Pytańnie było važnaje, bo tyčyłasia nie tolki hrošaj, ale i imidžu — naša kraina stała traplać u roznyja rejtynhi pryvabnaści dla turystaŭ, piša telehram-kanał «Našy hrošy».
Usio skončyłasia ŭ 2020 hodzie. Padziei žniŭnia i pandemija, jak ciapier vidać pa aficyjnaj statystycy, pierakreślili šmathadovyja starańni, adkinuŭšy da pakazčykaŭ ujaznoha turyzmu dziesiacihadovaj daŭniny. I heta tolki ŭličvajučy statystyku 2020 hoda. Miarkujučy pa ŭsim, 2021-y pakaža jašče bolš sumnyja vyniki.
Chto da nas jeździŭ bolš za ŭsio, i nakolki skaraciŭsia turystyčny patok z hetych krain za apošni čas.
U dakryzisnym 2019 hodzie ŭ Biełaruś arhanizavana zajechali 405 472 turysty. Dla paraŭnańnia, u 2016 turystaŭ było 217 398, a ŭ 2018 — 365 534. 2020-y vidavočna staŭ katastrofaj i dla ŭjaznoha turyzmu. U hety hod u krainu arhanizavana zajechali 80 972 turysty — roŭna ŭ piać razoŭ mienš, čym u papiarednim.
Siarod haściej, jakija naviedali nas, na pieršym miescy čakana znachodzicca Rasija. Patok takich žadajučych u 2019-m składaŭ bolš za pałovu ad usich ujaznych turystaŭ (217 837), a ŭžo da 2020-ha jon skaraciŭsia na 76% da 52 263 čałaviek.
Polšča ŭ 2019 hodzie adpraviła ŭ Biełaruś 61 349 turystaŭ, a maleńkaja Litva — 76 060. Praz hod turystyčny patok z hetych krain pieratvaryŭsia ŭ vadki ručajok, zdrabnieŭšy da 13 562 čałaviek z Polščy i ŭsiaho da 6719 čałaviek ź Litvy (padzieńnie z hetaj krainy — na 91%).
Łatvija — było 10 478 čałaviek, stała 1116, Hiermanija — było 4538 čałaviek, stała 818, Ukraina — było 3578 čałaviek, stała 748.
Kitajskija turysty pa ŭsim śviecie robiać vialikija kasy. U Biełarusi šmat havaryłasia pra ŭsio macniejšaje ciesnaje i plonnaje siabroŭstva z Kitajem, hetyja zajavy zbolšaha paćviardžała statystyka ŭjaznoha turyzmu z hetaj krainy: u 2016 — 1579 turystaŭ, u 2018 — 3277, 2019 — 5121. U 2020-m kolkaść turystaŭ z hetaj krainy nabliziłasia da statystyčnaj chibnaści: 189 čałaviek.
Turysty z Iraka, jakija prylatajuć u aeraport «Minsk», siońnia ŭ centry ŭvahi nie tolki biełarusaŭ, ale i ŭsiaho śvietu. Zajmalny fakt: cikavaść da Biełarusi ŭ žycharoŭ hetaj krainy źjaviłasia nie sioleta. U 2017 nas naviedali 1372 irakcy, 2018 — 1608, 2019 — 1157, a ŭ 2020 — 655. Budzie vielmi cikava pahladzieć statystyku za 2021 hod.
Jaki možna padvieści vynik? Situacyja z ŭjaznym turyzmam, viadoma, katastrafičnaja. Hałoŭnym našym pastaŭščykom turystaŭ pa-raniejšamu zastajecca Rasija, i siońnia na hetuju krainu robicca hałoŭnaja staŭka. My čujem naviny ab adkryćci ŭsio novych avijarejsaŭ, ale zastajecca vialikaje pytańnie, ci dapamoža heta viarnuć rasijskaha turysta. Naŭrad ci novyja avijamaršruty adkryvalisia nie tak intensiŭna ŭ 2019-m pry turystyčnym patoku ŭ 400 tys čałaviek, ciapier jon źniziŭsia ŭ razy, i ciažka ŭjavić, kim buduć zapaŭniacca hetyja rejsy. Mahčyma, biełarusy zachočuć adpravicca na adpačynak u Krasnuju Palanu zamiest Turcyi abo ŭ Varoniež zamiest Varšavy, zadajucca pytańniem «Našy hrošy».
