Juryj Čyž. Fota Siarhieja Hudzilina, «Naša Niva»
Z apisańnia skarhi vynikaje chranałohija pieraśledu biznesmena: spačatku jaho ŭtrymlivali pad vartaj u SIZA, pryčym termin praciahvaŭsia, paśla pieraviali pad chatni aryšt, zatym śledstva vyrašyła nakiravać jaho na sudova-psichijatryčnuju ekśpiertyzu. Jaje pravodziać u RNPC psichičnaha zdaroŭja ŭ Navinkach.
Čytajcie taksama: Zatrymany Juryj Čyž. Padrabiaznaści
Zaraz Juryj Čyž nie ŭ śledčym izalatary. Pa zakonie, kali ekśpiertyza vyjavić psichičnaje rasstrojstva ci zachvorvańnie, pa rašeńni psichijatra čałavieka mohuć nakiravać u balnicu na lačeńnie, ale patrabujecca zhoda samoha pacyjenta (vyklučeńnie — dla niedziejazdolnych, za ich zhodu dajuć zakonnyja pradstaŭniki).
Prymusova adpravić na lačeńnie mohuć tolki pa rašeńni suda. Adnak zaraz biznesoŭca nakiroŭvajuć tolki na ekśpiertyzu, jakaja pavinna vyznačyć jahony stan. I navat heta rašeńnie jon maje prava abskardzić u sudzie, što zaraz i robić abvinavačany.
Brat Juryja, Alaksandr, admoviŭsia kamientavać «Našaj Nivie» stan zdaroŭja biznesoŭcy.
Situacyja ŭ Čyža biazradasnaja — praciahvajecca aryšt jahonaj majomaści, sudovyja raźbiralnictvy i kryminalny pieraśled pa spravach kolišniaj paśpiachovaj biznes-impieryi.
Dapoŭniena: «Siońnia ŭ zakrytym sudovym pasiadžeńni była razhledžana skarha na prymianieńnie miery strymańnia ŭ vyhladzie zaklučeńnia pad vartaj. Jana pakinuta biez zadavalnieńnia», — paviedamili ŭ sudzie.
Tam zajavili, što nijakich inšych skarhaŭ pa spravie biznesmiena nie razhladałasia.
Čytajcie taksama: Krynicy: Čyža kašmarać, bo ličać, što jon schavaŭ miljardy, jakija treba viarnuć u Biełaruś
