Šantažujučy Zachad, Pucin pakazvaje namier padzialić Ukrainu na manier Karei, ukidvajučy ŭ zachodnija ŚMI infarmacyju pra heta ad nibyta tajemnych «infarmataraŭ u Kramli», jakija pieradajuć zachodnikam płany i mapy.
Heta vyhladaje jak palityčnaja rybałka: padvodam vojskaŭ Rasija zakinuła vudu i čakaje, što dzie klunie.
Samaja vidavočnaja meta — pačać pieramovy z Bajdenam nakont jeŭrapiejskaj biaśpieki, takaja sabie «Jałta 2.0». Šaniec dla hetaha nieŭzabavie budzie na śniežańskim anłajn-samicie Pucina i Bajdena.
Śpis pažadańniaŭ Maskvy vielmi doŭhi. Vidavočna, jana chacieła b admovy Zachadu ad luboj padtrymki apazicyi ŭnutry svajoj krainy; harantyi nieŭstupleńnia Ukrainy ŭ ES i NATA i spynieńnie ŭzajemadziejańnia pa vajennaj linii; zakryćcia Čornaha i Bałtyjskaha moraŭ dla bajavych karabloŭ krain, jakim nie naležyć bierah; źniaćcia sankcyj; pryznańnia «prava» Rasii na ŭpłyŭ u krainach byłoha SSSR; strymlivańnie raźvićcia zachodnich uzbrajeńniaŭ i vyvadu kantynhientaŭ NATA z krain Uschodniaj Jeŭropy i hetak dalej.
Vielmi važny momant, paśla jakoha pačałasia eskałacyja ŭzdoŭž ukrainskich miežaŭ, — pieršaje vykarystańnie «Bajraktara» ŭkrainskim vojskam dla źniščeńnia bajavoj techniki rasijskaj vytvorčaści ŭ DNR.
Ni maryjanietkavyja ŁDNR, ni Rasija nie majuć techniki, zdolnaj supraćstajać novym technałohijam — heta vydatna pakazaŭ kanflikt u Karabachu, dzie tureckaja zbroja razdušyła rasijskuju.
Prykład demanstratyŭna ŭžytaha «Bajraktara», vidać, daŭ Pucinu zrazumieć, što nasupierak jahonym čakańniam Ukraina i ŭkrainskaje vojska z kožnym hodam uzmacniajecca. I čym dalej (turki ŭvohule płanujuć nieŭzabavie adkryć va Ukrainie zavod pa vytvorčaści «Bajraktaraŭ»), tym ciažej budzie jaje destabilizoŭvać.
Dziejničać treba ciapier, i dla hetaha składvajucca niekatoryja abstaviny. Hety hod charaktaryzujecca ŭnikalna vysokaj patrebaj Jeŭropy ŭ rasijskim hazie.
Pry hetym Zachad asłableny kavidam, u Jeŭropie adbyvajecca źmiena lidaraŭ: Mierkiel syšła, u Francyi chutka vybary prezidenta, što moža rabić iluzorny vobraz «biezuładździa» ŭ Jeŭropie.
Pamiž sajuźnikami vialikija skandały: aŭstralijcy na karyść brytancaŭ i amierykancaŭ skasavali damoŭlenaść ab zakupcy francuzskich padłodak na $66 miljardaŭ, pierasvaryŭšy ŭsich pamiž saboj.
U toj ža čas Bajden zmahajecca z unutranymi prablemami, zaniaty Kitajem i nie choča svarycca z Rasijaj.
Zručny čas dla šantažu.
Sama ž Rasija za apošnija hady zarabiła hrošaj na eksparcie, ZVR składaje 619 miljardaŭ dalaraŭ, što moža zabiaśpiečyć joj časovuju padušku biaśpieki ŭ vypadku ŭviadzieńnia sankcyj.
Kali Zachad admović Maskvie ŭ jaje patrabavańniach, vyhladaje, što ruskija buduć eskałavać kryzis i my jašče pabačym trahičnyja, ale nieabaviazkova katastrafičnyja padziei.
Pra mahčymaść vajennaha ŭvarvańnia va Ukrainu i nastupnaj akupacyi šmat havorycca, ale pakul što heta vyhladaje nierealnym scenaram.
Mahčymaść zavajavać Ukrainu 100-175-tysiačnym vojskam vyhladaje fantastyčna. A ekśpierty staviać pad sumnieŭ łahistyčnyja mahčymaści RF padtrymlivać šyrokaje i doŭhaterminovaje nastupleńnie.
Ź inšaha boku, my mała što viedajem pra hatoŭnaść Ukrainy vajavać. Ale jana adnaznačna macniejšaja, čym była ŭ 2013-2014 hadach.
Najbolš imavierny scenar — heta raspakoŭka zamarožanaha kanfliktu na Danbasie, ale ŭ samaj hrateksnaj formie, z šyrokaj padtrymkaj «apałčeńnia» rasijskimi ahniavymi sistemami.
