Adnak u Leninskim RAUS Babrujska administracyjny praces suprać Siarhieja pačali ŭžo za repost. Pavodle blizkich Siarhieja Bialajeva, tam adzin z supracoŭnikaŭ biez usialakaj pryčyny ŭdaryŭ jaho pa hałavie.
U Siarhieja chvaroba Parkinsona, užyŭleny niejrastymulatar. Minułaj zimoj jaho taksama zabirali z domu paśla pieratrusu i abšukvali ŭ milicyi z užyvańniem mietałašukalnika. Heta pryviało da taho, što niejrastymulatar byŭ źbity z rytmu. Hetaj vosieńniu Siarhieju zrabili apieracyju ŭ Minsku i naładzili stymulatar.
Adnak užo ranicaj nastupnaha dnia pa pryjeździe dadomu paśla lakarni da jaho ŭvarvalisia siłaviki, pakłali na padłohu, nadzieli kajdanki. Praŭda, tady Siarhieja nie zatrymali. A praź miesiac, 10 listapada, vyrašyli, što jon užo zdarovy, i zatrymali paśla pieratrusu.
U piatnicu 12 listapada na sudzie ŭ IČU Siarhiej Bialajeŭ padaŭ chadajnictva na abaronu, zapatrabavaŭ advakata. I jaho adpuścili da paniadziełka.Tady blizkija źviarnuli ŭvahu na toje, što jon vielmi drenna pierasoŭvajecca, mahčyma, niejrastymulatar znoŭ źbity. Ahułam u mužčyny było try pasiedžańni suda, apošniaje — u aŭtorak, 16 listapada. Siarhieja asudzili pa č. 2 art. 19.11 KaAP da 10 sutak aryštu. Adpuścić jaho pavinny 26 listapada.
«Jość vialiki šaniec, što paśla prypynieńnia pracy niejrastymulatara, užyŭlenaha ŭ jaho hałavu, jon prosta moža pamierci. Plus jaho źbili va UUS i jon niekatory čas navat nie paznavaŭ znajomych ludziej», — raspaviali pravaabaroncam jaho znajomyja.
Babrujčanin byŭ upeŭnieny, što jamu daduć nie sutki, a štraf, tamu nie byŭ hatovy da aryštu. Zaradki ŭ niejrastymulatary zastałosia na ličanyja dni, i kali jaho nie padzaradzić, heta moža vyklikać pahrozu zdaroŭju i žyćciu Siarhieja.
