Što źmianiłasia? Ciapier pry pryjomie na pracu dziaržaŭnyja arhanizacyi abaviazany buduć zapytvać charaktarystyku na čałavieka z papiaredniaha miesca.
U joj, aproč prafiesijnych jakaściaŭ i dyscyplinavanaści, musić adlustroŭvacca staŭleńnie da dziaržaŭnych i hramadskich instytutaŭ.
Formy novaj charaktarystyki kadraviki jašče nie bačyli.
«Raniej zapyt charaktarystyki byŭ tolki pravam najmalnika, a nie abaviazkam (artykuł 26 Pracoŭnaha kodeksa), ale heta ničoha nie davała pa sutnaści.
Nichto hetym nie zajmaŭsia, akramia siłavych struktur. Dyj forma była advolnaja — u asnoŭnym pisali, jaki dobry chłopiec», — dzielicca śpiecyjalist kadravaha adździeła adnaho ź dziaržpradpryjemstvaŭ.
Ab budučych kiraŭnikach buduć zapytvać infarmacyju z banka danych pra pravaparušeńni. Raniej takija źviestki zvyčajna źbiralisia, naprykład, na achoŭnikaŭ ci dziaržsłužačych, ale na prostych kiraŭnikoŭ — nie.
«Patrabavańnie charaktarystyki značna zapavolić afarmleńnie na pracu. Na kadravikoŭ abryniecca vał hetych charaktarystyk. Z adnaho boku, ich budzie patrebna pisać, a pisać nieviadoma što. Adkul ja viedaju, čałaviek zmahar ci jabaćka? Pakul charaktarystyki niama, nielha prymać na pracu.
Ź inšaha boku, pryjdzie rabotnik, jaki padychodzić, ale ŭ jaho charaktarystycy niešta drennaje napisali — toj ža artykuł 24.23. Dyrektar brać takoha chutčej za ŭsio pabaicca.
Potym novy čałaviek, znoŭ čakać charaktarystyku», — źviartaje ŭvahu na prablemy kadravik.
Na dumku surazmoŭcy, hety dekret vyhladaje jak sproba zapałochać pratestoŭcaŭ.
«Maŭlaŭ, spačatku ŭsich zvolnim z pracy, a potym vas nie voźmuć, bo ŭ charaktarystycy budzie bačna, što ty zmahar.
Da hetaha času nijakaj schiemy, jak doŭhačasova pieraśledavać čałavieka, nie było. Dla kadravikoŭ niama nijakich adkrytych śpisaŭ ci prahramy, u jakuju zabivaješ imia kandydata i hladziš, ci možna jaho brać. Jak tolki supracoŭnik zvolniŭsia, jon stanovicca čystym listom dla novaha najmalnika. I pradjavić: «Navošta vy ŭziali na pracu zmahara?» — nielha.
Ciapier za čałaviekam budzie ciahnucca «chvost». Heta sposab adpomścić taksama. Tym bolš za vydaču charaktarystyki z zaviedama niepraŭdzivaj infarmacyjaj praduhledžana adkaznaść. Chacia naŭrad ci dekret spracuje na 100%», — ličyć kadravik.
Dekret №6, jaki ŭnosić źmieny ŭ Dekret № 5 ad 2014 hoda «Ab uzmacnieńni patrabavańniaŭ da kiraŭničych kadraŭ i rabotnikaŭ arhanizacyj», byŭ padpisany 12 kastryčnika. U siłu jon ustupić praz 10 dzion paśla apublikavańnia, to-bok 22 kastryčnika.
