Vadzim Hihin, skrynšot ź videa telekanała ANT
Biełaruskaje hramadskaje abjadnańnie «Znanije» biare pačatak z savieckich časoŭ. U 80-ja tysiačy biełaruskich navukoŭcaŭ uvachodzili ŭ jaho skład. I ŭ bijahrafii Alaksandra Łukašenki jość zhadka, što jon byŭ adkaznym sakratarom abjadnańnia «Znanije» ŭ Škłovie. Paśla raspadu SSSR dziejnaść praciahnułasia, ale ŭžo nie była takoj zaŭvažnaj.
Kab bolš zrazumieć, čym zajmajucca čalcy abjadnańnia apošnija hady, možna źviarnuć uvahu na sieminar, jaki dla moładzi arhanizavała minskaje adhalinavańnie «Znanija». Voś jakija temy abmiarkoŭvali sa studentami: «Dostižienije vozmožnoho — vozmožno každomu», «V krasotie živiet liš Čiełoviek», «Vsie dorohi choroši, kohda idieš svojej», «Byť svobodnym i sčastlivym možiet každyj», «Našie słavnoje Otiečiestvo — pobieditielem narodom sozdałoś», «Ekonomika raźvitija proćvietajuŝiej Biełarusi», «Mir zdorovja i krasoty», «Ot upravlenija soboj — k upravleniju stranoj» i, narešcie, «V mirie niet takoj druhoj strany kak Biełaruś».
Papiarednim staršynioj abjadnańnia byŭ były rektar Akademii kiravańnia pry prezidencie Hienadź Palčyk, paśla vybaraŭ-2020 jaho adpravili na vykładčyckuju pracu, i siońnia vy nie znojdziecie jahonaje imia na sajcie «Znanija» ŭ śpisie byłych kiraŭnikoŭ.
U vieraśni pasadu kiraŭnika zaniaŭ Vadzim Hihin, viadomy praŭładny funkcyjanier i prapahandyst. Da taho byŭ dekanam fakulteta ŭ BDU, jašče raniej pracavaŭ u BRSM, bolš za 10 hadoŭ byŭ hałoŭnym redaktaram časopisa «Biełaruskaja dumka», jaki naležyć Administracyi Łukašenki, byŭ taksama viadučym na dziaržTB. Aproč taho, Vadzim Hihin arhanizoŭvaŭ lekcyi prarasijskich śpikieraŭ u Minsku, ale heta dziejnaść była časova prypynienaja praz pandemiju.
Dniami Łukašenka padpisaŭ ukaz, jaki pašyraje mahčymaści dla novaha dziecišča Hihina. Tak, na praciahu najbližejšych dvuch hadoŭ dziaržaŭnyja arhanizacyi i ŭstanovy buduć kuplać pracy i pasłuhi «Znanija» pa pracedury zakupki z adnoj krynicy, to-bok biezalternatyŭna.
Aproč taho, centralnamu ofisu abjadnańnia i jaho rehijanalnym strukturam na 2021-2022 hady vydzialać biaspłatnyja pamiaškańni, dzie jany zmohuć pracavać.
A jašče ŭkazam značna pašyrajecca pole dziejnaści abjadnańnia:
- papularyzacyja ajčynnaj historyi, raspaŭsiudžvańnie navukova abhruntavanaj infarmacyi ab historyka-kulturnaj spadčynie, bajavych podźvihach i pracoŭnych dasiahnieńniach biełaruskaha naroda, važnych histaryčnych padziejach, pamiatnych miaścinach, ich roli i značnaści ŭ stanaŭleńni biełaruskaj dziaržaŭnaści ŭ metach farmiravańnia hramadzianskaści i patryjatyzmu, pavažlivaha i adkaznaha staŭleńnia da histaryčnaha minułaha i jaho zachavańnia;
- supraćdziejańnie falsifikacyi historyi, raspaŭsiudžvańniu destruktyŭnych ideałahičnych daktryn;
- farmiravańnie ŭśviadomlenaj hramadzianskaj pazicyi.
