Vojski RF, ilustracyjnaje fota. Fota AFP/GETTY IMAGES
Žurnalisty nazyvajuć kankretnyja daty
Amierykanskaje vydańnie Politico i niamieckaje vydańnie Spiegel paralelna napisali sa spasyłkaj na krynicy ŭ stalicach troch roznych krain, što Vašynhton pieradaŭ sajuźnikam dadzienyja raźviedki pra toje, što napad Rasii na Ukrainu zapłanavany na sieradu 16 lutaha.
Napad nibyta maje pačacca z kibieratak i bambardzirovak stratehičnych abjektaŭ.
Ahienctva Bloomberg, spasyłajučysia na nieviadomaha čynoŭnika, nazyvaje inšuju datu — 15 lutaha.
Biełarusaŭ va Ukrainie razhladajuć jak hramadzian krainy-sajuźnicy Rasii
11 lutaha ŭkrainskija pamiežniki pačali asabliva stroha praviarać biełarusaŭ, jakija ŭjazdžajuć va Ukrainu. Niekatorych navat nie puskajuć, adnoj dziaŭčynie paviedamili, što jana niepierakanaŭča patłumačyła metu vizitu. Ofis Śviatłany Cichanoŭskaj zajaviŭ, što ukraincy prakamientavali im takija miery:
«Siońnia źjavilisia paviedamleńni, što pry pierasiačeńni miažy z Ukrainaj biełarusaŭ pačali ŭzmocniena praviarać, dahladać rečy i dapytvać na punktach kantrolu. Nam paćvierdzili, što ciapier uzmocnienyja miery kantrolu na ŭjezd va Ukrainu z-za vajennych vučeńniaŭ, jakija prachodziać na terytoryi Biełarusi z udziełam vojskaŭ Rasijskaj Fiederacyi».
Z Ukrainy vyjazdžajuć dypłamaty, a niekatoryja krainy prosiać svaich hramadzian vyjechać
ZŠA i Izrail evakujujuć asnoŭnuju častu supracoŭnikaŭ svaich kijeŭskich pasolstvaŭ. Amierykanskaje konsulstva ŭ Kijevie z 13 lutaha spyniaje akazańnie konsulskich pasłuh.
Z Ukrainy pačali vyjazdžać i rasijskija dypłamaty dy supracoŭniki konsulstvaŭ. Praŭda, Maryja Zacharava, aficyjny pradstaŭnik MZS Rasii, nazvała heta «aptymizacyjaj»:
«Bajučysia mahčymych pravakacyj kijeŭskaha režymu abo trecich krain, my sapraŭdy pryniali rašeńnie ab niekatoraj aptymizacyi štataŭ rasijskich zamiežustanoŭ va Ukrainie».
Jašče ŭ kancy studzienia pra skaračeńnie kolkaści supracoŭnikaŭ u ambasadach zajavili Vialikabrytanija, Aŭstralija i Hiermanija.
Zachodnija krainy prosiać svaich hramadzian vyjechać
Na siońnia nie rekamiendujuć, zabaraniajuć jechać va Ukrainu ci prosiać pakinuć jaje terytoryju bolš za 20 krainaŭ.
Siarod ich Kanada, Finlandyja, Łatvija, Litva, Narviehija, Niderłandy, Estonija, Japonija, Novaja Ziełandyja, Paŭdniovaja Kareja i inšyja.
Dziarždep ZŠA zajaviŭ, što amierykanskim hramadzianam varta pakinuć Ukrainu ŭsimi dastupnymi vidami transpartu.
«Hramadzianam ZŠA nie varta jeździć va Ukrainu. Tym, chto znachodzicca va Ukrainie, varta źjechać ciapier, vykarystoŭvajučy kamiercyjnyja ci inšyja dastupnyja dla pryvatnych asob varyjanty transparciroŭki», — havorycca ŭ zajavie. Amal toje ž paŭtaryŭ i prezident ZŠA Džo Bajden: «Amierykanskija hramadzianie pavinny źjechać zaraz ža».
U piatnicu Vialikabrytanija, Danija, Izrail, Japonija, Estonija i Paŭdniovaja Kareja aficyjna apublikavali instrukcyi dla svaich hramadzian «jak maha chutčej» vyjechać z Ukrainy. A Narviehija, akramia toj ža rekamiendacyi, paraiła svaim hramadzianam nie naviedvać Rasiju i Biełaruś.
U subotu nastojlivuju rekamiendacyju svaim hramadzianam pakinuć Ukrainu dali Litva i Hiermanija.
Pryčym i ŭ ZŠA, i ŭ Brytanii padkreślivajuć, što ŭ vypadku pačatku vajennych dziejańniaŭ pakinuć Ukrainu pavietranym šlacham stanie niemahčyma, što aznačaje prahnoz poŭnamaštabnaj, a nie łakalnaj vajny i zakryćcia pavietranaj prastory. U amierykanskich ŚMI źjavilisia publikacyi, što amierykanskija desantniki, pierakinutyja ŭ Polšču, majuć svajoj hałoŭnaj zadačaj harantavać biaśpieku naziemnych šlachoŭ evakuacyi.
