».
Na pres-kanfierencyi z Uładzimiram Pucinym 18 lutaha Kaleśnikaŭ iranična spytaŭ Łukašenku, jak jon aceńvaje «šancy biełaruskaha naroda stracić jaho».
«Što tyčycca, prabačcie, majho prezidenctva, to voś my ciapier sa starejšym bratam paraimsia i vyrašym! Čaho vy pieražyvajecie? Usio budzie narmalna», — skazaŭ Łukašenka.
U aficyjnaj stenahramie na sajcie Łukašenki hety adkaz nie apublikavany.
Čytajcie taksama:
U Rasii z udziełam Łukašenki i Pucina prajšli stratehičnyja vučeńni z zapuskam hipierhukavych rakiet
Sajt pres-słužby Łukašenki nie apublikavaŭ jaho skandalnyja vykazvańni nakont «starejšaha brata»
