20:30. MUS Kazachstana abviaściła, što ŭ piatnicu byŭ adbity ŭzbrojeny napad na śledčy izalatar u Tałdykarhanie ‒ bujnym horadzie niedaloka ad Ałmaty.
MUS śćviardžaje, što SIZA sprabavali zachapić 15 čałaviek na aŭtamabilach, troje ź ich zabityja, dvoje paranienyja. U pierastrełcy zahinuŭ adzin palicejski.
Ciapier u SIZA pracuje śledča-apieratyŭnaja hrupa.
U Ałmacinskaj vobłaści stvorany antyterarystyčny štab. Ułady prosiać žycharoŭ nie vychodzić z domu.
Mienavita ŭ Tałdykarhanie byŭ źniesieny pomnik Nazarbajevu.
17:55. Dziaržaŭnaje telebačańnie Kazachstana zajaviła pra mahčymuju «zradu ŭ vyšejšym kiraŭnictvie krainy». KNB chavaŭ infarmacyju ab stvoranych u harach Kazachstana trenirovačnych łahierach. Pra heta zajaviŭ eks-daradca Nazarbajeva Jermuchamiet Jertysbajeŭ.
«Nacyjanalnaja zdrada i zmova zaklučajecca ŭ tym, što na praciahu niekalkich hadoŭ, akazvajecca, isnavali trenirovačnyja łahiery. KNB, jaki pieryjadyčna źniščaŭ tuju ci inšuju hrupu, ab šmatlikich trenirovačnych łahierach, stvoranych u harach, maŭčaŭ», — zajaviŭ Jermuchamiet Jertysbajeŭ u efiry kanała «Chabar 24».
14.52. Partał ORDA.KZ, jaki raspaŭsiudziŭ infarmacyju pra zatrymańnie Samata Abiša, sam jaje abvierh.
«Naša krynica, jakaja paviedamiła ab zatrymańni plamieńnika Nazarbajeva Samata Abiša, pamyliłasia. Hetaja infarmacyja nie paćvierdziłasia. Vybačajcie, my pracujem u nadzvyčajnych abstavinach, i naša adzinaja zadača ‒ infarmavać svaich čytačoŭ. Prosim zrazumieć», ‒ zajavili ŭ redakcyi.
14.34. ŚMI: U Ałmaty zatrymali Samata Abiša, plamieńnika Nursułtana Nazarbajeva. Jon byŭ pieršym namieśnikam staršyni Kamiteta nacyjanalnaj biaśpieki.
Nazarbajeŭ i jaho dočki sa svaimi siemjami pakinuli Kazachstan. U krainie zastajecca tolki starejšy brat Nursułtana ‒ Bołat Nazarbajeŭ. Taksama paviedamlajecca, što ŭłady Kazachstana pierastali vykarystoŭvać nazvu stalicy krainy «Nur-Sułtan» u aficyjnych paviedamleńniach. Jany nazyvajuć horad prosta «stalicaj».
Aficyjnaha paćvierdžańnia infarmacyi pakul niama.
13.57. Ałmaty siońnia: siłaviki pieramiaščajucca pa vulicach, stralajučy ŭ pavietra. U bankamatach znoŭ źjavilisia najaŭnyja. A z palic kramaŭ prybrali ŭvieś ałkahol.
13.35. U Žanaazenie praciahvajecca mirny mitynh.
Pratestoŭcy vyłučyli čatyry patrabavańni:
1. Źmiena palityčnaha režymu.
2. Praviadzieńnie narodnych vybaraŭ u akimy kožnaj vobłaści i horada.
3. Viartańnie Kanstytucyi 1993 hoda.
4. Nie pieraśledvać hramadzianskich aktyvistaŭ.
U horadzie farmujecca rada aksakałaŭ, paviedamlaje Orda.kz.
12:54. «Biełavija» płanuje adnavić rejsy ŭ Nur-Sułtan z 7 studzienia.
Jak havorycca ŭ paviedamleńni na sajcie kampanii, rehularnyja rejsy ŭ Kazachstan buduć vykonvać «tolki pa ŭzhadnieńni z Departamientam pa avijacyi Ministerstva transpartu i kamunikacyj Respubliki Biełaruś i tolki pry biezumoŭnym zabieśpiačeńni biaśpieki palotaŭ».
Ciapier admienieny rejsy Minsk-Ałmaty-Minsk da 9 studzienia. U Nur-Sułtan avijaznosiny vyrašyli adnavić, razumiejučy ich «važnaść u biahučaj situacyi», a taksama nieabchodnaść dać «mahčymaść hramadzianam Respubliki Biełaruś i inšych krain, jakija znachodziacca ŭ Kazachstanie, vylecieć na radzimu».
«Biełavija» admianiła ŭsie rejsy ŭ Kazachstan 5 studzienia ŭ suviazi ź niespryjalnym stanoviščam u Respublicy Kazachstan.
12:13. Minabarony Rasii zajaviła, što rasijskija vajskoŭcy «dapamahli kazachstanskim siłavikam» uziać pad poŭny kantrol aeraport Ałmaty.
Kantrol nad aeraportam — klučavy faktar dla mahčymaści chutkaha pierakidvańnia vojskaŭ.
Akupacyja Čechasłavakii ŭ 1968 pačałasia z zachopu aeraporta Prahi, a apieracyja ŭ Afhanistanie ŭ 1979 razhortvałasia z avijabazy Bahram.