Brytanskaje ministerstva abarony zajaviła, što 12—13 lutaha Ukrainu pakinuć brytanskija vajskovyja instruktary i papiaredziła svaich hramadzian, kab jany nie raźličvali na dapamohu brytanskaj armii ŭ evakuacyi ŭ vypadku pačatku vajennych dziejańniaŭ.
Paŭdniovaja Kareja zajaviła, što siońnia z 18:00 pa ŭkrainskim časie pačnie dziejničać zabarona na naviedvańnie Ukrainy. Tych, chto zaraz znachodzicca na terytoryi krainy, źbirajucca evakuiravać.
Kijeŭ zaćvierdziŭ płan evakuacyi
Mer Kijeva Vital Kličko zajaviŭ, što staličnyja ŭłady rychtujucca da pracy va ŭmovach mahčymaha nadzvyčajnaha stanovišča. Haradskija ŭłady zaćvierdzili płan evakuacyi nasielnictva ŭ suviazi z raspaŭsiudžańniem infarmacyi pra mahčymaje ŭvarvańnie Rasii va Ukrainu.
«Abjekty krytyčnaj i sacyjalnaj infrastruktury stalicy pracujuć u režymie padrychtoŭki da pracy va ŭmovach mahčymaj nadzvyčajnaj situacyi, — adznačyŭ Kličko. — Kijeŭ — bujny miehapolis. I jon maje razhalinavanuju i składanuju infrastrukturu žyćciezabieśpiačeńnia, stabilnaja praca jakoj u nadzvyčajnaj situacyi — samaja hałoŭnaja zadača. Tamu našyja namahańni nakiravanyja na toje, kab jak praduchilić ci pieraadoleć mahčymyja pravakacyi, tak i vystajać va ŭmovach vajennaha napadu».
Pa słovach mera, «u stalicy zaćvierdžany płan evakuacyi nasielnictva, jaki vyznačaje miescaznachodžańnie zbornych evakuacyjnych punktaŭ, kolkaść nieabchodnaha transpartu i biaśpiečnyja rajony dla raźmiaščeńnia nasielnictva».
Pieramovy praciahvajucca
ŚMI paviedamili, što kiraŭniki zachodniaha śvietu 11 lutaha praviali terminovuju telefonnuju kanfierencyju ŭ suviazi ź situacyjaj vakoł Ukrainy.
Udzieł u kanfierencyi pryniali prezident ZŠA Džo Bajden (jaho nazyvajuć inicyjataram kanfierencyi), fiederalny kancler Hiermanii Ołaf Šolc, prezident Francyi Emanuel Makron, premjer-ministr Vialikabrytanii Borys Džonsan, prezident Polščy Andžej Duda, prezident Rumynii Kłaŭs Jochanis, premjer Italii Maryjo Drahi, hienieralny sakratar NATA Jens Stołtenbierh, premjer-ministr Kanady Džaścin Trudo, staršynia Jeŭrapiejskaj kamisii Ursuła fon der Lajen i staršynia Jeŭrapiejskaj Rady Žan Mišel.
Pres-sakratar urada FRH Štefien Chiebienštrajt zrabiŭ pa vynikach kanfierencyi zachodnich lidaraŭ zajavu i naŭprost skazaŭ pra niebiaśpieku vajny. Situacyja im aceńvajecca jak «vielmi, vielmi surjoznaja».
Siońnia ŭ abied dziaržsakratar ZŠA Entani Blinkien i ministr zamiežnych spraŭ Rasii Siarhiej Łaŭroŭ pahavaryli pa telefonie. Jany abmierkavali situacyju vakoł Ukrainy.
Taksama siońnia, 12 lutaha, stała viadoma, što adbudziecca telefonnaja razmova prezidentaŭ ZŠA i Rasii Džo Bajdena i Uładzimira Pucina. Jana projdzie ŭviečary.
Ekstrannaje pasiedžańnie NATA maje adbycca 13 lutaha, u niadzielu.
Rychtujucca novyja sankcyi
Paviedamlajecca, što Rasiju čakaje «pakiet ciažkich sankcyj». Mahčyma, jany buduć uviedzienyja suprać bujnych rasiejskich bankaŭ i «niekatorych rasiejskich aliharchaŭ», piša Reuters.
Kali ahresija z boku Rasii ŭsio ž adbudziecca i Biełaruś voźmie ŭ hetym udzieł, to novyja sankcyi čakajuć i našu krainu. Adpaviedny zakonaprajekt budzie razhladać Kanhres ZŠA.
«ZŠA pavinny vyrazna dać zrazumieć, što da luboj krainy, jakaja padtrymaje sproby Rasii ŭvarvacca ŭ Ukrainu, buduć užytyja žorstkija ekanamičnyja i dypłamatyčnyja sankcyi», — havorycca ŭ zajavie sienatara Łenkfarda, aŭtara zakonaprajekta.