Padčas chaatyčnych padziej 5 studzienia praciŭniki ŭłady na niejki čas zaniali aeraport Ałmaty i spynili jaho funkcyjanavańnie. 6 studzienia ŭ horadzie adbyvalisia sparadyčnyja pierastrełki pry baraćbie za niekatoryja klučavyja abjekty infrastruktury i miescy zachoŭvańnia zbroi. Udzielnikam pratestaŭ udałosia zachapić zbroju ŭ siłavikoŭ na vulicach horada, u kramach zbroi i va ŭpraŭleńnia Kamiteta nacyjanalnaj biaśpieki, ale, jak vyhladaje, ich siły byli zamałyja, kab uziać pad kantrol uvieś miljonny horad ci stvaryć liniju abarony vakoł jaho.
Pakul niajasna, ci jość u praciŭnikaŭ ułady Kazachstana centralizavanaje kamandavańnie.
12:05. Prezident Kazachstana vystupiŭ z telezvarotam.
Jon zajaviŭ, što daŭ zahad adkryvać ahoń na paražeńnie, i adznačyŭ, što ŭłady Kazachstana nie majuć namieru vieści pieramovy z terarystami: terarystaŭ, bandytaŭ treba źniščać, i heta budzie zroblena ŭ bližejšy čas.
Pavodle Takajeva, dziaržava «praspała» napad terarystaŭ. Bajeviki nie skłali zbroju, praciahvajuć ździajśniać złačynstvy abo rychtujucca da ich. Chto ź nie zdasca, budzie źniščany.
Tolki ŭ Ałmaty, śćviardžaje Takajeŭ, było 20 tysiač terarystaŭ.
U tym, što adbyvajecca, vinavatyja nie tolki bandyty, ale i «haraaktyvisty i pravaabaroncy», a taksama «svabodnyja srodki masavaj infarmacyi i zabuhornyja dziejačy».
Prezident Kazachstana raspavioŭ ab rašeńni ŭklučyć internet u peŭnych rehijonach Kazachstana.
Režym nadzvyčajnaha stanovišča budzie paetapna źniaty tam, dzie situacyja narmalizavałasia.
Takajeŭ padziakavaŭ kiraŭnikam krain ADKB za akazanuju padtrymku.
11:55. Siły ADKB u Kazachstanie ŭznačaliŭ hienierał-pałkoŭnik Andrej Mikałajevič Sierdziukoŭ, kamandujučy Pavietrana-desantnymi vojskami Rasii.
Ën braŭ udzieł u pieršaj i druhoj apieracyjach pa «adnaŭleńni kanstytucyjnaha ładu ŭ Čačni», a z krasavika pa vierasień 2019 kamandavaŭ rasijskim kantynhientam u Siryi.
11:25. Niahledziačy na pratesty, Kyrhyzstan adpravić vajskoŭcaŭ u składzie ADKB u Kazachstan. Parłamient krainy dazvoliŭ heta. 69 parłamientaryjaŭ prahałasavali za adpraŭku vojskaŭ, suprać vystupili 7 deputataŭ.
Akcyja pratestu suprać adpraŭki miratvorcaŭ z Kyrhyzstana ŭ Kazachstan. Fota: orda_kz / Telegram
Heta było druhoje hałasavańnie. Padčas pieršaha nie było patrebnych 61 hałasoŭ. U vyniku hałasavańnie nie zaličyli.
Kyrhyzstan nakiruje ŭ susiedniuju krainu 150 čałaviek, 8 adzinak braniatechniki i 11 mašyn. Ułady Kyrhyzstana zapeŭnivajuć, što vajskoŭcy buduć zajmacca achovaj stratehičnych abjektaŭ, a nie razhonam pratestoŭcaŭ.
10:00. MUS Kazachstana paviedamiła, što za noč u Ałmaty byli zabityja 26 pratestoŭcaŭ, 18 — paranienyja. Siarod siłavikoŭ — 18 zabitych. Try tysiačy pratestoŭcaŭ zatrymanyja.
U krainie ŭviedzieny čyrvony ŭzrovień terarystyčnaj niebiaśpieki. Va ŭsich rehijonach krainy ŭviedzieny režym antyterarystyčnaj apieracyi. U hetych umovach siłavikam dazvolena dahladać minakoŭ i pranikać u lubyja pamiaškańni, zabaraniać ruch transpartu.
U toj ža čas śviedki paviedamlajuć, što na vulicach Ałmaty čuvać pierastrełka.
Vojski ADKB prystupili da vykanańnia svaich zadačaŭ. Ułady śćviardžajuć, što jany buduć najpierš zadziejničanyja ŭ achovie dziaržaŭnych budynkaŭ i stratehičnych abjektaŭ. Adnak u miratvorcaŭ ADKB jość prava ŭžyvać zbroju ŭ Kazachstanie ŭ vypadku napadu ŭzbrojenych bandaŭ, paviedamiŭ hiensiek arhanizacyi.
Internet pa-raniejšamu ŭ krainie pracuje niestabilna.
Abnaŭlajecca.
«Stary, sychodź!» Raskazvajem pra kult asoby Nazarbajeva, suprać jakoha paŭstali kazachi
Ekśpiert Lebiadok pra adpraŭku vojsk ADKB u Kazachstan: Biełaruś moža ŭviazacca ŭ vajnu
